ভাৰতৰ মুখ্য ন্যায়াধীশ ডি ৱাই চন্দ্ৰচূড় ট্ৰ’লৰ চিকাৰ হৈছে। ৰাষ্ট্ৰপতি দ্ৰৌপদী মুৰ্মুলৈতেৰজন বিৰোধী নেতাই এখন পত্ৰ লিখি এই সন্দৰ্ভত তাৎক্ষণিক ব্যৱস্থা গ্ৰহণ কৰিবলৈ আহ্বান জনাইছে।
পত্ৰখনত দাবী কৰা হৈছে যে চৰকাৰ গঠন আৰু মহাৰাষ্ট্ৰত ৰাজ্যপালৰ ভূমিকাৰ সৈতে সম্পৰ্কিত এটা গুৰুত্বপূৰ্ণ গোচৰৰ সময়ত ‘ট্ৰলিং সেনা’ই মুখ্য ন্যায়াধীশক ট্ৰ’ল কৰা আৰম্ভ কৰিছিল।
বিৰোধী নেতাসকলে অভিযোগ কৰিছে যে এনে এক গুৰুত্বপূৰ্ণ বিচাৰাধীন বিষয়ৰ শুনানিৰ সময়ত মহাৰাষ্ট্ৰ চৰকাৰৰ সমৰ্থনত ট্ৰ’ল কৰা হৈছিল। তেওঁৰ বিৰুদ্ধে ‘অশ্লীল আৰু অশোভনীয়’ শব্দ ব্যৱহাৰ কৰা হৈছে।
লগতে পঢ়ক: ৰাছিয়াৰ ৰাষ্ট্ৰপতি ভ্লাদিমিৰ পুটিনৰ বিৰুদ্ধে গ্ৰেপ্তাৰী পৰোৱানা জাৰী; কি প্ৰতিক্ৰিয়া মস্কোৰ?
তেওঁলোকে অভিযোগ কৰিছে যে ছ’চিয়েল মিডিয়াত লাখ লাখ নেটিজেনৰ সন্মুখত মুখ্য ন্যায়াধীশগৰাকীক অসন্মান কৰা হৈছে।
পত্ৰখন লিখিছে কংগ্ৰেছৰ সাংসদ বিবেক তানখাই। তেওঁৰ বাহিৰে আন ১২জনে পত্ৰখনত স্বাক্ষৰ কৰিছে। তেওঁলোকৰ ভিতৰত দিগ্বিজয় সিং আৰু অন্যান্য কংগ্ৰেছ নেতাৰ লগতে আপ, শিৱসেনা আৰু সমাজবাদী পাৰ্টিৰ নেতাও আছে।
জানিব পৰা মতে, মহাৰাষ্ট্ৰ বিধানসভাত অনুষ্ঠিত আস্থা ভোটত ৰাজ্যপাল ভগত সিং কোশিয়াৰীৰ ভূমিকাৰ সম্পৰ্কত শুনানি হৈছিল। তাতেই মুখ্য ন্যায়াধীশৰ বিৰুদ্ধে এনে ধৰণৰ ট্ৰলিঙৰ অভিযোগ উঠিছে।
