চিবিআইৰ ৰোষত বিদেশী অলাভজনক সংস্থা অক্সফামৰ ভাৰতীয় শাখা। গৃহ পৰিক্ৰমা মন্ত্ৰালয়ৰ এক সূত্ৰই দাবী কৰিছে যে অক্সফামৰ বিৰুদ্ধে আন বহু সংস্থাৰ সৈতে বিদেশী ধনৰ লেনদেন কৰাৰ অভিযোগ আছে। ২০২০ৰ ২৯ ছেপ্টেম্বৰৰ পৰা এনে লেনদেন নিষিদ্ধ। কিন্তু এই নিয়ম কাৰ্যকৰী হোৱাৰ পিছতো অক্সফাম ইণ্ডিয়াই এনে লেনদেন অব্যাহত ৰাখিছে বুলি অভিযোগত উঠিছে। ইয়াৰ বাবেই কেন্দ্ৰই চিবিআইক বিষয়টোৰ তদন্ত কৰিবলৈ নিৰ্দেশ দিছে।
সূত্ৰসমূহে দাবী কৰিছে যে যোৱা বছৰে হেনো আয়কৰ বিভাগে এনে লেনদেনৰ সৈতে জড়িত ইমেইল বিচাৰি পাইছিল। আৰু সেই মেইলবোৰৰ পৰাই অক্সফাম ইণ্ডিয়াই আন এফচিআৰএ সংস্থালৈ ধন পঠোৱাৰ পৰিকল্পনা কৰিছে।
লগতে পঢ়ক: ৰিজাৰ্ভ বেংকৰ ঘোষণাত সকাহ! ৰেপো ৰেট বৃদ্ধি নকৰাৰ সিদ্ধান্ত গৱৰ্ণৰৰ
মন কৰিব যে ইয়াৰ ভিতৰত এনে এটা সংস্থাও আছে যাৰ এফচিআৰএ অনুজ্ঞাপত্ৰ যোৱা বছৰ গৃহ পৰিক্ৰমা মন্ত্ৰালয়ে বাতিল কৰিছিল। এই অনুজ্ঞাপত্ৰ বাতিলৰ অধীনত সংস্থাটোৱে কোনো বিদেশী অনুদান গ্ৰহণ কৰিব নোৱাৰিব। সেই সময়ত বিৰোধীয়ে কেন্দ্ৰৰ এই সিদ্ধান্তক তীব্ৰ গৰিহণা দিয়া দেখা গৈছিল।
ইয়াৰ লগতে সূত্ৰটোৱে লগতে দাবী কৰে যে আয়কৰ বিভাগৰ সমীক্ষাৰ পৰা দেখা গৈছে যে বহু বিদেশী সংস্থাই অক্সফাম ইণ্ডিয়াক স্বতন্ত্ৰভাৱে অনুদান আগবঢ়াইছে। যোৱা বছৰৰ জানুৱাৰী মাহত অক্সফামৰ এফচিআৰএৰ অনুজ্ঞাপত্ৰও বাতিল কৰা হৈছিল। সেই সময়ত সংস্থাৰ ফালৰ পৰা গৃহ পৰিক্ৰমা মন্ত্ৰালয়ক এই সিদ্ধান্ত পুনৰ বিবেচনা কৰিবলৈ অনুৰোধ কৰিছিল।
উল্লেখ্য যে যোৱা জানুৱাৰী মাহত অক্সফামে প্ৰকাশ কৰা এক সমীক্ষা প্ৰতিবেদনক লৈ হুলস্থুলৰ সৃষ্টি হৈছিল। প্রতিবেদনখনত উল্লেখ কৰা হৈছিল যে দেশৰ ৪০ শতাংশ ধন মাত্ৰ ১ শতাংশ ধনী মানুহৰ হাতত আছে৷
লগতে পঢ়ক:প্ৰতিশোধ! প্ৰেমিকাৰ বিয়াত বোমা উপহাৰ প্ৰাক্তন প্ৰেমিকৰ; বিস্ফোৰণত দৰাকে ধৰি দুজন নিহত
উক্ত সমীক্ষা প্ৰতিবেদনে দেশত আৰ্থিক বৈষম্যৰ মাত্ৰাৰ স্পষ্ট ইংগিত দিয়ে। ভাৰতৰ আটাইতকৈ ধনী ব্যক্তি গৌতম আদানীৰ আয়ৰ ওপৰত এককালীন কৰ আৰোপ কৰিলে বহু চাকৰিৰ সৃষ্টি হ’ব পাৰে বুলিও নতুন সমীক্ষাটোত উল্লেখ কৰা হৈছিল।
