সোমবাৰে নিশা নগাঁৱৰ ডিমৰুগুৰিত সংঘটিত এক ভয়ংকৰ পথ দুৰ্ঘটনাত ৩জন যুৱক থিতাতে নিহত হয়। স্কুটী আৰু ট্ৰাকৰ মুখামুখি সংঘৰ্ষৰ ফলত সংঘটিত হয় এই শোকাৱহ দুৰ্ঘটনাটো। নিশা সংঘটিত হোৱা এই ঘটনাত শোকস্তব্ধ হৈ পৰে অঞ্চলটো।
দুৰ্ঘটনাত থিতাতে নিহত যুৱক তিনিজনক ডিমৰুগুৰিৰ মুন্না দাস, পংকজ দাস আৰু বিক্ৰম দাস বুলি চিনাক্ত কৰা হৈছে। ঘটনাৰ পিছতে ডিমৰুগুৰিত উত্তপ্ত পৰিস্থিতিৰ সৃষ্টি হয়। একাংশ যুৱকে মৃতদেহ লৈ ৰাষ্ট্ৰীয় ঘাইপথ অৱৰোধ কৰে।
নগাঁও আৰক্ষী আৰু যান-বাহন আৰক্ষী ঘটনাস্থলীত উপস্থিত হোৱাৰ পিছতে আৰক্ষীৰ সৈতে সংঘৰ্ষত লিপ্ত হয় একাংশ স্থানীয় লোক। উত্তেজিত লোকে আৰক্ষীৰ বাহনসমূহতো আক্ৰমণ চলায়। এই ঘটনাত এজন আৰক্ষীৰ লোক আহত হোৱা বুলি জানিব পৰা গৈছে।
অৱশ্যে, নগাঁও সদৰ আৰক্ষী থানাৰ ভাৰপ্ৰাপ্ত বিষয়া মনোজ ৰাজবংশী ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে।
জানিব পৰা মতে নিশা দুচকীয়া বাহনত অহা যুৱক তিনিজনে এখন ট্ৰাকত খুন্দা মৰাৰ ফলত থিতাতে নিহত হয় যুৱক তিনিজন।
উল্লেখ্য যে কালি অসমৰ ডিব্ৰুগড়টো একেধৰণৰ ঘটনা সংঘটিত হৈছিল। ডিব্ৰুগড়ৰ ডিকম অঞ্চলত পুৱাৰ ভাগত সংঘটিত এক মৰ্মান্তিক পথ দুৰ্ঘটনাত তিনিগৰাকী মহিলা চাহ শ্ৰমিকৰ মৃত্যুৰ পিছত পৰিস্থিতি উত্তপ্ত হৈ পৰে।
বাতৰি অনুসৰি, উত্তেজিত ৰাইজে ডিকমৰ নাহৰতলী বাইপাছৰ সমীপত টায়াৰ জ্বলাই পথ অৱৰোধ কৰি সন্ধিয়া আৰক্ষীৰ এখন বাহনত আক্ৰমণ চলোৱাৰ ফলত পৰিস্থিতি উত্তপ্ত হৈ পৰে।
ৰাতিপুৱাৰ ভাগত নাহৰতলী বাইপাছৰ সমীপত এখন তীব্ৰবেগী ছুইফট ডিজায়াৰে তিনিগৰাকী মহিলা শ্ৰমিক মহতিয়াই নিয়ে৷ ইয়াৰে দুজনৰ থিতাতে মৃত্যু হোৱাৰ বিপৰীতে আন এজনৰ চিকিৎসালয়ত মৃত্যু হয়।
