শুকুৰবাৰে ইউক্ৰেইনৰ পূব অঞ্চলৰ শ্লোভিয়ানস্ক চহৰত ৰাছিয়াৰ ক্ষেপণাস্ত্ৰ আক্ৰমণৰ ফলত কমেও ৮ জন লোক নিহত হৈছে।
এই ক্ষেপণাস্ত্ৰ আক্ৰমণত মৃত্যু হোৱা ৮ জন লোকৰ লগতে এক ডজনৰো অধিক লোক আহত হোৱাৰ খবৰ পোৱা গৈছে।
ড’নেস্ক অঞ্চলৰ গৱৰ্ণৰ পাভলো কাইৰিলেংকোৰ উদ্ধৃতি দি আল জাজিৰাই প্ৰকাশ কৰিছে যে ইউক্ৰেইনৰ ফ্ৰণ্ট লাইনত আটাইতকৈ বেছি যুদ্ধৰ স্থান বাখমুট চহৰৰ পশ্চিমে অৱস্থিত স্লোভিয়ানস্কত ৭টা ৰাছিয়াৰ এছ-৩০০ ক্ষেপণাস্ত্ৰ নিক্ষেপ কৰা হৈছে।
এই সময়ত সকলো ঠাইতে ২১ জন লোক আহত আৰু ৮ জন লোকৰ মৃত্যু হৈছে বুলি কাইৰিলেংকোৱে জনায়।
ইউক্ৰেইনৰ আৰক্ষীয়ে টুইটাৰযোগে জনোৱা মতে, ধ্বংসাৱশেষৰ পৰা উলিয়াই অনাৰ পিছত এম্বুলেন্সত এজন শিশুৰ মৃত্যু হয়।
ৰাছিয়াৰ ৰাষ্ট্ৰপতি ভ্লাদিমিৰ পুটিনে এখন বিধেয়কত স্বাক্ষৰ কৰাৰ পিছতে এই আক্ৰমণ সংঘটিত হৈছে। উল্লেখ্য যে ৰাছিয়ান নাগৰিকক সেনাবাহিনীত সংগঠিত কৰাটো সহজ কৰি তুলিবলৈ ভ্লাদিমিৰ এখনত নতুন আইন প্ৰণয়ন কৰিবলৈ সিদ্ধান্ত গ্ৰহণ কৰিছে। এই আইনখনৰ প্ৰণয়ন হ’লে সেনাবাহিনীত সেৱা আগবঢ়াবলৈ অনিচ্ছা প্ৰকাশ কৰি দেশান্তৰিত হ’ব খোজা নাগৰিকসকলক দেশৰ পৰা পলায়ন কৰাত বাধা দিব।
শুকুৰবাৰে পুটিনে স্বাক্ষৰ কৰা এই আইনখনৰ অধীনত এজন ৰাছিয়ান নাগৰিকৰ আন্তঃৰাষ্ট্ৰীয় ভ্ৰমণত নিষেধাজ্ঞা আৰোপ কৰা হ’ব। এক বিশেষ নিৰ্ধাৰিত পত্ৰ যোগে তেওঁৰ ভ্ৰমণৰ সবিশেষ তথ্য দাখিল কৰাৰ পাছতে ভ্ৰমণৰ বাবে অনুমতি লাভ কৰিব।
