ডি ৱাই এফ আই আৰু এছ এফ আইৰ উদ্যোগত উত্তাল প্ৰতিবাদ সাব্যস্ত কৰে নলবাৰী জিলাৰ টিহুত। “অ’ভাৰলেপিং বন্ধ কৰক”, “৫১ হাজাৰ পদৰ বিপৰীতে ৫১ হাজাৰক নিযুক্তি দিয়ক”, “প্ৰাৰ্থীৰ প্ৰাপ্ত নম্বৰ, কাট অফ নম্বৰসহ নাম তালিকা প্ৰকাশ কৰক”, “২৬ মে’ৰ আগতে ৱেটিং লিষ্ট প্ৰকাশ কৰক”- আদি শ্লোগানেৰে প্ৰতিবাদস্থলি উত্তাল কৰি তোলে।
অসম চৰকাৰে বৃহৎ ঘোষণাৰে আৰাম্ভ কৰা ৫১ হাজাৰ পদৰ নিযুক্তি প্ৰক্ৰিয়াৰ নামত যুৱ সমাজক ডাঙৰ প্ৰতাৰণা কৰিবলৈ ওলাইছে বুলি অভিযোগ কৰি ডি ৱাই এফ আই নেতা তথা নলবাৰী জিলা সম্পাদক কুলজিত কলিতাই কয় যে, চৰকাৰে অস্বচ্ছ আৰু পৰিকল্পনাহীন নীতিৰ বাবে ৫১ হাজাৰ পদৰ সলনি মাত্ৰ ২০/২৫ প্ৰাৰ্থীয়েহে নিযুক্তি লাভ কৰিব। স্বচ্ছতা আৰু নিকা নিযুক্তিৰ কথা কোৱা এইখন চৰকাৰে প্ৰাৰ্থীসকলে লাভ কৰা নম্বৰ, কাট অফ নম্বৰ প্ৰকাশ নকৰিলে। এজন প্ৰাৰ্থীয়ে সৰ্বোচ্চ ৪০ টা পদলৈ নিৰ্বাচিত হোৱাৰ পাছতো অগ্ৰাধিকাৰ ভিত্তিত পদ বাচনিৰ কোনো ব্যৱস্থা নকৰিলে। এয়া খুবে দুৰ্ভাগ্যজনক আৰু প্ৰতাৰণামূলক। অ’ভাৰলেপিঙৰ ফলত ৰই যোৱা পদসমূহৰ বাবে ৱেটিং লিষ্ট প্ৰকাশৰ অতি জৰুৰী আছিল যদিও চৰকাৰে কোনো পদক্ষেপেই নল’লে। প্ৰকৃততে এইখন চৰকাৰে এক লাখ নিযুক্তি দিম বুলি বৃহৎ ঘোষণা কৰি ৰাজনৈতিক লাভ বুটলাৰ চেষ্টা কৰিছে যদিও বাস্তৱত মাত্ৰ কেইবা হাজাৰ মান পদতহে নিযুক্তি দিব। এয়া চকাৰৰ যুৱ সমাজৰ প্ৰতি ডাঙৰ প্ৰতাৰণা। এই প্ৰতাৰণা বিৰুদ্ধেই ডি ৱাই এফ আই আৰু এছ এফ আইয়ে ধাৰাবাহিক সংগ্ৰাম কৰিছে বুলি তেওঁ মন্তব্য কৰে।
আজিৰ অৱস্থানৰ মাজেৰে এটাও যাতে খালী পদত খালী হৈ নাথাকে তাৰ ব্যৱস্থা কৰা, নিকা আৰু স্বচ্ছতাৰ বাবে প্ৰাপ্ত নম্বৰ আৰু কাট অফ নম্বৰসহ প্ৰাৰ্থীৰ নাম তালিকা প্ৰকাশ কৰা, ২৬ মে’ৰ পূৰ্বে ৱেটিং লিষ্ট প্ৰকাশ কৰাৰ দাবী কৰা হয়।
আজিৰ গণতান্ত্ৰিক প্ৰতিবাদী কাৰ্যসূচী সম্পৰ্কে প্ৰশাসনক জনোৱা হৈছিল যদিও কাৰ্যসূচী ৰূপায়ণত আৰক্ষীৰ তীব্ৰ বাধা দিয়া পৰিলক্ষিত হয়। কাৰ্যসূচী দীঘলীয়া হোৱাৰ কথা আছিল যদিও আৰক্ষীৰ বাধাৰ বাবে দুঘন্টাৰ পাছতে অৱস্থান সামৰিবলগীয়া হয়।
দুই ঘন্টীয়া অৱস্থান। প্ৰশাসনৰ এই অগণতান্ত্ৰিক ভুমিকাক ডি ৱাই এফ আই আৰু এছ এফ আইৰ নেতৃত্বই তীব্ৰ ভাষাৰে গৰিহণা জনায়।
