জনতাৰ হেঁচাত শিৰ নত কৰি নাগৰিকত্ব সংশোধনী বিধেয়ক ২০১৬ৰ ওপৰত গঠিত যুটীয়া সংসদীয় পেনেলখনে অহা ৭ মে’ত অসম ভ্ৰমণলৈ অহাৰ সিদ্ধান্ত গ্ৰহণ কৰিছে। পেনেলখনৰ বিষয়াবৰ্গই ৭ৰ পৰা ১০ ম’লৈকে অসম ভ্ৰমণ কৰি এই বিধেয়কখনৰ ওপৰত আগ্ৰহী ব্যক্তি, সংস্থাসমূহৰ দৃষ্টিভংগীৰ বুজ ল’ব।
বিজেপিৰ সাংসদ ৰাজেন্দ্ৰ অগ্ৰৱালৰ নেতৃত্বত গঠিত পেনেলখনৰ সদস্যসকলে ৭ আৰু ৮ মে’ত যথাক্ৰমে গুৱাহাটী আৰু শিলচৰত বিভিন্ন সংস্থাৰ সৈতে আলোচনাত মিলিত হ’ব। ৯ মে’ত সদস্যসকলে শ্বিলঙলৈ যাব আৰু ১০ মে’ত বিভিন্ন গোটৰ সৈতে আলোচনাত মিলিত হ’ব।
উল্লেখ্য যে সচেতন নাগৰিক, জ্যেষ্ঠ সাংবাদিক আৰু ৰাজহুৱা বুদ্ধিজীৱিৰে গঠিত নাগৰিকত্ব আইন সংশোধনী বিধেয়ক বিৰোধী ফ’ৰামে এপ্ৰিলৰ ১৩ তাৰিখে দাবী কৰিছিল যে যুটীয়া সংসদীয় পেনেল নতুন দিল্লীৰৰ পৰিৱৰ্তে অসমৰ ৰাজহুৱা শুনানিৰ মুখামুখি হ’ব লাগে।
ফ’ৰামখনে নাগৰিকত্ব সংশোধনী বিধেয়ক ২০১৬ৰ ওপৰত গঠিত যুটীয়া সংসদীয় পেনেলখনৰ চেয়াৰমেন পদবীৰ পৰা ৰাজেন্দ্ৰ অগ্ৰৱালৰ অপসাৰণো দাবী কৰিছিল। প্ৰতিবাদৰ পাছতে ২০১৬ৰ ছেপ্টেম্বৰত যুটীয়া সংসদীয় পেনেলখন গঠন কৰিছিল। ১৭ এপ্ৰিলত পেনেলখনে অসমৰ একাংশ সংগঠনৰ পৰা মতামত গ্ৰহণ কৰিছিল।
