শনিবাৰে অসম আৰক্ষীৰ উপ পৰিদৰ্শক জোনমণি ৰাভাৰ ৰহস্যজনক মৃত্যুৰ তদন্ত চি আই ডিৰ পৰা চি বি আইক দিয়া হৈছে।
বাতৰি অনুসৰি, আৰক্ষী সঞ্চালক প্ৰধান জি পি সিঙে ৰাজ্য চৰকাৰক এই তদন্ত চিবিআইক ন্যস্ত কৰিবলৈ প্ৰস্তাৱ দিছিল আৰু সেই অনুসৰি তদন্ত চিবিআইৰ হাতত অৰ্পণ কৰা হ’ব।
অৱশ্যে চিবিআইক তদন্ত গতাই দিয়া সন্দৰ্ভত ডিজিপি জি পি সিঙে এক সংবাদমেলত আনুষ্ঠানিকভাৱে ঘোষণা কৰে।
লগতে পঢ়ক: জোনমণি ৰাভাৰ মৃত্যু ৰহস্য: মুখ্য কাৰ্যালয়ত “ক্ল’জ” কৰা হ’ল চাৰিজন আৰক্ষী বিষয়াক
উপ পৰিদৰ্শক জোনমণি ৰাভাৰ ৰহস্যজনক মৃত্যুৰ তদন্ত অসম আৰক্ষীৰ অপৰাধ অনুসন্ধান শাখা (চি আই ডি)ই অব্যাহত ৰাখিছিল ।
ইতিমধ্যে চি আই ডিয়ে ঘটনাটোৰ নিশা বিশেষ স্থানত থকা বুলি দাবী কৰা এজন সাক্ষী আৰু জোনমণিৰ বাহনত খুন্দা মৰা ট্ৰাকখনৰ চালককে ধৰি কেইবাজনো ব্যক্তিক জেৰা কৰিছিল।
আনহাতে, শনিবাৰে এই ঘটনাৰ পৰিপ্ৰেক্ষিততে নগাঁও জিলাৰ আৰক্ষী অধীক্ষক লীনা দলে আৰু লখিমপুৰ জিলাৰ আৰক্ষী অধীক্ষক বেদান্ত মাধৱ ৰাজখোৱাক বদলি কৰা হৈছে।
ইয়াৰ পূৰ্বে নগাঁও আৰু লখিমপুৰৰ চাৰিজন আৰক্ষী বিষয়াক অসম আৰক্ষীৰ মুখ্য কাৰ্যালয়ত “ক্ল’জ” কৰি ৰখা হৈছিল।
লগতে পঢ়ক: ড্ৰাগছ আসক্ত বা সৰবৰাহকাৰীৰ মৃত্যু হ’লে কবৰ দিব নোৱাৰিব; অসমৰে এক অঞ্চলৰ দৃষ্টান্তমূলক সিদ্ধান্ত
কেইবাটাও সংগঠন আৰু জোনমণি ৰাভাৰ পৰিয়ালে চিবিআইৰ তদন্তৰ বাবে চৰকাৰক আবেদন জনাইছিল।
উল্লেখ্য যে যোৱা ১৬ মে’ত উপ পৰিদৰ্শক জোনমণি ৰাভাৰ মৃত্যু হৈছিল আৰু প্ৰথম অৱস্থাত তেওঁৰ দুৰ্ঘটনাৰ ফলচে মৃত্যু হোৱা বুলি খবৰ ওলাইছিল যদিও পিছত গম পোৱা গ’ল যে তেওঁক হত্যা কৰাৰ কিছুমান সন্দেহজনক দিশ পোহৰলৈ আহিছে।