দেওবাৰে বৰষুণৰ বাবে বাতিল কৰা হয় আই পি এলৰ চূড়ান্ত খেলখন। সোমবাৰে চেন্নাই আৰু গুজৰাটৰ মাজত অনুষ্ঠিত হ’বলগীয়া খেলখন চাবলৈ বহু সংখ্যক ভাৰতীয়ই আগ্ৰহেৰে অপেক্ষা কৰি আছিল।
চেন্নাইৰ অধিনায়ক মহেন্দ্ৰ সিং ধোনীয়ে টছত জয়লাভ কৰি বল কৰাৰ সিদ্ধান্ত লয়। সময় মতে গুজৰাটৰ বেটিং শেষ হয় যদিও চেন্নাইয়ে বেটিং কৰিবলৈ ওলাই অহাৰ পিছত পুনৰ বৰষুণ দিবলৈ আৰম্ভ কৰে। এই বৰষুণ বহু সময় ধৰি দিয়ে। বৰষুণ শেষ হোৱালৈ অপেক্ষা কৰি উত্তেজিত হৈ পৰে ক্ৰিকেট প্ৰেমীসকল।
এনে উত্তেজনাৰ পৰিস্থিতিত খাদ্য যোগান কোম্পানী ‘ছুইগি’ৰ এটা টুইটক কেন্দ্ৰ কৰি ছ’চিয়েল মিডিয়াত হঠাতে হুলস্থুলৰ সৃষ্টি হয়। টুইটাৰত ছুইগিয়ে শ্বেয়াৰ কৰিলে এক বিশেষ সমীক্ষা।
সোমবাৰে নিশা ছুইগিয়ে টুইটত লিখিলে, “এতিয়ালৈকে ছুইগিৰ ইনষ্টাগ্ৰামত ২৪২৩ পেক কণ্ডম বিক্ৰী হৈছে। দেখা গৈছে যে খেলপথাৰত ২২ জনতকৈ বেছি খেলুৱৈ আছে।”
ছুইগিৰ এই টুইটে ছচিয়েল মিডিয়াত যথেষ্ট আমোদৰ সৃষ্টি কৰিছিল। পোষ্টটোৰ তলত এজন নেটিজেনে লিখিছে, “অকলে থকাসকলে কি কৰিব?” আন এজনে লিখিছে, “কিমান মানুহে খেলিছে সেয়া ডাঙৰ কথা নহয়, সত্যটো হ’ল তেওঁলোকে নিৰাপদে খেলি আছে।”
উল্লেখ্য যে চুইগি, জ’মাটৰ দৰে এই এপবোৰ দিনক দিনে জনপ্ৰিয় হৈ পৰিছে। গ্ৰাহকক যিমান পাৰি সোনকালে প্ৰয়োজনীয় বস্তু কোনে যোগান ধৰিব পাৰিব সেই লৈ এই এপসমূহৰ মাজত তীব্ৰ প্ৰতিযোগিতা চলি আছে।
