শুকুৰবাৰে দিল্লী উচ্চ ন্যায়ালয়ে পৰিয়ালৰ সদস্যৰ পৰা ভাবুকি লাভ কৰা এহাল সমলিংগ আন্তঃধৰ্মীয় দম্পতীক আৰক্ষীৰ দ্বাৰা সুৰক্ষা প্ৰদান কৰিছে।
ন্যায়াধীশ ৰজনীশ ভাটনগৰে স্থানীয় ষ্টেচন হাউছ অফিচাৰ (এছ এইচ অ’) আৰু বিট কনিষ্টবলক দম্পতীহালক তৎক্ষণাত সুৰক্ষা প্ৰদানৰ ব্যৱস্থা কৰিবলৈ নিৰ্দেশ দিছে।
ন্যায়ালয়ে আৰু কয় যে যদিহে দম্পতীহালে যদি আন কোনো থানাৰ অধিকাৰক্ষেত্ৰত ভাড়াঘৰ লয় তেন্তে এছ এইচ অ’ই সেই অঞ্চলৰ আৰক্ষী কৰ্তৃপক্ষক অৱগত কৰিব লাগিব আৰু তেওঁলোকৰ ঠিকনা দিব লাগিব যাতে তেওঁলোকক সুৰক্ষা প্ৰদান কৰিব পৰা যায়।
অধিবক্তা অৰুন্ধতী কাটজুৱে দম্পতীহালৰ হৈ ন্যায়ালয়ত যুক্তি প্ৰদৰ্শন কৰি কয় যে সমলৈংগিক দম্পতীহালৰ এজন হৈছে হিন্দু আৰু আৰু আনজন মুছলমান।
দুয়োৰে বয়স ১৮ বছৰৰ ওপৰৰ আৰু একেলগে থাকিব বিচাৰে যদিও হিন্দু যুৱতীগৰাকীৰ পৰিয়ালৰ লোকৰ পৰা দম্পতীহালে ভাবুকিৰ সন্মুখীন হৈছে বুলি অধিবক্তা কাটজুৱে ন্যায়ালয়ৰ মজিয়াত কয়। তেওঁ লগতে কয় যে দম্পতীহালৰ লগতে মুছলমান যুৱতীগৰাকীৰ পৰিয়ালৰ সদস্যসকলৰ বাবেও এই সুৰক্ষাৰ প্ৰয়োজন।
আৱেদনকাৰীৰ মতে, হিন্দু যুৱতীগৰাকীৰ পৰিয়ালে তেওঁলোকৰ সম্পৰ্কৰ বিৰোধী আৰু যুৱতীগৰাকীৰ ইচ্ছাৰ বিৰুদ্ধে যুৱকক বিয়া কৰাবলৈ হেঁচা প্ৰদান কৰি আহিছে। পৰিয়ালৰ লোকে যুৱতীগৰাকীক বলপূৰ্বকভাৱে উত্তৰ প্ৰদেশলৈ লৈ যায় যদিও পাছত দিল্লী মহিলা আয়োগৰ হস্তক্ষেপতহে উদ্ধাৰ কৰা হয়।
ইফালে হিন্দু যুৱতীগৰাকীৰ পৰিয়ালটোৱে মুছলমান যুৱতীগৰাকীৰ বিৰুদ্ধে তেওঁলোকৰ কন্যাক ধৰ্মান্তৰকৰণৰ অভিযোগ উত্থাপন কৰিছে।
বৰ্তমান এই দম্পতীহালে দিল্লীৰ এটা আশ্ৰয় গৃহত বাস কৰা বুলি জানিব পৰা গৈছে।
দিল্লী উচ্চ ন্যায়ালয়ৰ আইনী সেৱা সমিতিৰ জৰিয়তে আদালতৰ কাষ চাপিছিল দম্পতীহালে। তেওঁলোকৰ হৈ অধিবক্তা অৰুন্ধতী কটজু, শ্ৰীস্তি বৰঠাকুৰ আৰু ঋতিকা মীনা উপস্থিত হয়।
