কৰ্ণাটক চৰকাৰে ২০১৯ চনত শিশুৰ স্কুলবেগৰ ওজন সন্দৰ্ভত গাইডলাইন জাৰি কৰিছিল। বুধবাৰেও পুনৰ সেই একেটা নিৰ্দেশনা জাৰি কৰা হয়। ৰাজ্য চৰকাৰে ব্লক পৰ্যায়ৰ সকলো শিক্ষা বিষয়াক কঠোৰভাৱে এই নিৰ্দেশনা পালন কৰিবলৈ নিৰ্দেশ দিছে।
স্কুলবেগৰ অতিৰিক্ত ওজনে ছাত্ৰ-ছাত্ৰীৰ স্বাস্থ্যৰ ওপৰত প্ৰভাৱ পেলায়। যাৰ ফলত তেওঁলোকৰ সৰুৰে পৰাই ভেৰ্টিগো আৰু অন্যান্য শাৰীৰিক সমস্যা দেখা দিয়ে। সেই কাৰণেই কৰ্ণাটক চৰকাৰে ড° ভি পি নিৰঞ্জনাৰাধিৰ পৰামৰ্শ মতে এখন সমিতি গঠন কৰিছিল।
লগতে পঢ়ক: গুৱাহাটীত “প্ৰযুক্তি: শৈক্ষিক আৰু অৰ্থনৈতিক লক্ষ্য পুনৰ গঠন” বিষয়ক দুদিনীয়া ৰাষ্ট্ৰীয় আলোচনা চক্ৰ
স্কুলবেগৰ ওজনৰ বিষয়ত বিভিন্ন পৰ্যবেক্ষণৰ অন্তত ২০১৮-২০১৯ বৰ্ষৰ ভিতৰত কমিটীয়ে প্ৰতিবেদন দাখিল কৰে। ২০১৯ চনত কৰ্ণাটক চৰকাৰে সকলো বিদ্যালয়লৈ নিৰ্দেশ জাৰি কৰিছিল যে স্কুলবেগৰ ওজন ছাত্ৰজনৰ ওজনৰ দহ শতাংশতকৈ বেছি হ’ব নালাগে।
এইবাৰ সেই কথা বিবেচনা কৰি পুনৰ নিৰ্দেশনা জাৰি কৰা হৈছে। নতুন নিৰ্দেশনা অনুসৰি স্কুল বেগৰ সৰ্বোচ্চ ওজন ছাত্ৰজনৰ ওজনৰ পোন্ধৰ শতাংশতকৈ অধিক হ’ব নালাগে।
সেই অনুসৰি, প্ৰথম শ্ৰেণীৰ পৰা দ্বিতীয় শ্ৰেণীৰ বাবে বেগৰ ওজন ডেৰ কিলোগ্ৰামৰ পৰা দুই কিলোগ্ৰাম, তৃতীয় শ্ৰেণীৰ পৰা পঞ্চম শ্ৰেণীৰ বাবে দুইৰ পৰা তিনি কিলোগ্ৰাম, ষষ্ঠ শ্ৰেণীৰ পৰা অষ্টম শ্ৰেণীৰ বাবে তিনিৰ পৰা চাৰি কিলোগ্ৰাম আৰু নৱম শ্ৰেণীৰ পৰা দশম শ্ৰেণীৰ বাবে চাৰিৰ পৰা পাঁচ কিলোগ্ৰামৰ ভিতৰত হ’ব লাগে।
লগতে পঢ়ক: ক্লিন ব’ল্ড হৈ ক্ষুব্ধ বেটাৰ, ১৪ বছৰীয়া বলাৰক ডিঙি চেপি হত্যা কৰি পেলালে ১৭ বছৰীয়া কিশোৰে!
নিৰ্দেশনাত উল্লেখ আছে যে বিদ্যালয়সমূহে যাতে সপ্তাহত এবাৰ বা শনিবাৰে ‘নো বেগ ডে’ উদযাপন কৰে।
চলিত বৰ্ষৰ এপ্ৰিল মাহত ব্যুৰো অৱ ইণ্ডিয়ান ষ্টেণ্ডাৰ্ডে ঘোষণা কৰিছিল যে এই পদক্ষেপে ছাত্ৰ-ছাত্ৰীসকলে স্কুল বেগ ওজনৰ সমস্যা সমাধান কৰাত সহায় কৰিব। বিআইএছৰ সঞ্চালক প্ৰধানেও কয় যে সংস্থাটোৰ ফালৰ পৰা এই বিষয়ত অতি শীঘ্ৰে গৱেষণা আৰম্ভ কৰা হ’ব।
