মাত্ৰ ডেৰশ মিটাৰ দৈৰ্ঘ্যৰ এটা গ্ৰাম্য উপ পথৰ উন্নীতকৰণৰ বাবে বছৰ বছৰ ধৰি হাহাকাৰ কৰি আহিছে বোকাখাতৰ এখন গাঁৱৰ বাসিন্দাই।
কৃষিমন্ত্ৰী অতুল বৰাৰ গৃহ সমষ্টি বোকাখাতৰ ঐতিহাসিক কুৰুৱাবাহীৰ পুৰণা সত্ৰ (স্থানীয় ভাবে ৰাধাচুক বুলি পৰিচিত) নামৰ গাঁৱখনৰ ৰাইজে এটা সুচল পথৰ বাবে দীৰ্ঘদিনৰ পৰাই কৰি আহিছে হাহাকাৰ ।
উল্লেখযোগ্য যে বিগত সময়চোৱাত সমষ্টিটোৰ পৰা নিৰ্বাচিত বিভিন্ন ৰাজনৈতিক দলৰ কেইবাগৰাকীও বিধায়কে কাৰ্যকাল সমাপন কৰি গ’ল যদিও কোনো এগৰাকী বিধায়কেও আগ্ৰহ প্ৰকাশ নকৰিলে ঐতিহাসিক ঠাইখনৰ মাত্ৰ ডেৰশ মিটাৰ পথটোৰ মেৰামতি বা নতুনকৈ নিৰ্মান কৰি উলিওৱাৰ ক্ষেত্ৰত। লক্ষণীয়ভাৱে নিৰ্বাচিত প্ৰতি গৰাকী বিধায়কৰ কেৱল প্ৰতিশ্ৰুতিতে বন্দী হৈ থাকিল গাঁৱবাসীৰ এটা উন্নত যাতায়তৰ সপোন।
ইফালে আঞ্চলিকতাবাদৰ সহানুভূতি লৈ ২০১৬ চনত ৰাইজৰ প্ৰতিটো সমস্যা সমাধানৰ প্ৰতিশ্ৰুতিৰে বোকাখাত বিধান সভা সমষ্টিলৈ নিৰ্বাচিত হৈ অহা বৰ্তমানৰ জেষ্ঠ কেবিনেট মন্ত্ৰী অতুল বৰায়ো গাওঁ বাসীৰ সমস্যা সমাধানৰ প্ৰতি নেদেখুৱালে কোনো বিশেষ তৎপৰতা। কেৱল নামতহে আঞ্চলিকতাবাদীৰ মোহৰ লগাই ফুৰা অগপ সভাপতি তথা মন্ত্ৰী অতুল বৰাই দুটাকৈ কাৰ্যকালত বোকাখাত বিধান সভা সমষ্টিৰ উন্নয়ণৰ ক্ষেত্ৰত প্ৰকৃততে কি কৰি আছে সেয়া স্পষ্ট হৈছে ইতিমধ্যে সমষ্টিটোৰ গ্ৰামাঞ্চলত সঘনাই হৈ থকা জনসাধাৰণৰ প্ৰতিৰোধ আৰু প্ৰতিবাদী কাৰ্যসূচীবোৰতেই।
তাৎপৰ্যপূৰ্ণ কথা যে আধাৰশিলাৰ ৰাজনীতিৰে সমষ্টিত চমক দি ধনবল,বাহুবলৰে দুবাৰকৈ বিধায়ক পদ দখল কৰা মন্ত্ৰী অতুল বৰাৰ কাৰ্যকালতে ২০১৭ চনত পথচোৱাত এটি আধাৰশিলা স্থাপন কৰি ৭,৫২,০২০ টকাৰ এটি আঁচনি মুকলি কৰা হৈছিল যদিও কাৰ্যক্ষেত্ৰত মন্ত্ৰী গৰাকীৰ ঘনিষ্ঠ ঠিকাদাৰজনে মাত্ৰ দুগাড়ী শিলগুটি পেলাইয়েই দায়িত্ব সামৰিছিল পথচোৱাৰ নিৰ্মাণৰ কাম।আৰু তাৰেই সাক্ষী হৈ আজিও হাবি জংঘলৰ মাজত পৰি আছে “উন্নয়ণৰ আধাৰশিলা”। যাৰ পৰিণতিত বাৰিষা হ’লেই বোকা-পানীৰে পৰিপূৰ্ণ গেলা নৰ্দমাসদৃশ হৈ পৰা উক্ত ডেৰশ মিটাৰৰ পথটোৰেই দৈনন্দিন যাতায়ত কৰি আহিছে গাওঁখনৰ ৰোগী, প্ৰসূতি,বৃদ্ধকে আদি কৰি স্কুলীয়া ছাত্ৰ-ছাত্ৰী তথা গাওঁবাসীয়ে।
স্থানীয় ৰাইজৰ অভিযোগ -সমস্যা সম্পৰ্কে সংশ্লিষ্ট বিভাগৰ লগতে কাষতে থকা কুৰুৱাবাহী গাওঁ পঞ্চায়তক অৱগত কৰাৰ পাছতো পথচোৱাৰ মেৰামতিৰ ক্ষেত্ৰত ব্যৱস্থা গ্ৰহন নকৰিলে কোনেও।
শেহতীয়াকৈ যোৱা দেওবাৰে গাঁৱখনত উপস্থিত হয়গৈ অনুসূচিত জাতি ছাত্ৰ সন্থাৰ গোলাঘাট জিলা সমিতিৰ এটা দল। জিলা উপ সভাপতি ৰাহুল দাসৰ নেতৃত্বত যোৱা সংগঠনটোৰ বিষয়ববীয়া সকলে গাওঁ বাসীয়ে ভুগী অহা সমস্যাৰ বাবে সংশ্লিষ্ট বিভাগৰ লগতে স্থানীয় বিধায়কক দোষাৰোপ কৰাৰ লগতে পথচোৱাৰ শীঘ্ৰেই মেৰামতি বা নতুনকৈ নিৰ্মানৰ বাবে দাবী জনাইছে সংশ্লিষ্ট বিভাগৰ লগতে বোকাখাতৰ বিধায়ক অতুল বৰাক।
