সৰু-সুৰা অপৰাধ কৰিলে অপৰাধীজন এতিয়াৰ পৰা আৰু জেললৈ যাব লগা নহ’ব। অৱশ্যে অপৰাধৰ মূল্য ঠিকেই ভৰিব লগা হ’ব। এই ক্ষেত্ৰত অপৰাধীক জৰিমনা বিহা হ’ব। কেন্দ্ৰীয় চৰকাৰে এনে এক বিধেয়ক আনিবলৈ গৈ আছে।
জানিব পৰা মতে, কেন্দ্ৰীয় চৰকাৰে ‘জনবিশ্বাস’ নামৰ এই বিধেয়কৰ জৰিয়তে মুঠ ৪২খন আইন সংশোধন কৰিব বিচাৰিছে। এই বিধেয়কখনত কোৱা হৈছে যে সৰু-সুৰা অপৰাধৰ ক্ষেত্ৰত কাৰাদণ্ডৰ পৰিৱৰ্তে জৰিমনা বিহা হ’ব। এই নতুন বিধেয়ক কাৰ্যকৰী হ’লে দেশত জমা হোৱা গোচৰৰ সংখ্যাৰ চাপ চম্ভালিব পৰা যাব।
উল্লেখ্য যে এই জনবিশ্বাস বিধেয়কখন যোৱা বছৰো সংসদত দাখিল কৰা হৈছিল। পিছত বিধেয়কখন যুটীয়া সংসদীয় সমিতিলৈ প্ৰেৰণ কৰা হয়। বিধেয়ক সন্দৰ্ভত কেন্দ্ৰৰ বক্তব্য, চৰকাৰে দেশৰ জনসাধাৰণৰ ওপৰত নিৰ্ভৰ কৰি সৰু-সুৰা অপৰাধৰ কাৰাদণ্ডৰ ব্যৱস্থা আঁতৰাব বিচাৰিছে। কিন্তু এই পৰিস্থিতিত শাস্তিৰ বাবে জৰিমনা বিধান ৰখা হয় যাতে অপৰাধীয়ে পুনৰ অপৰাধ সংঘটিত নকৰে।
লগতে পঢ়ক: কি নাম এই সম্পৰ্কৰ! সদায় কাজিয়া, ১০বছৰত পত্নীয়ে ৭বাৰ জেলত পঠিয়ালে স্বামীক; মুকলি কৰিও আনিলে নিজেই
কিন্তু সংসদীয় সমিতিৰ বহু সদস্যই এই জনবিশ্বাস বিধেয়কখনৰ বিৰোধিতা কৰে। এনে পৰিস্থিতিত পুনৰ সংশোধন কৰা হৈছে জনবিশ্বাস বিধেয়ক। শেহতীয়াকৈ ইয়াক কেন্দ্ৰীয় মন্ত্ৰীসভাই অনুমোদন জনাইছে। এনে পৰিস্থিতিত আগন্তুক অধিৱেশনত সংসদত নতুনকৈ বিধেয়কখন দাখিল হ’ব পাৰে।
অৱশ্যে ইয়াৰ ওপৰত বিৰোধীৰ আপত্তি আছে। তেওঁলোকৰ মতে কাৰাগাৰৰ ব্যৱস্থা আঁতৰাই দিলে অপৰাধীৰ মাজত কোনো ভয় নাথাকিব। ইফালে চৰকাৰে কয় যে যুটীয়া সংসদীয় সমিতিৰ মতামত লৈ জনবিশ্বাস বিধেয়কখন সংশোধন কৰা হৈছে। সংসদত দাখিল কৰা হ’ব সংশোধিত বিধেয়কখন।
ইয়াৰ পূৰ্বে যোৱা বছৰৰ ডিচেম্বৰ মাহত সংসদত বিধেয়কখন দাখিল কৰাৰ সময়ত কেন্দ্ৰীয় মন্ত্ৰী পীয়ুষ গোৱালে কৈছিল, ‘যিসকলে সৰু সুৰা ভুল কৰে তেওঁলোকক আদালতলৈ প্ৰেৰণ কৰা উচিত নহয়। তেওঁলোকক জৰিমনা বিহা উচিত। কিন্তু তেওঁলোকক আইনী মেৰপেচত সুমোওৱা উচিত নহয়। আমি বিশ্বাস কৰোঁ যে জনসাধাৰণৰ আস্থা আৰু ব্যৱসায়ীসকলৰ আস্থা অতি গুৰুত্বপূৰ্ণ। সেইদৰে, এই বিধেয়কখনে আদালতৰ ওপৰতো বোজা হ্ৰাস কৰিব।’
লগতে পঢ়ক: কেবিনেট সিদ্ধান্ত: উচ্চ শিক্ষাত অ’বি চিৰ বাবে সংৰক্ষিত আসন ১৫ শতাংশৰ পৰা ২৭ শতাংশলৈ বৃদ্ধি
কিন্তু বিৰোধীৰ যুক্তি হ’ল যে এই বিধেয়ক কাৰ্যকৰী হ’লে আদালত আৰু ন্যায় ব্যৱস্থাৰ কি হ’ব? অপৰাধীৰ দোষ ক’ত প্ৰমাণিত হ’ব? তেতিয়া যিকোনো ব্যক্তিক ন্যায় বহিৰ্ভূতভাৱে দোষী সাব্যস্ত কৰি জৰিমনা বিহা হ’ব পাৰে।
