বোকাখাতৰ ডিফলু নৈত গা ধুবলৈ গৈ নিখোজ হৈ পৰিছে এগৰাকী ৫০উৰ্ধৰ শ্ৰমিক মহিলা। পানীৰ কোবাল সোঁতত নিৰুদ্দিষ্ট হৈ পৰা মহিলাগৰাকী ডিফলু চাহ বাগিচাৰ নিৱাসী শ্ৰমিক মালতী ঘটোৱাল বুলি চিনাক্ত কৰা হৈছে।
জানিব পৰা মতে, মহিলা গৰাকীয়ে পুৱা প্ৰায় ১০:৩০ বজাত ঘৰৰ কাষৰে বৈ যোৱা ডিফলু নৈত গা ধুবলৈ নামোতেই উটুৱাই নিয়ে নৈৰ কোবাল সোঁতে।
ইফালে ঘটনাৰ পিছতেই নৈৰ কাষত ভিৰ কৰিছেহি কেইবাশতাধিক লোকে। মহিলা গৰাকীক বিচাৰি স্থানীয় লোকে অনুসন্ধান অব্যাহত ৰখাৰ লগতে খৱৰ দিয়ে আৰক্ষী আৰু SDRF বিভাগক।
ইয়াৰ পিছতে আৰক্ষীৰ লগতে এচ ডি আৰ এফ বিভাগ ঘটনাস্থলীত উপস্থিত হৈ মহিলা গৰাকীৰ সন্ধানত অভিযান আৰম্ভ কৰে। নিখোজ মহিলাগৰাকীৰ সন্ধানত এতিয়াও অব্যাহত আছে অভিযান।
লক্ষণীয় কথা যে ইয়াৰ পূৰ্বেও কেইবাগৰাকীও পুৰুষ মহিলাৰ লগতে এগৰাকী কম বয়সীয়া কিশোৰেও উক্ত নৈখনত সলিল সমাধি ঘটাৰ ঘটনা সংঘটিত হৈ অহাৰ পিছতো সতৰ্ক হোৱা নাই স্থানীয় একাংশ লোক।
এনে অসতৰ্কতাৰ বাবেই আজি পুনৰ অনুৰূপ শোকাৱহ ঘটনাৰ পুনৰাবৃত্তি হোৱা বুলি দুখ প্ৰকাশ কৰিছে একাংশ স্থানীয় সচেতন লোকে।
উল্লেখযোগ্য যে বোকাখাতৰ দক্ষিন দিশে থকা কাৰ্বি পাহাৰৰ পৰা বৈ অহা জলধাৰাই বাৰিষা হ’লেই অস্বাভাৱিক ভাৱে বৃদ্ধি কৰে নৈখনৰ জলপৃষ্ঠ, লগতে বাৰিষা হ’লে ৰুদ্ৰমুৰ্তি ধাৰণ কৰা নৈখনত বিভিন্ন সময়ত সংঘটিত হৈ আহিছে সলীল সমাধিৰ ঘটনা।
