কেইবাগৰাকীও মহিলা মল্লযুঁজাৰুক যৌন নিৰ্যাতন চলোৱাৰ অভিযোগত অভিযুক্ত তথা দেশৰ তাৰকা মল্লযুঁজাৰুসকলৰ আন্দোলনৰ পিছত আইনী বিচাৰৰ অধীনলৈ অহা ভাৰতীয় মল্লযুঁজ ফেডাৰেচনৰ বিদায়ী মুৰব্বী, বিজেপিৰ সাংসদ ব্রিজ ভূষণ শৰণ সিঙে আজি দিল্লীৰ ৰাউছ এভিনিউ আদালতৰ পৰা দুদিনৰ বাবে অন্তৱৰ্তীকালীন জামিন লাভ কৰে।
অহা ২০ জুলাইৰ নিশা ১২:৩০ বজাত উক্ত আদালততে ব্রিজ ভূষণৰ জামিনৰ বাবে পৰৱৰ্তী শুনানি অনুষ্ঠিত হ’ব। দিল্লী আৰক্ষীয়ে আজি আদালতত অভিযুক্ত ব্ৰিজ ভূষণে গোচৰৰ সৈতে জড়িত কোনো সাক্ষীক সাক্ষাৎ কৰা নাই বুলি নিশ্চিতি দিয়াৰ পিছত জামিন মঞ্জুৰ কৰে আদালতে।
ভাৰতীয় মল্লযুঁজ ফেডাৰেচনৰ নিলম্বিত সহকাৰী সম্পাদক বিনোদ টোমৰকো আজি আদালতে জামিন প্ৰদান কৰে। জামিন বণ্ড হিচাপে ব্রিজ ভূষণ সিঙক ২৫ হাজাৰ টকা প্রদান কৰিবলৈ আদালতে নিৰ্দেশ দিয়ে৷ ইফালে সিঙৰ অধিবক্তাই আদালতত মিডিয়া ট্ৰায়েলৰ অভিযোগ উত্থাপন কৰে।
সিঙৰ এই অভিযোগৰ পিছত বিচাৰপীঠে উচ্চ ন্যায়ালয় বা বিচাৰ আদালতৰ সন্মুখত সিঙে এই সন্দৰ্ভত আবেদন দাখিল কৰিব পাৰে বুলি উল্লেখ কৰে আৰু এই আবেদন সন্দৰ্ভত আদালতে উপযুক্ত আদেশ প্ৰদান কৰিব বুলি জানিবলৈ দিয়ে। অৱশ্যে এই সন্দৰ্ভত কোনো আবেদন দাখিল কৰা নাই সিঙে।
আনহাতে ব্রিজ ভূষণ শৰণ সিঙৰ বিৰুদ্ধে উত্থাপিত যৌন নিৰ্যাতনৰ অভিযোগৰ তদন্ত কৰা তদাৰকী পেনেল সন্দৰ্ভত প্রশ্ন উত্থাপন কৰিছে মহিলা মল্লযুঁজাৰুসকলে। পেনেলে ব্ৰিজ ভূষণৰ প্রতি পক্ষপাতিত্ব কৰা বুলি মল্লযুঁজাৰুসকলে অভিযোগ উত্থাপন কৰিছে৷
ভাৰতীয় কিংবদন্তি বক্সাৰ এম চি মেৰী কমৰ নেতৃত্বত চৰকাৰে গঠন কৰা ছয়জনীয়া পেনেলে চৰকাৰক প্ৰতিবেদন দাখিল কৰিছিল যদিও পেনেলৰ এই প্ৰতিবেদন ৰাজহুৱা কৰা হোৱা নাছিল। এই লৈ ক্ষোভ প্ৰকাশ কৰিছে ব্ৰিজ ভূষণৰ বিৰুদ্ধে আন্দোলনত নমা মল্লযুঁজাৰুসকলে।
উল্লেখ্য যে, দিল্লী আৰক্ষীয়ে শতাধিক লোকক সোধা-পোছা কৰাকে ধৰি বিশদ তদন্তৰ অন্তত ফেডাৰেচনৰ মুৰব্বীগৰাকীৰ বিৰুদ্ধে ১০০০ পৃষ্ঠাৰ অভিযোগনামা দাখিল কৰিছে বুলি জানিব পৰা গৈছে। মল্লযুঁজাৰুসকলৰ সপক্ষত সাতগৰাকী সাক্ষীয়ে সাক্ষ্য প্ৰদান কৰা বুলি উল্লেখ কৰি আৰক্ষীৰ সূত্ৰই অভিযুক্তক শাস্তি দিবলৈ চেষ্টা কৰিবলৈ প্ৰমাণ যথেষ্ট বুলিও সদৰী কৰিছিল।
দিল্লী আৰক্ষীয়ে যোৱা ১৫ জুনত অভিযুক্ত ব্ৰিজ ভূষণৰ বিৰুদ্ধে ভাৰতীয় দণ্ডবিধিৰ ধাৰা ৩৫৪, ৩৫৪এ, ৩৫৪ডি, ৫০৬ৰ অধীনত অভিযোগনামা দাখিল কৰিছিল। আনহাতে ধাৰা ১০৯, ৩৫৪, ৩৫৪এ আৰু ৫০৬ৰ অধীনত টোমৰৰ বিৰুদ্ধে অভিযোগনামা দাখিল কৰিছিল আৰক্ষীয়ে।
