দীৰ্ঘদিন ধৰি গোষ্ঠীগত সংঘৰ্ষই মণিপুৰ অশান্ত কৰি ৰখাৰ মাজতে শেহতীয়াকৈ দুগৰাকী মহিলাক গণ ধৰ্ষণৰ পিছত নগ্ন কৰি ৰাজপথেৰে লৈ যোৱা ঘটনাত তীব্ৰ প্ৰতিক্ৰিয়া প্ৰকাশ কৰিছে আম আদমি পাৰ্টীয়ে।
এই অমানুষিক নির্যানতৰ বিৰুদ্ধে আজি সামাজিক মাধ্যমত বিজেপি চৰকাৰে সংঘৰ্ষ দমন কৰাত সম্পূর্ণ ব্যর্থ হোৱাৰ প্ৰতিবাদত ‘মণিপুৰক বচাওক’ শীৰ্ষক ব্যাপক ট্ৰেণ্ডিং অভিযান আৰম্ভ কৰে।
এই সম্পৰ্কে সভাপতি ডাঃ ভবেন চৌধুৰীয়ে কয় যে – ৩০০ৰো অধিক লোকৰ মৃত্যু, ১ লাখৰো অধিক লোক গৃহহীন, হাজাৰ হাজৰ সেনা আৰক্ষীয়েও নিয়ন্ত্ৰণ কৰিব নোৱাৰা পৰিস্থিতিত আজি ৭৮ দিন পিছত প্ৰধানমন্ত্ৰীয়ে মণিপুৰ প্ৰসংগত মুখ খুলিছে। তেওঁৰ দীৰ্ঘদিনৰ নীৰৱতালৈ চাই মণিপুৰবাসীয়ে য’তে আছে তাৰে পৰাই প্ৰধানমন্ত্ৰীক বিহীত ব্যৱস্থা ল’বলৈ কাতৰ অনুৰোধ কৰি আহিছিল। আজি মণিপুৰৰ ঘটনাই লজ্জিত কৰিছে সমগ্র দেশবাসীক। অমৃত কালত অষ্টলক্ষ্মীৰ দেশত নাৰীৰ সন্মান মুকলিকৈ নিলাম হৈছে। মহিলা, যুৱতীক বিব্ৰক্ত কৰি ৰাজপথৰ জন্তু জানোৱাৰতকৈ অধমভাৱে ভাষাহীন নির্যাতন চলোৱা হৈছে। মণিপুৰক বচোৱাৰ বাবে কেন্দ্ৰীয় চৰকাৰে বৰ্তমান সময়ত খৰতকীয়াভাৱে আইন-শৃংখলা ব্যৱস্থা উন্নত কৰাৰ প্ৰয়োজন আছে।
আপৰ সামাজিক মাধ্যমৰ সমন্বয়ক তাৰিক চৌধুৰীৰ নেতৃত্বত চলা টেণ্ডিং অভিযানত ‘মণিপুৰক ৰক্ষা কৰক’, ‘মণিপুৰলৈ শান্তি ঘূৰাই আনক’, ‘মণিপুৰত মহিলাক নিৰ্যাতন বন্ধ কৰক’ আদি শ্লোগানেৰে প্ৰধানমন্ত্ৰীক আৰু গৃহমন্ত্ৰীক মহিলাৰ ওপৰত চলা অত্যাচাৰৰ বিৰুদ্ধে কঠোৰ পদক্ষেপ গ্ৰহণ কৰিবলৈ আহ্বান জনায়।
বৃহস্পতি বাৰে দিনৰ ২ বজাৰ পৰা এই ট্ৰেণ্ডিং অভিযান আহ্বান কৰে দলটোৱে। ইতিমধ্যে এই ট্ৰেণ্ডিঙে বিশেষ চৰ্চা লাভ কৰা দেখা গৈছে বুলি মন্তব্য প্ৰকাশ কৰে তাৰিক চৌধুৰীয়ে।
