দক্ষিণ-পূব ইউক্ৰেইনৰ জাপোৰিজ্জিয়া অঞ্চলত ফ্ৰণ্টলাইন যুদ্ধক্ষেত্ৰৰ সমীপত এজন ৰাছিয়ান সাংবাদিক নিহত হয়। আহত হয় আন তিনিজন সাংবাদিক। ৰাছিয়াৰ প্ৰতিৰক্ষা মন্ত্ৰালয়ে প্ৰকাশ কৰা অনুসৰি শনিবাৰে ইউক্ৰেইনৰ আক্ৰমণত এই ঘটনা সংঘটিত হৈছে।
ৰাছিয়াৰ প্ৰতিৰক্ষা মন্ত্ৰালয়ে অভিযোগ উত্থাপন কৰিছে যে এই আক্ৰমণত ইউক্ৰেইনে এই মাহত আমেৰিকাই যোগান ধৰা ক্লাষ্টাৰ বোমা ব্যৱহাৰ কৰিছিল।
লগতে পঢ়ক: হিংসাৰ পৰা ৰক্ষা নপৰিল স্বাধীনতা সংগ্ৰামীৰ ঘৰো; জীৱন্তে জ্বলাই দিয়া হৈছে তেওঁৰ পত্নীক
নিহত সাংবাদিক ৰষ্টিস্লাভ জুৰাভলেভ আছিল ৰাছিয়াৰ আৰ আই এ সংবাদ সংস্থাৰ যুদ্ধ সংবাদদাতা। ৰাছিয়াৰ প্ৰতিৰক্ষা মন্ত্ৰালয়ে জনোৱা মতে, এই আক্ৰমণত ৰষ্টিস্লাভকে ধৰি চাৰিজন সাংবাদিক আহত হৈছিল। তেওঁলোকক উদ্ধাৰ কৰাৰ সময়তে মৃত্যু হয় ৰষ্টিস্লাভৰ।
ৰাছিয়াৰ সেনাই এক বিবৃতিত প্ৰকাশ কৰিছে যে ইউক্ৰেইনৰ বাহিনীয়ে ক্লাষ্টাৰ বোমা ব্যৱহাৰ কৰি আক্ৰমণ চলোৱাত চাৰিজন সাংবাদিক আহত হৈছে। তাৰে এজনৰ মৃত্যু হয়। বাকীসকলৰ আঘাত ‘কিছু গুৰুতৰ’ যদিও সংকটমুক্ত।
এই ঘটনাক লৈ মস্কোৱে তীব্ৰ প্ৰতিক্ৰিয়া প্ৰকাশ কৰিছে। ৰাষ্ট্ৰসংঘত ৰাছিয়াৰ উপ-ৰাজদূত ডিমিত্ৰী পলিয়ানস্কিয়ে কয় যে এই আক্ৰমণে চূড়ান্ত নৈতিক সীমা অতিক্ৰম কৰিছে। ৰাছিয়ান ফেডাৰেচন কাউন্সিলৰ উপ-সভাপতি কনষ্টেণ্টিন কোছাচেভে কয় যে কিয়েভ আৰু ৱাশ্বিংটন এই আক্ৰমণৰ বাবে সমানে দায়ী।
লগতে পঢ়ক: ”আমি চোৰ ধৰো আৰু তেওঁলোকে উৎকোচ লৈ মুকলি কৰি দিয়ে’’- ঘাইপথত শুই প্ৰতিবাদ হোমগাৰ্ডৰ
ৰাছিয়াৰ বৈদেশিক মন্ত্ৰালয়ে কয় যে ৰষ্টিস্লাভৰ মৃত্যু পশ্চিমীয়া শক্তি আৰু কিয়েভে সংঘটিত কৰা এক “ঘৃণনীয়, পূৰ্ব পৰিকল্পিত অপৰাধ”। সকলো দিশে এই কথাটোকে আঙুলিয়াই দিয়ে যে সাংবাদিক দলটোৰ ওপৰত হোৱা আক্ৰমণ আকস্মিক নাছিল।
কিন্তু এই ঘটনাত কিয়েভৰ পৰা কোনো তাৎক্ষণিক সঁহাৰি পোৱা হোৱা নাই।
