প্ৰায় তিনিমাহ ধৰি অশান্ত হৈ আছে মণিপুৰ। সংঘটিত হৈছে নানা অমানুষিক হিংসাত্মক কাণ্ড, প্ৰাণঘাটি হৈছে শতাধিক লোকৰ। ৰাজ্যখনৰ এই অগ্নিগৰ্ভৰ পৰিস্থিতি ৰাষ্ট্ৰীয় উদ্বেগ হৈ পৰিছে। কিন্তু তাৰ পিছতো নিৰুদ্বেগ প্ৰধানমন্ত্ৰী মোদীৰ লগতে কেন্দ্ৰীয় চৰকাৰ।
মণিপুৰৰ এই ভয়াৱহ সমস্যা সন্দৰ্ভত প্ৰধানমন্ত্ৰী মোদীক সংসদত মৌনতা ভংগ কৰিবলৈ দাবী তুলি আহিছে বিৰোধীয়ে। মণিপুৰৰ পৰিস্থিতি সন্দৰ্ভত সংসদত প্ৰধানমন্ত্ৰী মোদীৰ বক্তব্যৰ দাবীৰে আজি বিৰোধী মিত্ৰজোঁট INDIA-ই ৰাষ্ট্ৰপতি দ্ৰৌপদী মুৰ্মুক সাক্ষাৎ কৰি এখন স্মাৰক পত্ৰ দাখিল কৰে।
লগতে ৰাজ্যখনত শান্তি ঘূৰাই অনাৰ স্বাৰ্থত প্ৰধানমন্ত্ৰীক সংঘৰ্ষজৰ্জৰ মণিপুৰ ভ্ৰমণ কৰিবলৈও দাবী জনায় INDIA- ই। ৰাষ্ট্ৰপতিলৈ দাখিল কৰা স্মাৰক পত্ৰখনত বিৰোধী মিত্ৰজোঁটৰ ৩১ গৰাকী নেতাই লগতে হাৰিয়ানাৰ নুহত অব্যাহত থকা সাম্প্ৰদায়িক সংঘাতৰ বিষয়েও উত্থাপন কৰে।
প্ৰধানমন্ত্ৰীৰ কাৰ্যালয়ৰ পৰা মাত্ৰ ১০০ কিলোমিটাৰ দূৰত্বত সংঘটিত হোৱা এই ঘটনাক লৈও কেন্দ্ৰীয় চৰকাৰ চিন্তিত নহয় বুলি বিৰোধীয়ে অভিযোগ কৰে। ৰাষ্ট্ৰপতি মুৰ্মুক সাক্ষাৎ কৰাৰ পিছতে INDIA- ৰ অন্যতম প্ৰধান অংগ কংগ্ৰেছৰ সভাপতি মল্লিকাৰ্জুন খৰ্গেই সংবাদ মাধ্যমক সম্বোধন কৰে।
শেহতীয়াকৈ মণিপুৰ ভ্ৰমণ কৰা INDIA- ৰ অন্তৰ্ভুক্ত সাংসদসকলো প্ৰতিনিধি দলটোত আছিল বুলি উল্লেখ কৰি খৰ্গেই এই সাংসকসকলে ৰাজ্যখনৰ পৰিস্থিতিৰ বিষয়ে ৰাষ্ট্ৰপতিক অৱগত কৰে বুলি সংবাদ মাধ্যমৰ আগত জানিবলৈ দিয়ে।
বিৰোধী প্ৰতিনিধি দলটোৱে স্মাৰকপত্ৰখনত ৰাষ্ট্ৰপতি মুৰ্মুক মণিপুৰৰ সাম্প্ৰতিক পৰিস্থিতি সন্দৰ্ভত প্ৰধানমন্ত্ৰীক জৰুৰীভাৱে সংসদত ভাষণ দিবলৈ হেঁচা প্ৰয়োগ কৰাৰ বাবে আহ্বান জনায় আৰু তাৰ পিছত এই বিষয়ত বিস্তৃত আলোচনা হ’ব বুলি উল্লেখ কৰে।
INDIA- ৰ প্ৰতিনিধি দলটোৱে লগতে ৰাষ্ট্ৰপতি দ্ৰৌপদী মুৰ্মুক পৃথক পৃথক সম্প্ৰদায়ৰ দুগৰাকী মণিপুৰী মহিলাক ৰাজ্যসভালৈ মনোনীত কৰিবলৈও পৰামৰ্শ আগবঢ়ায়।
