তিনিচুকীয়া জিলাৰ বদৌচা সমন্বয় ক্ষেত্ৰত আজি সদৌ অসম মৰাণ ছাত্ৰ সন্থাই মুখ্য মন্ত্ৰী সৰ্বানন্দ সোণোৱালক বদৌচা সমন্বয় বঁটা প্ৰদান কৰে।
মৰাণ ছাত্ৰ সন্থাৰ সোণালী জয়ন্তী মহোৎসৱ উপলক্ষে আয়োজিত এই অনুষ্ঠানত বঁটা গ্ৰহণ কৰি মুখ্য মন্ত্ৰীয়ে কয়, ‘আমাৰ পূৰ্বপুৰুষে প্ৰতিষ্ঠা কৰি থৈ যোৱা জাতীয় মান আৰু স্বভিমানক সুৰক্ষিত কৰাৰ বাবে বৰ্তমানৰ ৰাজ্য চৰকাৰ দায়বদ্ধ।
‘বদৌচা আৰু চাওলুং চ্যুকাফাই যি সমন্বয়ৰ আদৰ্শ দেখুৱাই গৈছে সেই আদৰ্শ যুগে যুগে অমৰ হৈ থাকিব।‘-তেওঁ কয়।
ইয়াৰ উপৰি তেওঁ মৰাণ ছাত্ৰ সন্থাই অসমৰ জাতীয় জীৱন শক্তিশালী কৰাৰ ক্ষেত্ৰত যথেষ্ট অৰিহণা যোগাই আহিছে বুলি উল্লেখ কৰি মৰাণ জনগোষ্ঠীক বিভিন্ন দিশত আগুৱাই নিয়াৰ বাবে সংগঠনটোৱে গ্ৰহণ কৰা কাৰ্যসূচী প্ৰতি চৰকাৰে সকলো সহয়-সহযোগিতা আগবঢ়াব বুলি কয়।
মুখ্য মন্ত্ৰীৰ কাৰ্যালয়ৰ পৰা প্ৰকাশিত এক প্ৰেছ বিবৃতিৰ মতে, অনুষ্ঠানত তেওঁ ধলা-শদিয়া দলঙৰ সমীপত বিভিন্ন জাতি-জনগোষ্ঠীৰ সাংস্কৃতিক বৈভৱ সমূহ তুলি ধৰি ‘ড০ ভূপেন হাজৰিকা উত্তৰ-পূৰ্বাঞ্চল একতা ভৱন’ নামেৰে এটা সমন্বয় ভৱন নিৰ্মাণ কৰা হ’ব বুলি ঘোষণা কৰে।
আজিৰ এই অনুষ্ঠানত কৃষি মন্ত্ৰী অতুল বৰা, সাংসদ ৰামেশ্বৰ তেলী, সদৌ অসম ছাত্ৰ সন্থাৰ সম্পাদক লুৰিণ জ্যোতি গগৈ, সদৌ অসম মৰাণ ছাত্ৰ সন্থাৰ সভাপতি অৰুণজ্যোতি মৰাণ প্ৰমুখ্যে সংগঠনটোৰ বিষয়ববীয়া, কেইবাগৰাকী বিধায়ক আৰু বহু গণ্য-মান্য ব্যক্তি উপস্থিত আছিল।
