এক শোকাৱহ ঘটনাই শোকৰ ছাঁ পেলাইছে তিনিচুকীয়াৰ ডুমডুমাত। পথৰ মাজত পৰি থকা বিদ্যুতৰ তাঁৰ আঁতৰোৱাৰ চেষ্টা কৰোঁতে বিদ্যুৎস্পৃষ্ট হৈ প্ৰাণ হেৰুৱাইছে এগৰাকী নাবালক ছাত্ৰই।
ডুমডুমাৰ তাৰা চাহ বাগিচাত এই ঘটনা সংঘটিত হোৱা বুলি জানিব পৰা গৈছে। বিদ্যালয়ৰ পৰা উভতি আহি থকা অৱস্থাত পথত পৰি থকা বিদ্যুৎ সংযোগ হৈ থকা তাঁৰডাল দেখা পায় ছাত্ৰগৰাকীয়ে।
তাঁৰডাল সক্ৰিয় হৈ থকা বুলি নজনাৰ বাবে ছাত্ৰগৰাকীয়ে পথৰ পৰা তাঁৰডাল আঁতৰাবলৈ চেষ্টা কৰে আৰু তাঁৰডাল স্পৰ্শ কৰাৰ লগে লগে বিদ্যুৎস্পৃষ্ট হয়।
নিহত ছাত্ৰগৰাকীৰ নাম দেৱ নায়ক বুলি জানিব পৰা গৈছে। ঘটনাৰ পিছতে সদৌ অসম চাহ জনজাতি ছাত্ৰ সন্থা, চমুকৈ আটছাই এই ঘটনাৰ বাবে এ এছ ই বি (ASEB)ৰ বিৰুদ্ধে গাফিলতিৰ অভিযোগ উত্থাপন কৰে।
ঘণ্টাৰ পিছত ঘণ্টা তাঁৰ ছিঙি যোৱাৰ পিছতো বিভাগে ইয়াৰ ওপৰত কোনো ব্যৱস্থা গ্ৰহণ কৰা নাছিল বাবেই এই মৰ্মান্তিক কাণ্ড সংঘটিত হয় বুলি অভিযোগ কৰে আটছাই।
