তিনিমাহজোৰা গোষ্ঠীগত সংঘৰ্ষই অশান্ত কৰি ৰাখিছে মণিপুৰ। ৰাজ্যখনৰ এই অগ্নিগৰ্ভৰ পৰিস্থিতি এতিয়া ৰাষ্ট্ৰীয় উদ্বেগৰ বিষয়। তাৰ মাজতে আজি স্বাধীনতা দিৱস উদযাপন হৈছে হিংসাৰ দাবানলত বিধ্বস্ত হোৱা ৰাজ্যখনত।
স্বাধীনতাৰ এই ঐতিহাসিক দিনটোতে সংঘৰ্ষজৰ্জৰিত মণিপুৰত আজি দুই দশকৰো অধিক সময়ৰ পাছত প্রথমবাৰৰ বাবে প্রদর্শন হ’ব এখন হিন্দী ছবি৷
আজি সন্ধিয়া চুৰাচান্দপুৰ জিলাৰ ৰেংকাই (লমকা)ত এখন হিন্দী ছবি প্ৰদৰ্শনৰ পৰিকল্পনা কৰিছে জনজাতীয় সংগঠন হমাৰ ছাত্ৰ সন্থাই।
অৱশ্যে প্ৰদৰ্শিত হ’বলগীয়া ছবিখনৰ নাম প্ৰকাশ কৰা নাই সংগঠনটোৱে। কালি নিশা এক বিবৃতি যোগে সংগঠনটোৱে দেশৰ স্বাধীনতা দিৱস উপলক্ষে আজি ৰাজহুৱাভাৱে এখন হিন্দী ছবি প্ৰদৰ্শন কৰিব বুলি সদৰী কৰে।
বিবৃতিটোত লগতে এই চিনেমা প্ৰদৰ্শনৰ দ্বাৰা দশক দশক ধৰি আদিবাসীসকলক বশ কৰি ৰখা সন্ত্ৰাসবাদী সংগঠনসমূহৰ প্ৰতি অৱজ্ঞা আৰু বিৰোধিতা দেখুওৱা হ’ব বুলিও উল্লেখ কৰা হৈছে।
উল্লেখ্য যে মণিপুৰত ৰাজহুৱাভাৱে ১৯৯৮ চনত শেষবাৰৰ বাবে হিন্দী ছবি প্ৰদৰ্শিত হৈছিল। উক্ত চলচ্চিত্ৰখন আছিল শ্বাসৰুখ খান অভিনীত ‘কুচ কুচ হৌতা হ্যেই’।
২০০০ চনৰ ছেপ্টেম্বৰ মাহত বিদ্ৰোহী সংগঠন ৰিভল্যুচনেৰী পিপলছ ফ্ৰণ্টে মণিপুৰত হিন্দী ছবি প্ৰদৰ্শনৰ ওপৰত নিষেধাজ্ঞা জাৰি কৰিছিল।
নিষেধাজ্ঞা জাৰি কৰাৰ এসপ্তাহৰ ভিতৰতে বিদ্ৰোহীয়ে ৰাজ্য জুৰি সংগ্ৰহ কৰা ৬,০০০ৰ পৰা ৮,০০০ ভিডিঅ’ আৰু অডিঅ’ কেছেট আৰু হিন্দী ভাষাৰ কম্পেক্ট ডিস্ক জ্বলাই দিয়ে।
