ৰুক্ষ প্ৰকৃতিৰ তাণ্ডৱত বিধ্বস্ত হৈ পৰিছে দুই পাহাৰীয়া ৰাজ্য হিমাচল প্ৰদেশ আৰু উত্তৰাখণ্ড। অতিমাত্ৰা বৃষ্টিপাতৰ ফলত হোৱা বান আৰু ভূমিস্খলনে অধিক ভয়াৱহ কৰি তুলিছে ৰাজ্য দুখনৰ পৰিস্থিতি।
এই দুৰ্যোগত ৰাজ্য দুখনত মৃত্যুৰ সংখ্যা ৬৬লৈ বৃদ্ধি পাইছে। বানবিধ্বস্ত অঞ্চলসমূহত যুদ্ধকালীন তৎপৰতাৰে উদ্ধাৰ অভিযান অব্যাহত ৰাখিছে প্ৰশাসনে। অৱশ্যে ভূমিস্খলনৰ ফলত বহু পথ বন্ধ হৈ যোৱাৰ বাবে কিছু ব্যাঘাত জন্মিছে অভিযানত।
উল্লেখ্য যে, যোৱা ১৩ আগষ্টৰ পৰা ধাৰাবাহিকভাৱে মূষলধাৰ বৰষুণ হৈ আছে হিমাচল প্ৰদেশত। এতিয়ালৈকে ৰাজ্যখনত ৬০ গৰাকী লোকে প্ৰাণ হেৰুৱাইছে বুলি নিশ্চিত কৰিছে মুখ্যমন্ত্ৰী সুখৱিন্দৰ সিং সুখুৱে।
লক্ষণীয়ভাৱে, বানৰ এই বিভীষিকাময় পৰিস্থিতিৰ প্ৰতি লক্ষ্য ৰাখি কালি দেশৰ ৭৭ তম স্বাধীনতা দিৱসৰ সকলো পৰিকল্পিত কাৰ্যসূচী বাতিল কৰা হয় ৰাজ্যখনত। বৰ্তমান পৰ্যন্ত ৰাজ্যখনত বন্ধ হৈ আছে সকলো শিক্ষানুষ্ঠান।
ইফালে বতৰ বিজ্ঞান কেন্দ্ৰৰ তথ্য অনুসৰি, ৰাজ্যত আগন্তুক দুদিনলৈ বতৰৰ কোনো ধৰণৰ পৰিৱৰ্তন হোৱাৰ সম্ভাৱনা নাই। এনে পৰিণতিত অধিক বিষম হৈ পৰিব হিমাচলৰ পৰিস্থিতি।
দুৰ্যোগৰ ফলত বিদ্যুৎ বিচ্ছিন্ন হৈ থকা প্ৰতিটো ঘৰতে অতি সোনকালে বিদ্যুৎ ঘূৰাই দিয়া হ’ব বুলি অৱশ্যে হিমাচল চৰকাৰে ঘোষণা কৰিছে। লগতে খোৱাপানীৰ যোগান পুনৰ আৰম্ভৰ প্ৰচেষ্টা অব্যাহত আছে বুলিও চৰকাৰে সদৰী কৰে।
আনহাতে হিমাচলৰ দৰেই উত্তৰাখণ্ডৰ পৰিস্থিতিও অত্যন্ত উদ্বেগজনক হৈ পৰিছে। ৰাজ্যখনত আগন্তুক চাৰিদিনলৈ বৰষুণ অব্যাহত থাকিব বুলি বতৰ বিজ্ঞানী কেন্দ্ৰই সকীয়াই দিছে।
ৰাজ্যখনত বান আৰু ভূমিস্খলনৰ তাণ্ডৱত এতিয়ালৈকে ৬ গৰাকী লোকৰ মৃত্যু হৈছে, সন্ধানহীন হৈ আছে ১০ গৰাকী লোক। বানৰ প্ৰকোপত ৰাজ্যৰ ৰুদ্ৰপ্ৰয়াগত ভাগি পৰে এখন দলং।
অৱশ্যে প্ৰশাসনৰ তৎপৰতাত দুৰ্যোগস্থলীৰ পৰা ৫২ গৰাকী লোকক তাৎক্ষণিকভাৱে উদ্ধাৰ কৰা হয়।
