দেওবাৰে নলবাৰী আৰক্ষী ছাউনীৰ সমীপতে কেন্দ্ৰীয় ৰাজহ চোৰাংচোৱাৰ এটা দলে ৩১নং ৰাষ্ট্ৰীয় ঘাইপথত চলোৱা এক অভিযানৰ সময়ত এখন গাঞ্জাভৰ্তি ট্ৰাক জব্দ কৰে।
প্ৰাপ্ত তথ্য মতে, বিহাৰ অভিমুখী এন এল-০১ এ বি-০৮৩২ নম্বৰৰ ট্ৰাকখনে বৃহৎ পৰিমাণৰ গাঞ্জা কঢ়িয়াই গৈ থকা অৱস্থাত কেন্দ্ৰীয় ৰাজহ চোৰাংচোৱাৰ এটা দলে ট্ৰাকখন জব্দ কৰিবলৈ সক্ষম হয়।
বৃহৎ পৰিমাণৰ গাঞ্জাখিনিৰ বজাৰ মূল্য প্ৰায় ৩০ লাখ টকা হ’ব বুলি চোৰাংচোৱাৰ দলটোৱে জানিবলৈ দিয়ে। এক গোপন সূত্ৰৰ পৰা পোৱা তথ্যৰ ভিত্তিত চলোৱা অভিযানৰ সময়ত গাঞ্জা ভৰ্তি ট্ৰাকখন জব্দ কৰিবলৈ সক্ষম হয় যদিও ট্ৰাকচালক আৰু হেণ্ডিমেন ঘটনাস্থলীৰ পলাই যায়।
গাঞ্জা সৰবৰাহত আন্তঃৰাষ্ট্ৰীয় পৰ্যায়ৰ কোনো লোক জড়িত হৈ আছে আৰু তেওঁলোকে ৩১ নং ৰাষ্ট্ৰীয় ঘাইপথক সদায় কৰিড’ৰ হিচাপে ব্যৱহাৰ কৰি আহিছে বুলি আৰক্ষীয়ে তাৎপৰ্যপূৰ্ণ মন্তব্য কৰে।
ইফালে ট্ৰাকখন নাগালেণ্ডৰ বুলি আৰক্ষী সূত্ৰই প্ৰকাশ কৰিছে।
উল্লেখ্য যে উত্তৰ-পূৰ্বাঞ্চলৰ ৰাজ্যকেইখনৰ পৰা চোৰাংভাবে গাঞ্জাকে ধৰি বিভিন্ন ধৰণৰ নিষিদ্ধ মাদক দ্ৰব্যৰ সৰবৰাহ চলি আছে। আৰক্ষীয়ে চোৰাং সৰবৰাহকাৰীৰ বিৰুদ্ধে তীক্ষ্ণ দৃষ্টি ৰাখিছে যদিও তাৰ মাজতে এনেদৰে অব্যাহত আছে গাঞ্জাৰ অবৈধ ব্যৱসায়। আনহাতে এই ধৰা পৰা গাঞ্জাৰ সৰহভাগেই চোৰাং কাৰবাৰীয়ে ত্ৰিপুৰাৰ পৰা সৰবৰাহ কৰাটো ইতিমধ্যে প্ৰমাণিত হৈছে।
