কালি চন্দ্ৰযান-৩ চন্দ্ৰত অৱতৰণ কৰাৰ লগে লগে এক ঐতিহাসিক সাফল্যৰ অধিকাৰী হয় ভাৰত। এইদৰে ভাৰত চন্দ্ৰ অভিযান সফলতাৰে সম্পন্ন কৰা বিশ্বৰ চতুৰ্থখন দেশ হিচাপে পৰিগণিত হোৱাৰ লগতে চন্দ্ৰৰ দক্ষিণ মেৰুৰ অৱতৰণ কৰা প্ৰথম দেশ হিচাপে পৰিগণিত হয়।
ভাৰতৰ এই চন্দ্ৰ অভিযানৰ সাফল্যক অভিনন্দন জনাইছি সমগ্ৰ বিশ্বই। চুবুৰীয়া পাকিস্তানেও ভাৰতৰ এই ঐতিহাসিক সফলতাৰ বাবে শুভেচ্ছা জনাইছে। দেশখনৰ পূৰ্বৰ ইমৰাণ খান চৰকাৰৰ তথ্য আৰু সম্প্ৰচাৰ বিভাগৰ প্ৰাক্তন মন্ত্ৰী ফাৱাদ চৌধুৰীৰ প্ৰশংসাসূচক মন্তব্য ইতিমধ্যে ভাইৰেল হৈ পৰিছে।
চন্দ্ৰযান-৩ অৱতৰণৰ কেইঘণ্টামান পূৰ্বে ফাৱাদ চৌধুৰীয়ে পাকিস্তান চৰকাৰক ৰাষ্ট্ৰীয় টেলিভিছনত এই অনুষ্ঠান পোনপটীয়াকৈ সম্প্ৰচাৰ কৰিবলৈ আহ্বান জনাইছিল। এই অনুৰোধে পাকিস্তানৰ ছ’চিয়েল মিডিয়া প্লেটফৰ্মত বিতৰ্কৰ সূচনা কৰিছিল।
এনে বিতৰ্কৰ আধাৰতে দেশখনৰ এগৰাকী ইউটিউবাৰে ভাৰতৰ এই অভিযানৰ মুহূৰ্ত টেলিভিছনত প্ৰচাৰ কৰা উচিত হয় নে নহয়, সেই সম্পৰ্কে জনমত সংগ্ৰহ কৰিছিল। এই ইউটিবাৰগৰাকীক এগৰাকী যুৱকে দিয়া উত্তৰে ব্যাপক চৰ্চা লাভ কৰিছে।
ছ’চিয়েল মিডিয়া প্লেটফৰ্মত ভাইৰেল হৈ পৰা এই ভিডিঅ’টোত পাকিস্তানী যুৱকগৰাকীয়ে তীব্ৰ ব্যঙ্গৰে তেওঁলোকে ইতিমধ্যে চন্দ্ৰতে বাস কৰি আছে বুলি মন্তব্য কৰে। এই মন্তব্যৰ সমৰ্থনত যুক্তিও দাঙি ধৰে যুৱকগৰাকীয়ে।
তেওঁৰ মতে, চন্দ্ৰৰ দৰে পাকিস্তানতো পানী, গেছ, বিদ্যুতৰ দৰে প্ৰয়োজনীয় বস্তুৰ অভাৱ আছিল। হাস্যকৰভাৱে সেই সময়ত যুৱকগৰাকী থকা ঠাইত বিদ্যুৎ কৰ্তন হৈ আছিল। এই হাস্যৰসময়ী তুলনাৰে মুহূৰ্তেতে নেট দুনীয়াত জনপ্ৰিয় হৈ পৰে।
Meanwhile, the Sense of Humor of Pakistani People are always top class. This on Chandrayaan pic.twitter.com/Y127YPeyIv
— Joy (@Joydas) August 23, 2023
যুৱকগৰাকীৰ এই হাস্যৰসাত্মক স্বভাৱে নেটিজেনৰ মাজত যথেষ্ট আমোদৰ সৃষ্টি কৰিছে। এনে কাৰণতে কোনো কোনোৱে আনকি তেওঁক ষ্টেণ্ড আপ কমেডীত কেৰিয়াৰ গঢ়িবলৈও পৰামৰ্শ আগবঢ়াইছে।
