ফুলাৰ আগতেই ফুল সৰি পৰিল! বিয়াৰ পৰিকল্পনা অনুসৰি কিছুদিন পূৰ্বে সম্পন্ন হৈছিল আঙুঠি পিন্ধোৱা অনুষ্ঠান। নাইৰোবিত অনুষ্ঠিত হ’ব লাগিছিল বিয়াখন।
বিয়াৰ পূৰ্বে পূৰ্বপুৰুষৰ আশীৰ্বাদ বিচাৰি পূৰ্বপুৰুষৰ দেশলৈ আহিছিল দম্পতীহাল। কিন্তু পূৰ্বপুৰুষৰ দেশলৈ আহি এই কৰুণ পৰিণতি হ’ব বুলি কোনেও কল্পনা কৰা নাছিল। দেওবাৰে মুম্বাইৰ গেলাক্সি হোটেলৰ অগ্নিকাণ্ডত অগ্নিদগ্ধ হৈ মৃত্যু হয় বিবাহতব্য দম্পতীহালৰ।
মুম্বাইৰ গেলাক্সি হোটেলত সংঘটিত হোৱা অগ্নিকাণ্ডত মৃত্যু হোৱা ৩ জনৰ ভিতৰত ২ গৰাকীয়েই আছিল তেওঁলোক। তেওঁলোকৰ নাম ৰূপল বেকৰীয়া আৰু কিষাণ হালাই। দুয়োজনেই আছিল কেনিয়াৰ ৰাজধানী নাইৰোবিৰ বাসিন্দা।
কিন্তু পেটেল জনগোষ্ঠীৰ যুৱকজন ৰূপলৰ পৰিয়ালৰ ঘাইশিপা গুজৰাটৰ ভূজ জিলাৰ ৰামপাৰ গাঁৱত। ৰূপলে বাগদত্তা কিষানৰ সৈতে পূৰ্বপুৰুষৰ ঘৰখন চাবলৈ আহিছিল। তাৰ পাছত উভতি অহাৰ পথত এই কৰুণ ঘটনাটো ঘটিল। গেলাক্সি হোটেলৰ অগ্নিকাণ্ডত গুৰুতৰভাৱে আহত ৰূপলৰ মাতৃ মঞ্জুলা বেকাৰিয়া আৰু ভগ্নী আলপা বেকাৰিয়া।
গুজৰাটৰ বিশাল অঞ্চল ভ্ৰমণ কৰি নাইৰোবিলৈ বিমান ধৰিবলৈ মুম্বাইত উপস্থিত হৈছিল পৰিয়াল আৰু বাগদত্তা কিষাণ। কিন্তু বিমানখন নিৰ্ধাৰিত সময়তকৈ পলমকৈ আহিব বুলি ঘোষণা কৰা হয় আৰু বিমানবন্দৰৰ সমীপত অৱস্থিত গেলাক্সি হোটেলত যাত্ৰীসকলক থকাৰ ব্যৱস্থা কৰি দিছইল বিমান সংস্থাটোৱে। কোনে জানিছিল যে হোটেলখনত জুই জ্বলি উঠিব!
গেলাক্সি হোটেলৰ তৃতীয় মহলাত আছিল ৰূপল, ৰূপলৰ বাগদত্তাকে ধৰি সমগ্ৰ পৰিয়ালটো। হোটেলখনৰ ৩০৪ নং কোঠাত আছিল তেওঁলোক। প্ৰায় ১:১০ বজাত হোটেলখনৰ দ্বিতীয় মহলাত অগ্নিকাণ্ড সংঘটিত হয়। তৃতীয় মহলালৈ জুই বিয়পিবলৈ বেছি সময় নালাগিল। ৰূপল আৰু কিষাণে কোঠাটোৰ পৰা ওলাই যোৱাৰ সুযোগ নাপালে। অগ্নিনিৰ্বাপক বাহিনীৰ সহযোগত ৰূপলৰ মাক আৰু ভগ্নীয়ে কোঠাৰ পৰা ওলাই আহিবলৈ সক্ষম হয় যদিও গুৰুতৰভাৱে আহত হয়।
ইতিমধ্যে গেলাক্সি হোটেলত সংঘটিত অগ্নিকাণ্ডৰ তদন্ত আৰম্ভ হৈছে। উল্লেখ্য যে কিছুদিন পূৰ্বে বিএমচিয়ে হোটেলখনৰ অগ্নিনিৰ্বাপক ব্যৱস্থা সঠিক নহয় বুলি জাননী দিছিল। কিন্তু এই জাননীৰ পিছতো কোনো ব্যৱস্থা লোৱা হোৱা নাই বুলি অভিযোগ উঠিছে। এই অগ্নিকাণ্ডৰ ঘটনাত হোটেল কৰ্তৃপক্ষৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলি বিএমচিৰ এগৰাকী বিষয়াই জানিবলৈ দিয়ে।
