বিপদে লগ নেৰা হৈছে পাকিস্তানৰ প্ৰাক্তন প্ৰধানমন্ত্ৰী ইমৰান খানক। কাৰাৰুদ্ধ খানক আজি ইছলামবাদ উচ্চ ন্যায়ালয়ে টোছাখানা গোচৰত জামিনত মুকলি কৰি দিয়াৰ কেইঘণ্টামানৰ পিছতে পুনৰ গ্ৰেপ্তাৰ কৰা হয়।
ধৃত খান আজি ন্যায়িক জিম্মাত থাকিব আৰু ৩০ আগষ্টত আদালতত হাজিৰ কৰা হ’ব। প্ৰাক্তন প্ৰধানমন্ত্ৰীগৰাকীক অফিচিয়েল ছিক্ৰেটছ এক্টৰ অধীনত গ্ৰেপ্তাৰ কৰা হৈছে।
ইমৰান খানৰ বিৰুদ্ধে পাকিস্তানৰ ক্ষমতাত থকাৰ সময়ত ৰাজনৈতিক উদ্দেশ্যত গোপনীয় কূটনৈতিক কেবল (চাইফাৰ) অপব্যৱহাৰ কৰাৰ অভিযোগ উত্থাপন হৈছে।
উল্লেখ্য যে, ইছলামবাগৰ এখন বিচাৰ আদালতে ৫ আগষ্টত পাকিস্তান তেহৰিক-ই-ইনছাফৰ অধ্যক্ষগৰাকীক টোছাখানা দুৰ্নীতিৰ গোচৰত দোষী সাব্যস্ত কৰি তিনি বছৰৰ কাৰাদণ্ড বিহে।
আজি ইছলামবাদ উচ্চ ন্যায়ালয়ে ইমৰান খানক এই টোছাখানা দুৰ্নীতিৰ গোচৰত তিনি বছৰৰ কাৰাদণ্ড স্থগিত ৰাখি কাৰাগাৰৰ পৰা মুক্তিৰ নিৰ্দেশ দিয়ে।
লক্ষণীয়ভাৱে ইমৰান খানক পাঁচ বছৰলৈ ৰাজনীতিৰ পৰা নিষিদ্ধ ঘোষণা কৰাৰ বাবে আগন্তুক নিৰ্বাচনত প্ৰতিদ্বন্দ্বিতা কৰিব নোৱাৰিব।
