বিজেপিৰ এক দেশ, এক নীতিয়ে এইবাৰ সাঙুৰিবলৈ আগবাঢ়িছে নিৰ্বাচনী ৰাজনীতিকো। পূৰ্বৰে পৰা এই ‘এক দেশ, এক নিৰ্বাচন’ৰ সমৰ্থনত প্ৰচাৰ চলাই অহা বিজেপিয়ে এই প্ৰস্তাৱ কাৰ্যকৰী কৰাৰ ক্ষেত্ৰত প্ৰাথমিক খোজ আগবঢ়াইছে।
এই বিষয়টো সন্দৰ্ভত অধ্যয়ন কৰি প্ৰতিবেদন দাখিল কৰিবলৈ এখন কমিটী গঠন কৰিছে কেন্দ্ৰীয় চৰকাৰে। এই পেনেলৰ নেতৃত্বত থাকিব প্ৰাক্তন ৰাষ্ট্ৰপতি ৰামনাথ কোবিন্দ।
লক্ষনীয়ভাৱে অহা ১৮ ছেপ্টেম্বৰৰ পৰা ২২ ছেপ্টেম্বৰলৈ কেন্দ্ৰই সংসদৰ বিশেষ অধিৱেশনৰ আহ্বান জনাইছে। এই ঘোষণাৰ এদিন পিছতে এতিয়া এক দেশ, এক নিৰ্বাচনৰ ক্ষেত্ৰত কেন্দ্ৰৰ এই পদক্ষেপ নিশ্চিতভাৱে চৰ্চিত হৈ পৰিছে।
অৰ্থাৎ আগন্তুক বিশেষ অধিৱেশনতে এক দেশ, এক নিৰ্বাচনৰ বিধেয়ক উত্থাপন কৰি কেন্দ্ৰই আইনত পৰিণত কৰিব নেকি, সেই লৈ এতিয়া জল্পনা-কল্পনা চলিছে। অৱশ্যে এই সন্দৰ্ভত চৰকাৰী পক্ষই এইপৰ্যন্ত নিশ্চিত কৰা নাই।
‘এটা দেশ, এটা নিৰ্বাচন’ৰ জৰিয়তে বিজেপিয়ে সমগ্ৰ দেশতে একেসময়তে লোকসভা আৰু ৰাজ্য বিধানসভাৰ নিৰ্বাচন অনুষ্ঠিত কৰাৰ পৰিকল্পনা কৰিছে। ২০১৪ চনৰ লোকসভা নিৰ্বাচনৰ প্ৰচাৰৰ সময়তো বিজেপিয়ে দলৰ নিৰ্বাচনী ইস্তাহাৰত এই প্ৰস্তাৱ সন্নিৱিষ্ট কৰিছিল।
উল্লেখ্য যে, ১৯৬৭ চনলৈকে ভাৰতত একেলগে লোকসভা আৰু ৰাজ্যসভা নিৰ্বাচন অনুষ্ঠিত হৈছিল। এইদৰে চাৰিটা নিৰ্বাচন অনুষ্ঠিত হোৱাৰ পিছত ১৯৬৮-৬৯ চনত কিছু ৰাজ্যিক বিধানসভাৰ আকস্মিক ভংগৰ পাছৰে পৰা এই প্ৰথা বন্ধ হৈ পৰে।
২০১৯ চনত লোকসভা নিৰ্বাচনৰ পিছতে প্ৰধানমন্ত্ৰী নৰেন্দ্ৰ মোদীয়ে এই বিষয়ত আলোচনাৰ বাবে এক সৰ্বদলীয় বৈঠক আহ্বান কৰিছিল। অৱশ্যে এই বৈঠক বৰ্জন কৰিছিল কেইবাটাও বিৰোধী দলে।
