যোৱা ৩০ আগষ্টত সমগ্ৰ দেশে উদযাপন কৰিছে ৰাখী বন্ধন উৎসৱ। ভাতৃ-ভগ্নীৰ সম্পৰ্কৰ পৰম স্নেহ আৰু সন্মানৰ বান্ধোনক এই উৎসৱৰ মাজেৰে উদযাপন কৰা হ’ল দেশত। ৰাখী বন্ধনৰ এই শুভ ক্ষণত নিজ ভগ্নীক এক অমূল্য উপহাৰ দি চৰ্চালৈ আহিছে এগৰাকী যুৱক।
এই যুৱকগৰাকীয়ে ভগ্নীক উপহাৰ দিছে জীৱন। বৃক্ক ৰোগত আক্ৰান্ত হোৱাৰ বাবে ডায়েলাইছিছ কৰি থকা ভগ্নীৰ বেদনা সহ্য কৰিব নোৱাৰি যুৱকগৰাকীয়ে নিজৰ বৃক্ক দান কৰি জীৱন ৰক্ষা কৰাৰ সিদ্ধান্ত গ্ৰহণ কৰে।
ভাতৃস্নেহৰ নিদৰ্শন দাঙি ধৰা এই যুৱকগৰাকী হায়দৰাবাদৰ বাসিন্দা। এক সাক্ষাৎকাৰত দুষ্যন্ত ভাৰ্কৰ নামৰ যুৱকগৰাকী আৰু তেওঁৰ ভগ্নী শীতল ভাণ্ডাৰীয়ে এই বিষয়ে ব্যক্ত কৰিছে। এয়া জীৱনৰ আটাইতকৈ স্মৰণীয় মুহূৰ্ত হৈ থাকিব বুলি দুয়ো মন্তব্য কৰে।
এই সন্দৰ্ভত শীতল ভাণ্ডাৰীয়ে কয়, “ডায়েলাইছিছৰ পিছত আগতে মই দুৰ্বলতা, অনিদ্ৰা আদি বহু স্বাস্থ্যজনিত সমস্যাৰ সন্মুখীন হৈছিলো। দুৰ্বলতাৰ বাবে মই কাম কৰিব পৰা নাছিলো। ভাইটিয়ে ইয়াৰ পিছতে এটা সাহসী সিদ্ধান্ত লৈছিল যে তেওঁ নিজৰ বৃক্ক দান কৰিব বিচাৰে।”
তেওঁ লগতে উল্লেখ কৰা মতে ভাতৃৰ এই সিদ্ধান্তৰ পিছতে যোৱা জুন মাহত সফলতাৰে কিডনি সংৰোপন কৰা হয়। শীতলে লগতে প্ৰতিগৰাকী ভগ্নীৰ যিকোনো পৰিস্থিতিত সহায় কৰিব পৰা এনে এজন ভাতৃ থাকিব লাগে বুলিও মন্তব্য কৰে।
ইফালে এই সন্দৰ্ভত দুষ্যন্তই কয়, “মোৰ ভগ্নী ২০১৭ চনৰ পৰাই কিডনীৰ সমস্যাৰ সন্মুখীন হৈ আহিছে। ডাঃ এ ভি ৰাও আৰু সুজিত ৰেড্ডীৰ দলটোৱে আমাক বহুত সহায় কৰিলে। তেওঁলোকে মোৰ বৃক্ক মোৰ ভগ্নীৰ দেহত সফলতাৰে সংৰোপন কৰিছে।”
