পুনৰ যৌন নিৰ্যাতনৰ ঘটনা সংঘটিত হৈছে উৰন্ত বিমানত। এইবাৰ এই ঘটনা ঘটিছে মুম্বাইৰ পৰা গুৱাহাটী অভিমুখী ইণ্ডিগ’ৰ এখন বিমানত। এগৰাকী মহিলা যাত্ৰীক যৌন নিৰ্যাতন চলোৱাৰ অভিযোগ উত্থাপন হৈছে এগৰাকী ব্যক্তিৰ বিৰুদ্ধে।
অভিযুক্ত ব্যক্তিগৰাকীক ইতিমধ্যে গ্ৰেপ্তাৰ কৰা হৈছে। বিমানখন গুৱাহাটী বিমানবন্দৰত অৱতৰণ কৰাৰ পিছতে কৰ্তৃপক্ষই তেওঁক কৰায়ত্ব কৰি আৰক্ষীক গতাই দিয়ে বুলি বিমান সংস্থাটোৱে প্ৰকাশ কৰিছে।
প্ৰকাশিত খবৰ অনুসৰি, গভীৰ নিশা বিমানৰ কেবিন লাইটসমূ নুমুৱাই থোৱাৰ সময়তে অভিযুক্ত ব্যক্তিগৰাকীয়ে দুয়োৰে আসনৰ মাজত থকা আৰ্মৰেষ্টটো তুলি হাতত চুমা খোৱাৰ অভিযোগ উত্থাপন কৰিছে মহিলা যাত্ৰীগৰাকীয়ে।
মহিলাগৰাকীৰ অভিযোগৰ ভিত্তিত লোকজনৰ বিৰুদ্ধে এফআইআৰ ৰুজু কৰা হয়। এই সন্দৰ্ভত বিমান সংস্থাটোৱে এক বিবৃতিত মহিলাগৰাকীয়ে উত্থাপন কৰা অভিযোগৰ তদন্তত প্ৰয়োজনুসাৰে সহায় আগবঢ়াব বুলি উল্লেখ কৰে।
ইফালে ঘটনা সন্দৰ্ভত মহিলাগৰাকীৰ ভাষ্য মতে, সেই সময়ত তেওঁ শুই আছিল। সাৰ পাই তেওঁ আসনৰ কাষৰ আৰ্মৰেষ্টটো ওপৰলৈ উঠি থকা আৰু সহযাত্ৰীগৰাকী তেওঁৰ কাষত হাৱলি শুই থকা দেখিবলৈ পায়।
ইয়াৰ পিছতে তেওঁ নিজৰ সুৰক্ষাৰ প্ৰতি চিন্তিত হৈ শুই থকাৰ অভিনয় কৰে আৰু ব্যক্তিগৰাকী আঁতৰি যাব বুলি আশা কৰে যদিও পিছমুহূৰ্ততে সহযাত্ৰীজনে তেওঁৰ গাত হাত ফুৰাইছিল বুলি অভিযোগ কৰে মহিলাগৰাকীয়ে।
লগে লগে তেওঁ বিমানৰ কেবিন ক্ৰুক এই বিষয়ে অৱগত কৰে বুলি মহিলাগৰাকীয়ে অভিযোগ কৰে। তেওঁৰ এই অভিযোগৰ পিছতে বিমান অৱতৰণৰ লগে লগে অভিযুক্ত ব্যক্তিগৰাকীক কৰায়ত্ব কৰি গুৱাহাটী আৰক্ষীৰ হাতত গতাই দিয়া হয়।
