অসমৰ জাতীয় জীৱনৰ চিৰস্মৰণীয় যুগপুৰুষ, নৱ বৈষ্ণৱ আন্দোলনৰ প্ৰৱৰ্তক তথা অসমীয়া সাহিত্য-সংস্কৃতিকে ধৰি সমাজ জীৱনক স্বকীয় মহিমাৰে উদ্ভাসিত কৰি থৈ যোৱা মহাপুৰুষ শ্ৰীমন্ত শংকৰদেৱৰ আজি তিৰোভাৱ তিথি। সমগ্ৰ অসমৰ লগতে দেশৰ বিভিন্ন প্ৰান্ততো তিৰোভাৱ তিথিত মহাপুৰুষগৰাকীলৈ শ্ৰদ্ধাঞ্জলি জনোৱা হৈছে।
ৰাজ্যৰ বিভিন্ন প্ৰান্তৰ কীৰ্তন ঘৰ, নামঘৰকে ধৰি বিভিন্ন অনুষ্ঠান-প্ৰতিষ্ঠানে মহাপুৰুষগৰাকীৰ অতুলনীয় সৃষ্টি ৰাজিৰ আলোকত জাতীয় পৰিচয়ৰ মাজেৰে আত্মদৰ্শনৰ প্ৰয়াস কৰিছে।
শ্ৰীমন্ত শংকৰদেৱ আছিল এগৰাকী একেধাৰে ধৰ্ম প্ৰচাৰক, সমাজ সংগঠক, সুগায়ক, অভিনেতা, কবি, এজন চিত্ৰকৰ লগতে অসমীয়া জাতি-সাহিত্য-সংস্কৃতিৰ নিৰ্মাতা।
মহাপুৰুষগৰাকীৰ তিৰোভাৱ তিথিত আজি সমাজৰ বিভিন্ন শ্ৰেণীৰ লোকে মহাপুৰুষগৰাকীৰ শ্ৰদ্ধাঞ্জলি জনোৱাৰ লগতে তেওঁৰ অপূৰ্ব সৃষ্টিৰাজিৰ মাজত ভুমুকি মাৰি চৰ্চাৰ পৰিৱেশ গঢ়ি তোলা দেখা গৈছে। সামাজিক মাধ্যমৰ জৰিয়তে বিভিন্নজনে মহাপুৰুষগৰাকীৰ ৰচনাৰ অংশ তুলি আনি স্মৰণ কৰিছে।
ইপিনে, আজি কোচবিহাৰৰ মধুপুৰ সত্ৰতো মহাপুৰুষ শ্ৰীমন্ত শঙ্কৰদেৱৰ তিৰোভাৱ তিথি বিভিন্ন কাৰ্য্যসূচীৰে পালন কৰিবলৈ ব্যাপক প্ৰস্তুতি চলোৱা হৈছে। গুৰুজনাৰ তিৰোভাৱ তিথি উপলক্ষ্যে মধুপুৰ সত্ৰত পুৱা প্ৰভাত ফেৰীৰ কাৰ্য্যসূচী ৰূপায়ন কৰা হয়।
কাৰ্য্যসূচীৰ আন অংশ হিচাপে ৰাতিপুৱা ৮ বজাত নাম-প্ৰসংগ, ১০ বজাত ভাগৱত পাঠ আৰু আবেলি ২ বজাত আয়তীসকলৰ দ্বাৰা নাম-প্ৰসংগ কৰা হ’ব। এই উপলক্ষ্যে সত্ৰৰ সত্ৰাধিকাৰ পীতাম্বৰ ভকতৰ সঞ্চালনাত আবেলি ২ বজাত এখন ধৰ্মালোচনী সভা অনুষ্ঠিত কৰা হ’ব।
এই সভাত উত্তৰবংগৰ বিভিন্ন সত্ৰ তথা নামঘৰৰ সত্ৰাধিকাৰ আৰু নামঘৰীয়াৰ লগতে উত্তৰবংগৰ কেইবাগৰাকীও বিশিষ্ট বৈষ্ণৱ পণ্ডিতে অংশগ্ৰহণ কৰিব।
