খেলপথাৰত ফুটবল ভৰিত লৈ তাৰকা-মহাতাৰকাই দেখুওৱা নিপুণ ক্ৰীড়াশৈলী আপুনি দেখিছে; চমকৃত হৈ তেওঁলোকৰ প্ৰশংসাত পঞ্চমুখ হৈ পৰিছে আপুনি। কিন্তু মূৰত এটা ফুটবল লৈ কোনোবাই ২৫০ ফুট উচ্চতালৈকে বগাই যোৱা বুলি ক’লে বিশ্বাস হ’বনে?
অবিশ্বাস্য যেন লাগিলেও এয়া সঁচা। এই অদ্ভুত কাৰ্য কৰি দেখুৱাইছে আফ্ৰিকান দেশ নাইজেৰিয়াৰ এগৰাকী যুৱকে। মূৰত এটা ফুটবল লৈ এই যুৱকজনে ২৫০ ফুট (৭৬ মিটাৰ) ওখ এক টেলিকম সেৱা সংযোগী টাৱাৰৰ উচ্চতালৈ উঠি যায়।
অসম্ভৱক সম্ভৱ কৰা এই যুৱকজনৰ নাম টনি ছল’মন। টনিৰ এই নান্দনিক কাৰ্যক স্বীকৃতি প্ৰদান কৰিছে গ্ৰীনিজ ৱৰ্ল্ড ৰেকৰ্ডছে। এই অবিশ্বাস্য অভিলেখৰ ভিডিঅ’ গ্ৰীনিজ ৱৰ্ল্ড ৰেকৰ্ডছে অফিচিয়েল টুইটাৰ হেণ্ডেলত শ্বেয়াৰ কৰিছে।
ভিডিঅ’টোত টনি ছল’মনে নিজৰ মূৰত ফুটবলটোৰ ভাৰসাম্য ৰক্ষা কৰি ওখ টাৱাৰটো বগোৱা বাই ওপৰলৈ উঠি যোৱা দেখিবলৈ পোৱা গৈছে। বলটো পৰি নোযোৱাকৈ ৰাখি এইদৰে মূৰত অভাৱনীয় ভাৰসাম্য ৰক্ষা কৰি ২৫০ ফুট উচ্চতা বগাই টনিয়ে স্থাপন কৰে নতুন অভিলেখ।
New record: Most steps climbed on a ladder while balancing a football on the head – 150 by Tonye Solomon (Nigeria) ️⚽️
Don’t look down 👀 pic.twitter.com/yeZAXe1CxH
— #GWR2024 OUT NOW (@GWR) September 13, 2023
প্ৰকাশিত খবৰ অনুসৰি, এই অভিলেখৰ বাবে দুমাহ ধৰি অনুশীলন কৰিছিল টনিয়ে। নিজৰ এই কৃতিত্বৰ আঁৰৰ কাৰণৰ বিষয়ে প্ৰকাশ কৰি টনিয়ে কয় যে তেওঁ কেৱল নিজকে প্ৰত্যাহ্বান জনাবলৈ নহয়, আনকো এনে কাৰ্য কৰিবলৈ অনুপ্ৰাণিত কৰাৰ বাবে এই কাম কৰিছিল।
“এয়া সহজ নাছিল। মই নাইজেৰিয়াৰ অসামৰিক প্ৰতিৰক্ষা বায়েলছা ষ্টেট কমাণ্ডক ধন্যবাদ জনাইছো যে তেওঁলোকে মোক ইয়াৰ বাবে তেওঁলোকৰ সুবিধা ব্যৱহাৰ কৰিবলৈ অনুমতি দিছে।”- অভিলেখ স্থাপনৰ পিছত টনি ছল’মনে লগতে কয়।
গ্ৰীনিজ ৱৰ্ল্ড ৰেকৰ্ডছে যোৱা ১৩ ছেপ্টেম্বৰত পোষ্ট কৰা এই ভিডিঅ’টো সম্প্ৰতি ভাইৰেল হৈ পৰিছে। ভিডিঅ’টো দৰ্শন কৰিছে লক্ষ লক্ষ নেটিজেনে। এনে অসাধ্য কাৰ্য সাধন কৰা টনি ছল’মনৰ প্ৰসংশাত পঞ্চমুখ হৈ পৰিছে নেটিজেন।
