বিশিষ্ট লেখিকা তথা ওড়িশাৰ মুখ্যমন্ত্ৰী নবীন পাটনায়কৰ জ্যেষ্ঠা ভগ্নী গীতা মেহতাৰ বাৰ্ধক্যজনিত অসুস্থতাৰ বাবে শনিবাৰে দিল্লীৰ বাসগৃহত দেহাৱসান ঘটে। মৃত্যুৰ সময়ত তেওঁৰ বয়স আছিল ৮০ বছৰ। তেওঁ ইহসংসাৰত একমাত্ৰ পুত্ৰক এৰি থৈ যায়। তেওঁৰ প্ৰকাশক স্বামী ছনী মেহতাৰ পূৰ্বেই পৰলোকপ্ৰাপ্তি ঘটিছে।
এগৰাকী প্ৰসিদ্ধ লেখিকা, তথ্যচিত্ৰ নিৰ্মাতা, সাংবাদিক গীতা মেহতা আছিল নবীন পাটনায়ক আৰু ব্যৱসায়ী প্ৰেম পাটনায়কৰ জ্যেষ্ঠা ভগ্নী।
১৯৪৩ চনত দিল্লীৰ বিজু পাটনায়ক আৰু জ্ঞান পাটনায়কৰ ঘৰত জন্মগ্ৰহণ কৰা তেওঁ ভাৰতত আৰু পিছত যুক্তৰাজ্যৰ কেম্ব্ৰিজ বিশ্ববিদ্যালয়ত অধ্যয়ন কৰিছিল।
তেওঁ ‘কৰ্ম কোলা’, স্নেক এণ্ড লেডাৰ্ছ’, ‘এ ৰিভাৰ সূত্ৰ’, ‘ৰাজ’ আৰু ‘দ্য এটাৰনেল গণেশ’কে ধৰি কেইবাখনো উল্লেখযোগ্য গ্ৰন্থ ৰচনা কৰিছে।
জানিব পৰা মতে, মেহতা তেওঁৰ কনিষ্ঠ ভাতৃ নবীন পাটনায়কৰ সৈতে অতি ঘনিষ্ঠ আছিল। ইয়াৰ পূৰ্বে ভুৱনেশ্বৰ ভ্ৰমণৰ সময়ত তেওঁ সাংবাদিকৰ আগত কৈছিল যে “ওড়িছাৰ জনসাধাৰণৰ সৌভাগ্য হৈছে যে তেওঁলোকে নবীন পাটনায়কৰ দৰে এগৰাকী মুখ্যমন্ত্ৰী পাইছে”।
প্ৰধানমন্ত্ৰী নৰেন্দ্ৰ মোদীয়ে তেওঁৰ মৃত্যুত শোক প্ৰকাশ কৰি, এক্সত এটা পোষ্ট দি কয়- “বিশিষ্ট লেখিকা শ্ৰীমতী গীতা মেহতা জীৰ মৃত্যুত মই শোকাভিভুত। তেওঁ আছিল এগৰাকী বহুমুখী ব্যক্তিত্ব, তেওঁৰ বুদ্ধিমত্তা আৰু লেখাৰ লগতে চলচ্চিত্ৰ নিৰ্মাণৰ প্ৰতি আকৰ্ষণৰ বাবে পৰিচিত।” .. প্ৰকৃতি আৰু জল সংৰক্ষণৰ প্ৰতিও তেওঁৰ আবেগ আছিল। এই শোকৰ মুহূৰ্তত মোৰ সমবেদনা @Nveen_Odisha Ji আৰু সমগ্ৰ পৰিয়ালটোৰ সৈতে আছে। ওম শান্তি।”
I am saddened by the passing away of noted writer Smt. Gita Mehta Ji. She was a multifaceted personality, known for her intellect and passion towards writing as well as film making. She was also passionate about nature and water conservation. My thoughts are with @Naveen_Odisha…
— Narendra Modi (@narendramodi) September 16, 2023
ওড়িশাৰ ৰাজ্যপাল গণেশি লালেও তেওঁৰ মৃত্যুত শোক প্ৰকাশ কৰে।
তেওঁ এক্সত লিখিছে: “মাননীয় মুখ্যমন্ত্ৰী শ্ৰী @Naveen_Odisha ডাঙৰীয়াৰ ভগ্নী নিপুণ ইংৰাজী লেখিকা গীতা মেহতাৰ মৃত্যুৰ কথা জানিবলৈ পাই দুখী হৈছো আৰু শোকসন্তপ্ত পৰিয়াল আৰু বন্ধু-বান্ধৱীলৈ আন্তৰিক সমবেদনা জ্ঞাপন কৰিছো।”
মেহতাৰ মৃত্যুত ওড়িশাৰ বহু মন্ত্ৰী আৰু বিশিষ্ট ব্যক্তিয়েও শোক প্ৰকাশ কৰে।
