ইয়াৰফোন, লকেট, স্ক্ৰু, ৰাখী কি যে নাছিল – পেট নহয় যেন মিউজিয়ামহে! স্তম্ভিত চিকিৎসক

ইয়াৰফোন, লকেট, স্ক্ৰু,কেইবাটাও ৰাখী – কি নাছিল তেওঁৰ পেটত! যেন সৰু এটা মিউজিয়ামহে। অপাৰেচন কৰি থাকোঁতে স্তম্ভিত হৈ পৰে চিকিৎসকসকল। পঞ্জাৱৰ মোগাৰ এজন ৪০ বছৰীয়া ব্যক্তি দুদিন ধৰি অসুস্থ হৈ পৰিছিল। বমি, তীব্ৰ জ্বৰ আৰু পেটৰ বিষৰ বাবে মোগাৰক মেডিচিন হস্পিতালত ভৰ্তি কৰোৱা হৈছিল। পেটৰ বিষৰ পৰা কোনো সকাহ নোপোৱাত চিকিৎসকে তেওঁৰ পেটৰ এক্স-ৰে, স্কেন কৰাৰ সিদ্ধান্ত ল’লে।

ইয়াৰ পৰা দেখা গ’ল যে মানুহজনৰ পেটৰ ভিতৰত বহু ধাতুৰ বস্তু আৱদ্ধ হৈ আছে। ইয়াৰ পিছত চিকিৎসকে অপাৰেচন কৰিবলৈ আগবাঢ়িল। বৃহস্পতিবাৰে প্ৰায় তিনি ঘণ্টা ধৰি চলে অস্ত্ৰোপচাৰ। তেওঁৰ দেহৰ পৰা ১০০ৰো অধিক সামগ্ৰী উলিয়াই অনা হয়।

চিকিৎসকে কয় যে তেওঁৰ পেটত পোৱা সামগ্ৰীসমূহৰ ভিতৰত আছে – ইয়াৰফোন, ৱাশ্বাৰ, নাট-বল্ট, তাঁৰ, ৰাখী, লকেট, বুটাম, ৰেপাৰ, হেয়াৰক্লিপ, জিপাৰ টেগ, মাৰ্বল আৰু ছেফটি পিন।

লগতে পঢ়কঃ কি যে বিড়ম্বনা, গ্ৰীচত ১ কুইণ্টল ভাং খাই ভেড়া হৈ পৰিল ‘ছাগলী’!

মেডিচিটি হাস্পতালৰ সঞ্চালক ডা. আজমেৰ কালৰাই কয় যে তেওঁলোকে আগতে কেতিয়াও এনে ঘটনা দেখা নাছিল। যোৱা দুবছৰ ধৰি পেটৰ সমস্যাত ভুগি আছিল লোকজন। যদিও তেওঁৰ শৰীৰৰ পৰা সকলো ধাতুৰ বস্তু আঁতৰাই পেলোৱা হৈছে, তথাপিও তেওঁৰ অৱস্থা সুস্থিৰ হোৱা নাই বুলিও তেওঁ জনায়।

তেওঁৰ মতে, সেই বস্তুবোৰ তেওঁৰ পেটত বহুদিন ধৰি আছিল। ফলত আন স্বাস্থ্যজনিত সমস্যাৰ সৃষ্টি হৈছে। পেটৰ পৰা বস্তুবোৰ আঁতৰোৱাৰ পিছত এতিয়া সেই সমস্যাবোৰ দূৰ কৰাই তেওঁলোকৰ লক্ষ্য ।

মানুহজনৰ পৰিয়ালটোও আচৰিত হৈ পৰিছে। তেওঁলোকে কয় যে তেওঁ কেতিয়া কিয় বস্তুবোৰ গিলিছিল তাৰ কোনো ধাৰণাই তেওঁলোকৰ নাছিল। তেওঁৰ পিতৃ-মাতৃয়েও কয় যে তেওঁলোকেও পুত্ৰৰ এই অদ্ভুত অভ্যাসৰ বিষয়ে একো নাজানে। অৱশ্যে তেওঁলোকে কয় যে ব্যক্তিজনৰ মানসিক সমস্যা আছে।

লগতে পঢ়কঃ Asian Games 2023: বিশ্ব অভিলেখ গঢ়ি ৫০ মিটাৰ ৰাইফলত স্বৰ্ণ জয় স্বপ্নিল-ঐশ্বৰ্য-অখিলৰ

চিকিৎসালয়ত ভৰ্তি হোৱাৰ কিছুদিন আগৰ পৰা তেওঁ ৰাতি শুব পৰা নাছিল। পেটৰ বিষ হোৱা বুলি কৈছিল। ইয়াৰ আগতে তেওঁক কেইবাজনো চিকিৎসকৰ ওচৰলৈ লৈ যোৱা হৈছিল। কিন্তু, তেওঁৰ পেটৰ বিষৰ প্ৰকৃত কাৰণ কোনেও ধৰিব পৰা নাছিল।