অসমৰ বিশিষ্ট উদ্যোগপতি-নৌ অভিযন্তা ৰাজ বৰুৱাৰ ষনিবাৰে নিশা ৯ বজাত মুম্বাইৰ কোকিলাবেন হাস্পতালত দেহাবসান ঘটে। ৰাজ বৰুৱা প্ৰখ্যাত ঔপন্যাসিক, সাহিত্য অকাডেমী বঁটা বিজয়ী, বিশিষ্ট লেখক প্ৰয়াত ড° বিৰিঞ্চি কুমাৰ বৰুৱাৰ পুত্ৰ।
মহানগৰীৰ উজান বজাৰৰ বৰুৱা ভিলা নামে পৰিচিত বাসস্থানত ৰাজ বৰুৱাই নিজৰ কৰ্মময় জীৱন অতিবাহিত কৰিছিল। অসম চৰকাৰৰ আভ্যন্তৰীণ জল পৰিবহন বিভাগত উপসঞ্চালক ,সঞ্চালক পদৰ দৰে গুৰুত্বপুৰ্ণ পদত কাৰ্নিৰ্বাহ কৰা বৰুৱাই অবশেষত চাকৰি জীৱন বাদ দি নিজাকৈ ব্যবসায় আৰু উদ্যোগত নিজকে নিয়োজিত কৰিছিল।
কলিকতাৰ মেৰাইন ইঞ্জিনিয়াৰিঙৰ পৰা উচ্চ শিক্ষা লোৱা ৰাজ বৰুৱাৰ মৃত্যুৰ সময়ত বয়স আছিল ৭৬ বছৰ। মৃত্যুৰ সময়ত তেওঁ দুগৰাকী কন্যা আৰু এটি পুত্ৰ সন্তানৰ লগতে লগতে বহুতো আত্মীয় স্বজন, বন্ধু-বান্ধব তথা গুণমুগ্ধক ইহ সংসাৰত এৰি থৈ যায়।
ৰাজ বৰুৱাই তেওঁৰ প্ৰয়াত পিতৃৰ বহু গ্ৰন্থৰ পুনৰ সংস্কৰণৰ কাম হাতত লৈছিল। বহুপঠিত তথা বহুচৰ্চিত ‘আঘোনী’ নামৰ উপন্যাসখন তেওঁ নিজ প্ৰচেষ্টাৰে ড° মিত্ৰা ফুকনৰ দ্বাৰা অনুবাদ কৰি পাঠক সমাজৰ মাজত উলিয়াই দিছিল।
এগৰাকী জাতীয়তাবাদী চিন্তাধাৰাৰ ব্যক্তি ৰাজ বৰুৱাই অসমৰ মৌলিক সমস্যাসমূহৰ সমাধান হোৱাটো মনে প্ৰাণে কামনা কৰিছিল। মৃত্যুৰ পূৰ্বে তেওঁ ” Days with my father Dr Birinchi Kumar Baruah” নামৰ এখনি আত্মজীৱনী মুলক গ্ৰন্থ প্ৰকাশ কৰি থৈ গৈছে।
তেওঁৰ মৃত্যু অসমৰ সমাজ জীৱনৰ বাবে এক অপুৰণীয় ক্ষতি। দেওবাৰে ৰাতিপুৱা তেখেতৰ নশ্বৰ দেহ সুদুৰ মুম্বাইৰ পৰা গুৱাহাটী আহি পোৱা কথা। ৰাজ বৰুৱাৰ মৃত্যুত বিভিন্নজনে শোক প্ৰকাশ কৰিছে।
