যুগ যুগ ধৰি অসমৰ ভূমিপুত্ৰ তথা দ্বিতীয় বৃহৎ জনগোষ্ঠী মিচিং ৰাইজে প্ৰাণৰ তথা জাতীয় কৃষিভিত্তিক উৎসৱ আলি-আ:য়ে-লৃগাং ফাগুনৰ প্ৰথমটো বুধবাৰত পালন কৰি আহিছে।
অসমৰ দ্বিতীয় বৃহৎ জনগোষ্ঠীটোৰ এই পৱিত্ৰ উৎসৱ আলি-আ:য়ে-লৃগাংৰ দিনটোত বাৰে বাৰে দাবী জনাই অহা স্বত্বেও চৰকাৰে বন্ধ ঘোষণা নকৰাটোৱে বিজেপি চৰকাৰখনে যে অসমৰ ভূমিপুত্ৰ সকলক অৱমাননা কৰে সেইয়া দিনৰ পোহৰৰ দৰেই ফটফটীয়া হৈ পৰিছে।
আজি ৰাইজৰ দলৰ মুখ্য কাৰ্যালয়ত জাতীয় যুৱ বাহিনীৰ সাধাৰণ সম্পাদক নির্মল পায়েঙে এখনি সংবাদমেলৰ জৰিয়তে ক্ষোভ প্ৰকাশ কৰি কয়, ” যি সময়ত বিজেপি চৰকাৰখনে জাতি, মাটি,ভেটি ৰক্ষা কৰাৰ শ্ল’গান দি চৰকাৰ গঠন কৰিছিল তেনে সময়ত অসমৰ মিচিং ৰাইজক আজিও প্ৰতাৰণা কৰি আহিছে। মিচিং ৰাইজৰ দীৰ্ঘদিনীয়া দাবী আছিল ফাগুনৰ প্ৰথমটো বুধবাৰ অৰ্থাৎ আলি-আ:য়ে-লৃগাঙৰ দিনা সমগ্ৰ অসমত চৰকাৰী বন্ধ পালন কৰা হওঁক। বিভিন্ন সময়ত চৰকাৰী পক্ষৰ বিভিন্ন নেতা, মন্ত্ৰীয়ে বিভিন্ন ৰাজহুৱা সভাত মিচিং ৰাইজৰ আৱেগ অনুভূতি আদায় কৰিবলৈ প্ৰতিশ্ৰুতি প্ৰদান কৰা সততে দেখা পোৱা যায় যে আলি-আ:য়ে-লৃগাংত চৰকাৰী বন্ধ ঘোষণা কৰা হ’ব। কিন্তু অসম চৰকাৰে প্ৰকাশ কৰা এই বৰ্ষৰ চৰকাৰী বন্ধৰ তালিকাটো বাদ পৰিল মিচিং ৰাইজৰ হেঁপাহৰ আলি-আ:য়ে-লৃগাং। চৰকাৰৰ এই সিদ্ধান্তই মিচিং ৰাইজৰ আৱেগত আকৌ এবাৰ চূড়ান্ত আঘাত কৰিলে। বিজেপি চৰকাৰখনে কেৱল মাত্ৰ মিচিং ৰাইজৰ ভোট আদায় কৰিবৰ বাবে ব্যৱহাৰ কৰি আহিছে মন্ত্ৰী ৰনোজ পেগুৰ দৰে মিচিং জনগোষ্ঠীৰ নেতাক। যি গৰাকী ৰনোজ পেগুৱে মিচিং ৰাইজৰ অৰ্থনৈতিক আন্দোলনৰ ভূমিকা গ্ৰহণ কৰিম বুলি কৈছিল, যি গৰাকী ৰনোজ পেগুৱে মিচিং জনগোষ্ঠীক আৰ্থ-সামাজিক দিশত সৱল কৰিম বুলি আন্দোলনৰ নেতৃত্ব লৈছিল, যি গৰাকী ৰনোজ পেগুৱে মিচিং জনগোষ্ঠীটোৰ সাংস্কৃতিক ক্ষেত্ৰখনৰ বিকাশ কৰিম বুলি প্ৰতিশ্ৰুতি দিছিল, যি গৰাকী ৰনোজ পেগুৱে মিচিং জাতিটোক ৰাজপথলৈ উলিয়াই আনি ষষ্ঠ অনুসূচী প্ৰদান কৰিব লাগিবই বুলি আন্দোলন কৰি আজি বিজেপি চৰকাৰৰ এজন কেবিনেট মন্ত্ৰীৰ মৰ্যাদা পাইছিল, সেই ৰনোজ পেগুয়ে এতিয়া যেন পাহৰি গ’ল সকলো।
মিচিং জনগোষ্ঠীৰ কোনো সমস্যাৰ প্ৰতি ৰনোজ পেগু দায়বদ্ধ যে নহয় সেই কথা আজি আকৌ এবাৰ প্ৰমাণ হৈছে। কেৱল মাত্ৰ নিজৰ ৰাজনৈতিক মুনাফা আদায় কৰাৰ স্বাৰ্থত মিচিং ৰাইজক ব্যৱহাৰ কৰিছে ৰনোজ পেগুৰ দৰে নেতাই। কেইজনমান মুষ্টিমেয় নেতাক নিজৰ হাতত ৰাখি নিজৰ স্বাৰ্থসিদ্ধিৰ বাবে ব্যৱহাৰ কৰি আহিছে হিমন্ত বিশ্ব শৰ্মা তথা বিজেপি চৰকাৰে। যাৰ কাৰণে আজি মিচিং ৰাইজ অস্তিত্বৰ সংকটত ভুগিব লগা হৈছে। আমি ৰাইজৰ দলৰ তৰফৰ পৰা স্পষ্টভাৱে ক’ব বিচাৰো ৰনোজ পেগু এজন মিচিং জাতিৰ বাবে পিতা নহয় মিচিং জাতিৰ মহা প্ৰতাৰক।
মুখ্যমন্ত্ৰী হিমন্ত বিশ্ব শৰ্মাই কেৱল ৰনোজ পেগু, ভূৱন পেগু, নৱ দলে, ভূৱন গামৰ দৰে কেইজনমান নেতাক বিধায়ক বনাই, মন্ত্ৰীত্বৰ দায়িত্ব দিয়েই মিচিং ৰাইজৰ সকলো সমস্যা সমাধান হ’ল বুলি যদি ভাবিছে সেইয়া মূৰ্খৰ স্বৰ্গত বাস কৰিছে। জাতিৰ প্ৰতি কোনো দায়বদ্ধতা নথকা এই নেতা সকলক মিচিং ৰাইজে ভালদৰে চিনি লৈছে। পৰৱৰ্তী সময়ত এওঁলোকৰ দৰে নেতাক আগত ৰাখি হিমন্ত বিশ্ব শৰ্মাই যদি মিচিং ৰাইজৰ পৰা ভোট ভিক্ষা কৰিবলৈ যায়, তেন্তে তাৰ উত্তৰ মিচিং ৰাইজে নিজেই দিব।
