ইতিমধ্যে ছেমি ফাইনেলৰ সপোন শেষ হৈছিল। ডিফেণ্ডিং চেম্পিয়ন ইংলেণ্ডৰ বাবে এইবাৰৰ প্ৰদৰ্শন লজ্জাজনক। পৰাজয়ৰে আৰম্ভ হৈছিল বিশ্বকাপ। দ্বিতীয়খন মেচত জয়ৰ পিছত কেবল পৰাজয়ৰ মুখ দেখিছে ইংলেণ্ডে। একেৰাহে পাঁচখন মেচত পৰাস্ত হোৱাৰ পিছত ইংলেণ্ডৰ আত্মবিশ্বাসো প্ৰায় হেৰুৱাইছিল। অৱশেষত তেওঁলোকে বিজয়ৰ মুখ দেখিলে।
নেদাৰলেণ্ডৰ বিৰুদ্ধেও যথেষ্ট চাপত পৰিছিল ইংলেণ্ড। কিন্তু বেন ষ্ট’কছ আৰু ক্ৰীছ ৱ’কছৰ বেটিঙে ইংলেণ্ডক পুনৰ মেচখনলৈ ঘুৰাই আনে।
ৰান চেজত নেদাৰলেণ্ড অতি আক্ৰমণাত্মক। মাত্ৰ ১৭৯ ৰানতে অল আউট হৈ যায় ডাচ দলটো। অৱশেষত একেৰাহে পাঁচখনত পৰাজয়ৰ পিছত আহিল জয়। ইংলেণ্ডে নেদাৰলেণ্ডক ১৬০ ৰানত পৰাস্ত কৰে।
ইংলেণ্ডে টছত জয়লাভ কৰি বেটিং কৰাৰ সিদ্ধান্ত লয়। প্ৰতিযোগিতাত প্ৰায় বিধ্বস্ত হৈ পৰা ইংলেণ্ড আৰম্ভণিৰে পৰাই বিধ্বংসী হৈ পৰিছিল। ডেভিদ মালানে ৭৪টা বলত ৮৭ ৰানৰ এক আক্ৰমণাত্মক ইনিংছ খেলিছিল।
কিন্তু মাজৰ অভাৰত হঠাতে বিপদত পৰিল ইংলেণ্ড শিবিৰ। ১৩৩-১ৰ স্ক’ৰৰ পৰা ইংলেণ্ডে দ্ৰুতগতিত ১৯২-৬ স্ক’ৰত উপনীত হয়। ডাঙৰ স্ক’ৰৰ সম্ভাৱনা কমি আহিছিল। কিন্তু বেন ষ্ট’কছ তেতিয়াও ক্ৰীজত আছে। সেইটোৱেই আছিল আশা।
বেন ষ্ট’কছ আৰু ক্ৰীছ ৱ’কছে এটা দীঘলীয়া যুটি বান্ধে। ষ্ট’কছৰ বেটৰ পৰা আহে ৮৪ বলত ১০৮ ৰান। আনহাতে, ক্ৰীছ ৱ’কছে ৪৫টা বলত ৫১ ৰান সংগ্ৰহ কৰি উভতি আহে। লৱাৰ অৰ্ডাৰে বিশেষ অৰিহণা যোগাব নোৱাৰিলে। ইংলেণ্ডে নেদাৰলেণ্ডক ৩৪০ ৰানৰ ডাঙৰ লক্ষ্য বান্ধি দিয়ে।
ক্ৰিকেট জগতখনে এদিন পূৰ্বে ৱানখেড়েত মেক্সৱেলৰ যাদুকৰী ইনিংছৰ সাক্ষী হৈছিল। ইয়াৰ দ্বাৰা ডাচ বেটছমেনসকল অনুপ্ৰাণিত হৈছিল নে নাই সেয়া এক কঠিন প্ৰশ্ন। আৰম্ভণিৰে পৰাই নেদাৰলেণ্ডৰ অতি আক্ৰমণাত্মক বেটিং। আৰু তাতেই বিপদত পৰিল দলটো। ৰান ৰেট ভাল হ’লেও ইটোৰ পিছত সিটোকৈ উইকেট হেৰুৱাই থাকে।
অধিনায়ক স্কট এডৱাৰ্ডছে ৩৮ ৰান সংগ্ৰহ কৰি উভতি যায়। সৰ্বোচ্চ সংগ্ৰহ তেজা নিদামাৰুৰ। তেওঁ ৩৪টা বলত ৪১ ৰান কৰি অপৰাজিত হৈ থাকে। নেদাৰলেণ্ডে ৩৭.২ অভাৰত মাত্ৰ ১৭৯ ৰান সংগ্ৰহ কৰি অল আউট হয়।
মইন আলী আৰু আদিল ৰছিদে তিনিটাকৈ উইকেট দখল কৰে। ডেভিড উইলিয়ে লাভ কৰে ২টা উইকেট। ক্ৰীছ ৱ’কছে এটা উইকেট লয় আৰু এটা ৰান আউট কৰে। শতকীয় ইনিংছৰ বাবে মেন অৱ দ্য মেচ হয় বেন ষ্ট’কছ।
