ক্ৰিকেট বিশ্বকাপৰ সামৰণিৰ লগে লগে ভাৰতীয় ক্ৰিকেট দলৰ মুখ্য প্ৰশিক্ষক হিচাপে কাৰ্যকাল সমাপ্ত হৈছিল ৰাহুল দ্ৰাবিড়ৰ। চৰ্চা চলিছিল, কাৰ্যকাল বৃদ্ধিৰ বিবে আগ্ৰহ প্ৰকাশ কৰা নাছিল দ্ৰাবিড়ে।
এনে অৱস্থাত তেওঁৰ স্থানত বৰ্তমান অষ্ট্ৰেলিয়াৰ বিৰুদ্ধে চলি থকা টি-২০ শৃংখলাত ভাৰতীয় দলৰ প্ৰশিক্ষক হিচাপে থকা ভি ভি এছ লক্ষ্মণ প্ৰশিক্ষকৰ পদত অধিষ্ঠিত হ’ব পাৰে বুলিও চৰ্চা চলিছিল।
পিছে এই সকলো চৰ্চাৰ অন্ত পেলাই ভাৰতীয় ক্ৰিকেট দলৰ মুখ্য প্ৰশিক্ষক পদত ৰাহুল দ্ৰাবিড়েই বাহাল থাকিব বুলি নিশ্চিত কৰিছে বিচিচিআয়ে। দ্ৰাবিড়ৰ নতুন চুক্তিৰ কাৰ্যকাল এইপৰ্যন্ত জানিব পৰা হোৱা।
অৱশ্যে অন্তত: অহা বৰ্ষৰ টি-২০ বিশ্বকাপলৈকে চুক্তিবদ্ধ হোৱাৰ সম্ভাৱনা আছে। সূত্ৰ অনুসৰি, ভাৰতীয় ক্ৰিকেট নিয়ন্ত্ৰণ ব’ৰ্ডে দ্ৰাবিড়ক চুক্তি বৃদ্ধিৰ প্ৰস্তাৱ দিয়াৰ পূৰ্বে আশীষ নেহৰাক টি-২০ প্ৰশিক্ষকৰ ভূমিকাৰ বাবে প্ৰস্তাৱ দিছিল।
প্ৰশিক্ষক হিচাপে আইপিএলৰ শেহতীয়া দুটা ছিজনত নেহৰাৰ প্ৰদৰ্শনে সকলোকে আকৰ্ষিত কৰিছিল। কিন্তু বিচিচিআইৰ এই প্ৰস্তাৱ নাকচ কৰে নেহৰাই। ইয়াৰ পিছতে বিচিচিআইয়ে দ্ৰাবিড়ক তিনিওটা ফৰ্মেটতে দলৰ প্ৰশিক্ষক হিচাপে অব্যাহত ৰখাৰ প্ৰস্তাৱ দিয়ে।
দ্ৰাবিড়ৰ লগতে বিচিচিআইয়ে বেটিং প্ৰশিক্ষক বিক্ৰম ৰাথৌড়, বলিং প্ৰশিক্ষক পৰাস মহামব্ৰেই, ফিল্ডিং প্ৰশিক্ষক টি দিলীপকে ধৰি দলৰ আন সহায়ক প্ৰশিক্ষকসকলৰ চুক্তিও বৃদ্ধি কৰিছে।
দ্ৰাবিড়ৰ দ্বিতীয়টো কাৰ্যকালত প্ৰথমটো দায়িত্ব হ’ব ১০ ডিচেম্বৰৰ পৰা দক্ষিণ আফ্ৰিকা ভ্ৰমণ। এই ভ্ৰমণত তিনিখন এদিনীয়া আৰু টি-২০ মেচ আৰু দুখন টেষ্ট অনুষ্ঠিত হ’ব। ইয়াৰ পিছত ইংলেণ্ডৰ বিৰুদ্ধে পাঁচখন টেষ্টৰ ঘৰুৱা শৃংখলা অনুষ্ঠিত হ’ব।
