ক’তো নিৰাপদ নহয়! পাছপ’ৰ্টৰ বাবে থানালৈ যোৱা মহিলা মূৰত গুলী; ‘ভুল কৰি’ গুলী চলোৱা আৰক্ষী বিষয়া পলাতক!

পাছপ’ৰ্ট ভেৰিফিকেচনৰ বাবে থানালৈ গৈ গুলীবিদ্ধ হ’ল এগৰাকী মহিলা। থানাৰ আৰক্ষীৰ উপ-পৰিদৰ্শকে (এছ আই) ‘ভুলতে’ চলোৱা গুলী মহিলাগৰাকীৰ মূৰত লাগে। থিতাতে তেওঁ ঢলি পৰে। শুকুৰবাৰে বিয়লি উত্তৰ প্ৰদেশৰ আলিগড়ৰ এখন থানাত সংঘটিত হয় এই চাঞ্চল্যকৰ ঘটনা।

মহিলাগৰাকীক আলিগড়ৰ জৱাহৰলাল নেহৰু চিকিৎসা মহাবিদ্যালয়ত ভৰ্তি কৰোৱা হৈছে। তেওঁৰ অৱস্থা সংকটজনক। অভিযুক্ত এছ আই গৰাকীৰ নাম মনোজ শৰ্মা। ঘটনাৰ পিছৰে পৰা তেওঁ পলাতক হৈ আছে।

ইপিনে, সমগ্ৰ ঘটনাৰ ভিডিঅ’ থানাৰ চিচিটিভি কেমেৰাত ধৰা পৰে। অৱশ্যে নৰ্থইষ্ট নাওৱে স্বতন্ত্ৰভাৱে ভিডিঅ’টোৰ সত্যতা পৰীক্ষা কৰা নাই।

লগতে পঢ়কঃ অভূতপূৰ্ব! আমাৰ সূৰ্য্যটো দেখিবলৈ কেনেকুৱা? দেখুৱাই দিলে সৌৰযান আদিত্যই

সেই ভিডিঅ’টোত দেখা গৈছে যে ইশ্বৰাট নামৰ মহিলাগৰাকীয়ে পুত্ৰৰ সৈতে পাছপ’ৰ্ট ভেৰিফিকেচনৰ বাবে থানালৈ গৈছিল। তেওঁ দুৱাৰ এখনৰ সন্মুখত থিয় হৈ আছিল। কিছু সময়ৰ পাছত এজন আৰক্ষী বিষয়া আহি এছ আই মনোজৰ হাতত পিষ্টল এটা গতাই দিয়ে। মনোজে পিষ্টল চাফা কৰি থাকোঁতে ‘আকস্মিকভাৱে’ গুলী ওলাই যায়। পিষ্টলটো মহিলাগৰাকীৰ পিনে মুখ কৰি থকাৰ বাবে গুলীটোৱে মহিলাগৰাকীৰ মূৰত আঘাত কৰে। তেওঁ মাটিত পৰি যায়। ৰক্তাক্ত অৱস্থাত তেওঁক হাস্পাতালত ভৰ্তি কৰোৱা হয়।

ইণ্ডিয়া টুডেৰ বাতৰি অনুসৰি জৱাহৰলাল নেহৰু মেডিকেল কলেজৰ অধ্যক্ষ মঞ্জুৰ হৰিছ খানে কয় যে “গুলীটো এতিয়াও মহিলাগৰাকীৰ মূৰত সোমাই আছে। অস্ত্ৰোপচাৰ কৰা হ’ব নে নহয় সেই বিষয়ে আলোচনা চলি আছে।”

A relative of the victim speaks to media. Claims there was dispute over demand of money for passport verification. Police yet to clarify on allegations of the family. pic.twitter.com/ZekwF5HXfc

— Piyush Rai (@Benarasiyaa) December 8, 2023

আলিগড়ৰ জ্যেষ্ঠ আৰক্ষী অধীক্ষক কালানিধি নাইথানীয়ে জানিবলৈ দিয়া মতে, গুলীটোৱে মহিলাগৰাকীৰ মূৰৰ পিছফালে আঘাত কৰে। কৰ্তব্যত অৱহেলাৰ বাবে ততাতৈয়াকৈ চাকৰিৰ পৰা বৰ্খাস্ত কৰা হয় এছ আই গৰাকীক।

लापरवाही के चलते उपरोक्त दरोगा मनोज शर्मा को तत्काल प्रभाव से निलंबित किया गया है तथा उसके विरुद्ध आपराधिक मुकदमा दर्ज किया गया है,घायल महिला का इलाज डॉक्टर की टीम द्वारा किया जा रहा है, घटना के फुटेज की जांच फील्ड यूनिट द्वारा की जा रही है। इस संबंध में एसएसपी की अपडेटेड बाइट । https://t.co/WmueVNfpFp pic.twitter.com/S7Y2n04sSS

— ALIGARH POLICE (@aligarhpolice) December 8, 2023

তেওঁ কয়, “কৰ্তব্য অৱহেলাৰ অভিযোগত এছ আই মনোজৰ বিৰুদ্ধে কঠোৰ ব্যৱস্থা গ্ৰহণ কৰা হ’ব। তেওঁৰ বিৰুদ্ধে ৰুজু হৈছে অপৰাধমূলক গোচৰ। মহিলাগৰাকীৰ চিকিৎসা চলি আছে। সম্প্ৰতি পলাতক হৈ আছে অভিযুক্ত এছ আই। তেওঁক গ্ৰেপ্তাৰ কৰিবলৈ এটা বিশেষ দল গঠন কৰা হৈছে।‘’