বলীউডৰ পৰা ৰাজনীতিলৈ! বিজেপিলৈ শংকা কঢ়িয়াই আনিব নেকি মনোজ বাজপেয়ীয়ে?

মনোজ বাজপেয়ী দেশৰ অন্যতম শ্ৰেষ্ঠ আৰু সুদক্ষ অভিনেতা। ৰাষ্ট্ৰীয় বঁটা বিজয়ী শিল্পীগৰাকীয়ে বিভিন্ন চলচ্চিত্ৰ, ধাৰাবাহিক আৰু ৱেবচিৰিজৰ দ্বাৰা দৰ্শকৰ মন জয় কৰি আহিছে।  

অভিনয়ৰ দ্বাৰাই বিভিন্ন সময়ত সামাজিক বাৰ্তা প্ৰদান কৰি আহিছে অভিনেতাগৰাকীয়ে। এইবাৰ  নিজে সামাজিক কাম কৰাৰ উদ্দেশ্যেৰে ৰাজনীতিৰ পথাৰত ভৰি দিবলৈ মন মেলিছে নেকি মনোজ বাজপেয়ীয়ে?

উল্লেখ্য যে যোৱা এবছৰ ধৰি মনোজ বাজপেয়ী ৰাজনীতিলৈ অহাৰ চৰ্চা চলি আহিছিল। শেহতীয়াকৈ কিছু সূত্ৰই প্ৰকাশ কৰা মতে ৰাজনীতিত যোগ কৰিব অভিনেতাগৰাকীয়ে।  বিহাৰৰ পশ্চিম চম্পাৰণ লোকসভা আসনৰ পৰা বিৰোধী মিত্ৰজোঁটৰ প্ৰাৰ্থী হ’ব পাৰে অভিনেতাগৰাকী। 

চিনেমাৰ জগতখনৰ লগত ৰাজনীতিৰ সম্পৰ্ক বহু পুৰণি। যোৱা কেইটামান দশকত ৰাজনীতিলৈ আহিছে এক বুজন পৰিমাণৰ শিল্পী তথা কলা-কুশলী। ভাৰতীয় ৰাজনীতিত সুনীল দত্ত, জয়া বচ্চনৰ দৰে অভিনেতাৰ প্ৰৱেশ ঘটিছে।  এতিয়া সেই তালিকাত নামভৰ্তি কৰাৰ মানস কৰিছে  নেকি মনোজ বাজপেয়ীয়ে?

খবৰ অনুসৰি বিহাৰত আৰজেডিৰ মুৰব্বী লালু প্ৰসাদ যাদৱক সাক্ষাৎ কৰিছে মনোজ বাজপেয়ীয়ে। শেহতীয়াকৈ এটা নিউজ পৰ্টেলে ছ’চিয়েল মিডিয়াত দাবী কৰিছে যে , মনোজ বাজপেয়ীয়ে পশ্চিম চম্পাৰণ লোকসভা সমষ্টিৰ পৰা বিৰোধী প্ৰাৰ্থী হিচাপে লোকসভা নিৰ্বাচনত প্ৰতিদ্বন্দ্বিতা কৰিব পাৰে।

কিন্তু উক্ত নিউজ পৰ্টেলটোৱে কৰা দাবীক অস্বীকাৰ কৰিছে মনোজ বাজপেয়ীয়ে। এক্স হেণ্ডেলৰ এটা পোষ্টত তেওঁ কৈছে, “বাৰু কওকচোন, কোনে ক’লে এই কথা? নে যোৱা নিশা সপোন দেখিছিল? মোক কওক!” 

Achcha ye bataiye ye baat kisne bola ya kal raat Sapna aaya ? Boliye boliye! https://t.co/8pIbjoxrGR

— manoj bajpayee (@BajpayeeManoj) January 4, 2024

আচলতে লালুপ্ৰসাদক লগ পোৱাৰ পিছত যেতিয়া তেওঁৰ ৰাজনীতিত যোগদানৰ জল্পনা-কল্পনা আৰম্ভ হৈছিল, তেতিয়া মনোজ বাজপেয়ীয়ে সংবাদ সংস্থা পিটিআইক দিয়া সাক্ষাৎকাৰত এই বিষয়ে মুকলিকৈ কৈছিল। সেই সময়ত তেওঁ কৈছিল- যোৱাবাৰ বিহাৰলৈ যোৱাৰ সময়ত লালু প্ৰসাদ যাদৱ আৰু তেওঁৰ পুত্ৰ তথা উপ-মুখ্যমন্ত্ৰী তেজস্বী যাদৱক লগ পাইছিলো। তেতিয়াৰ পৰাই মই ৰাজনীতিত যোগদান কৰিম বুলি জল্পনা-কল্পনা আৰম্ভ হ’ল। মই ২০০ শতাংশ নিশ্চিত যে মই ৰাজনীতি নকৰোঁ। ৰাজনীতিত যোগদানৰ কোনো প্ৰশ্নই নাই।”