ক্ৰিকেটৰ পথাৰৰ পৰা ৰাজনীতিলৈ গতি কৰা দেশৰ প্ৰাক্তন ক্ৰিকেটাৰ আম্বাতি ৰায়ুডু বেছিসময় নিটিকিল ৰাজনীতিৰ ক্ৰীজতো। ৰাজনীতিত যোগদানৰ দহ দিন নহওঁতেই ৰাজনীতিৰ পৰা অব্যাহতি লৈছে ৰায়ুডুৱে।
যোৱা ২৮ ডিচেম্বৰত অন্ধ্ৰ প্ৰদেশৰ শাসকীয় দল যুৱজন শ্ৰমিকা ৰীথু কংগ্ৰেছ পাৰ্টিত (YSRCP) যোগ দিছিল প্ৰাক্তন তাৰকাগৰাকীয়ে। কিন্তু দলটোত যোগদানৰ মাত্ৰ আঠ দিনৰ পিছতে আজি ৰায়ুডুৱে দল ত্যাগ কৰাৰ কথা ঘোষণা কৰে।
উল্লেখ্য যে অন্ধ্ৰ প্ৰদেশৰ মুখ্যমন্ত্ৰী জগন মোহন ৰেড্ডীয়ে শেহতীয়াকৈ আৰম্ভ কৰিছিল ‘আদুধাম অন্ধ্ৰ’ (অন্ধ্ৰ, খেলো আহা) নামৰ ৪৫ দিনীয়া এক ক্ৰীড়া মহোৎসৱ। ইয়াৰ দুদিন পিছতে ২৮ ডিচেম্বৰত ৱাই এছ আৰ চি পিত যোগদান কৰিছিল প্ৰাক্তন তাৰকা ক্ৰিকেটাৰগৰাকীয়ে।
স্থানীয় খবৰ অনুসৰি ক্ৰীড়া মহোৎসৱৰ ব্ৰেণ্ড এম্বেছাদৰ হিচাপে নিযুক্তি পোৱাৰ পিছতো ৰায়ডুয়ে ক্ৰীড়া মহোৎসৱত অংশ লোৱা নাছিল। এক টুইট যোগে ৰায়ুডুৱে ৱাই এছ আৰ চি পি পাৰ্টি এৰি অলপ সময়ৰ বাবে ৰাজনীতিৰ পৰা আঁতৰি থকাৰ সিদ্ধান্ত লৈছে বুলি প্ৰকাশ কৰে।
This is to inform everyone that I have decided to quit the YSRCP Party and stay out of politics for a little while. Further action will be conveyed in due course of time.
Thank You.
— ATR (@RayuduAmbati) January 6, 2024
উল্লেখ্য যে ইংলেণ্ডত অনুষ্ঠিত হোৱা ২০১৯ৰ বিশ্বকাপত দলত স্থান নোপোৱাত ক্ষোভ প্ৰকাশ কৰি ৰায়ুডুৱে আন্তঃৰাষ্ট্ৰীয় ক্ৰিকেটৰ পৰা অৱসৰ ঘোষণা কৰিছিল। ইয়াৰ পিছতে বিগত ইণ্ডিয়ান প্ৰিমিয়াৰ লীগ (আই পি এল) ছিজনৰ অন্তত আম্বাতি ৰায়ুডুৱে সকলো ধৰণৰ ক্ৰিকেটৰ পৰা অৱসৰ গ্ৰহণ কৰে।
ক্ৰিকেটৰ পৰা অৱসৰ ঘোষণা কৰাৰ প্ৰায় এমাহৰ পাছতে তেওঁ অন্ধ্ৰপ্ৰদেশৰ ৰাজনীতিত প্ৰৱেশ কৰি দ্বিতীয় ইনিংছ আৰম্ভ কৰিব বুলি ঘোষণা কৰিছিল।
ৰায়ুডুৱে ২০২৪ চনৰ লোকসভা নিৰ্বাচনত অন্ধ্ৰ প্ৰদেশৰ গুন্টুৰ বা মাচিলিপট্টনম সংসদীয় সমষ্টিৰ পৰা প্ৰতিদ্বন্দ্বিতা কৰিব বুলি অনুমান কৰা হৈছিল। কিন্তু প্ৰাক্তন ক্ৰিকেটাৰগৰাকীয়ে এই সম্ভাৱনা অস্বীকাৰ কৰিছিল। এতিয়া তেওঁৰ আকস্মিক ৰাজনীতি ত্যাগক লৈ চলিছে চৰ্চা।
