ইন্দ্ৰাণী মুখাৰ্জীৰ ডকু-ছিৰিজ ‘ইন্দ্ৰাণী মুখাৰ্জী ষ্টোৰী: দ্য বাৰিড ট্ৰুথ’ (The Indrani Mukerjea Story: Buried Truth ) মুক্তিৰ পূৰ্বেই বিপদত পৰিছে। নেটফ্লিক্সৰ এই ছিৰিজৰ ওপৰত আপত্তি দৰ্শাইছে চিবিআইয়ে। বাতৰি মতে, কেন্দ্ৰীয় তদন্ত সংস্থাটোৱে ইয়াৰ মুক্তিৰ ওপৰত নিষেধাজ্ঞা বিচাৰি আদালতৰ কাষ চাপিছে।
২০১৫ চনত ব্যক্তিগত সংবাদ মাধ্যমৰ মুৰব্বী ইন্দ্ৰাণী মুখাৰ্জীৰ গ্ৰেপ্তাৰত সমগ্ৰ দেশ স্তম্ভিত হৈ পৰিছিল। তেওঁৰ বিৰুদ্ধে নিজ কন্যা শ্বীনা বৰাক হত্যা কৰাৰ অভিযোগ উঠিছিল। প্ৰথম শুনা গৈছিল যে শ্বীনা ইন্দ্ৰানীৰ ভনীয়েক। কিন্তু পিছত গম পোৱা যায় যে শ্বীনা ইন্দ্ৰাণী আৰু তেওঁৰ প্ৰথম স্বামী সঞ্জীৱ খান্নাৰ সন্তান।
২০০২ চনত ইন্দ্ৰানীয়ে সঞ্জীৱৰ সৈতে বিচ্ছেদ ঘটাই পিটাৰ মুখাৰ্জীৰ সৈতে বিবাহপাশত আবদ্ধ হয়। প্ৰথমতে হেনো ইন্দ্ৰানীয়ে নিজৰ কন্যাক ভনীয়েক হিচাপে পিটাৰৰ লগত চিনাকি কৰাই দিছিল। পিটাৰৰ পুত্ৰ ৰাহুলৰ সৈতেও হেনো শ্বীনাৰ সম্পৰ্ক গঢ় লৈ উঠিছিল।
লগতে পঢ়কঃ প্ৰেমিকৰ সৈতে কন্যাৰ পলায়নৰ খবৰ পোৱাৰ পিছত নিজৰেই প্ৰাণ ল’লে দম্পতীয়ে
অভিযোগ অনুসৰি, ২০১২ চনৰ পৰা ৰাহুলে শ্বীনাৰ কোনো খবৰ পোৱা নাই। মাথোঁ তেওঁৰ ফোনত শ্বীনাৰ পৰা এটা ব্ৰেকআপ মেছেজ আহিছিল। সেই সময়ত ইন্দ্ৰানীয়ে কৈছিল যে শ্বীনা আমেৰিকালৈ গৈছে।
২০১৫ চনত ইন্দ্ৰানীৰ গাড়ী চালক শ্যাম ৰায়ক সুকীয়া এটা গোচৰত গ্ৰেপ্তাৰ কৰাৰ পিছতে শ্বীনাৰ হত্যাকাণ্ড পোহৰলৈ আহে। সেই বছৰৰ আগষ্ট মাহত শ্বীনা বৰাৰ হত্যাৰ অভিযোগত ইন্দ্ৰাণী মুখাৰ্জীক গ্ৰেপ্তাৰ কৰা হৈছিল। ইয়াৰ পিছত ছবছৰ বিচাৰাধীন হৈ থকাৰ অন্তত ২০২২ চনত ইন্দ্ৰানীয়ে জামিন লাভ কৰে।
‘ইন্দ্ৰাণী মুখাৰ্জী ষ্টোৰী: দ্য বাৰিড ট্ৰুথ’ এই চাঞ্চল্যকৰ ঘটনাৰ আধাৰত ৰচনা কৰা হৈছে। ২৩ ফেব্ৰুৱাৰীত নেটফ্লিক্সত মুক্তি পোৱাৰ কথা আছে এই ডকু-ছিৰিজখন। কিন্তু তাৰ পূৰ্বে এই মুক্তিৰ ওপৰত নিষেধাজ্ঞা বিচাৰি মুম্বাইৰ বিশেষ আদালতত আবেদন দাখিল কৰা হৈছে। চি বি আইৰ হৈ অধিবক্তা চি জে নামডোডে আবেদন জনাইছে যে গোচৰ নিষ্পত্তি নোহোৱালৈকে তথ্যচিত্ৰখন নেটফ্লিক্সত প্ৰদৰ্শন কৰিব দিব নালাগে।
লগতে পঢ়কঃ কেন্দ্ৰৰ সৈতে আলোচনাত বৰফ গলিল! সদ্যহতে স্থগিত কৃষকৰ দিল্লী চলো অভিযান
চিবিআইৰ বিশেষ আৰক্ষী অধীক্ষক ন্যায়াধীশ নাইক-নিম্বালকাৰে নেটফ্লিক্স এণ্টাৰটেইনমেণ্ট চাৰ্ভিচেছ ইণ্ডিয়া আৰু ডকু-চিৰিজৰ সৈতে জড়িত আন আন প্ৰতিষ্ঠানলৈ জাননী জাৰি কৰিছে। অহা ২০ তাৰিখ পৰৱৰ্তী শুনানিৰ দিন নিৰ্ধাৰণ কৰা হৈছে।
