আন এক জঘন্য হত্যাকাণ্ডই জোকাৰিছে দিল্লী। দক্ষিণ দিল্লীত হত্যাৰ বলি হৈছে এজন ২৯ বৰ্ষীয় জিম ট্ৰেইনাৰ। হত্যাৰ অভিযোগ উত্থাপন হৈছে যুৱকজনৰ খোদ পিতৃৰ বিৰুদ্ধে। ইতিমধ্যে আৰক্ষীয়ে গ্ৰেপ্তাৰ কৰিছে অভিযুক্ত পিতৃক।
লক্ষণীয়ভাৱে বিয়াৰ মাত্ৰ কেইঘণ্টামান পূৰ্বে হত্যা কৰা হৈছে যুৱকজনক। প্ৰকাশিত খবৰ অনুসৰি, অতিথিসকলে বিয়াৰ আনুষ্ঠানিক ৰীতিকৰ্ম আৰম্ভ হোৱালৈ অপেক্ষা কৰি আছিল যদিও নিৰুদ্দেশ হৈ আছিল দৰা গৌৰৱ সিংঘাল।
বৃহস্পতিবাৰে পুৱতি নিশা পাৰ্কত তেজেৰে লুতুৰি-পুতুৰি অৱস্থাত উদ্ধাৰ কৰে গৌৰৱৰ মৃতদেহ। আৰক্ষীয়ে ঘটনা সন্দৰ্ভত ফোনকল লাভ কৰাৰ পিছতে ঘটনাস্থলীত উপস্থিত হয়। মৃত গৌৰৱৰ মুখ আৰু বুকুত ১৫ টাকৈ ছুৰীৰ আঘাত প্ৰত্যক্ষ কৰে বুলি জানিবলৈ দিয়ে আৰক্ষীয়ে।
তদন্তৰ সময়ত আৰক্ষীয়ে ঘৰৰ ভিতৰত তেজ দেখা পায়। মৃতদেহটো লুকুৱাবলৈ চেষ্টা কৰি টানি নিয়াৰ চিনো প্ৰত্যক্ষ কৰে আৰক্ষীয়ে। ইফালে ঘটনাৰ কিছুসময় পিছতে গৌৰৱৰ পিতৃ ৰংলাল সিংঘাল নিৰুদ্দেশ হোৱাক লৈ সন্দেহৰ সৃষ্টি হয়।
আৰক্ষীয়ে নিৰুদ্দিষ্ট ৰংলাল সিংঘালৰ সন্ধানত অভিযান চলাই জয়পুৰৰ পৰা তেওঁক গ্ৰেপ্তাৰ কৰে। তাৰ পিছতে এই হত্যাকাণ্ড সন্দৰ্ভত কিছু তথ্য পোহৰলৈ আহিছে। এগৰাকী উচ্চপ্ৰদস্থ আৰক্ষী বিষয়াই জানিবলৈ দিয়া মতে পিতা-পুত্ৰৰ মাজৰ বিবাদেই এই হত্যাকাণ্ডৰ কাৰণ।
প্ৰিয়ালৰ পছন্দ অনুসাৰে গৌৰৱে বিয়াৰ বাবে আগবাঢ়িছিল যদিও গৌৰৱে আন এগৰাকী যুৱতীৰ সৈতে বিবাহৰ ইচ্ছা কৰিছিল। এই লৈ গৌৰৱে পিতৃ ৰংলাল সিংঘালক অপমান কৰি আহিছিল আৰু সেই খঙতে ৰংলাল সিংঘালে তিনি সহযোগীৰ লগ লাগি হত্যা কৰে গৌৰৱক।
ইতিমধ্যে ৰংলাল সিংঘালক আৰক্ষীয়ে গ্ৰেপ্তাৰ কৰিছে যদিও তেওঁৰ আন তিনিগৰাকী সহযোগী পলাতক অৱস্থাত আছে বুলি জানিব পৰা গৈছে। আৰক্ষীয়ে তিনিও অভিযুক্তৰ সন্ধান চলাই থকাৰ লগতে ঘটনা সন্দৰ্ভত তদন্ত অব্যাহত ৰাখিছে বুলি জানিবলৈ দিয়ে।
