ছবছৰ পূৰ্বে অনন্তকুমাৰ হেগড়েই কৈছিল যে বিজেপিয়ে সংবিধানৰ প্ৰস্তাৱনাৰ পৰা ‘ধৰ্মনিৰপেক্ষ’ শব্দটো আঁতৰাই পেলাব। দেওবাৰে (১০ মাৰ্চ) বিজেপিৰ সাংসদগৰাকীয়ে পুনৰ এই বিষয়টো উত্থাপন কৰে। সংবিধান সলনি কৰিব বিচাৰিলে বিজেপিয়ে যাতে লোকসভাত দুই তৃতীয়াংশ সংখ্যাগৰিষ্ঠতা লাভ কৰে তাৰ বাবে দেশৰ সকলো ভোটাৰক আহ্বান জনায়।
কংগ্ৰেছে সংবিধানৰ প্ৰস্তাৱনা বিকৃত কৰি তাত অপ্ৰয়োজনীয় সংযোজন কৰা বুলি অভিযোগ উত্থাপন কৰে বিজেপিৰ সাংসদগৰাকীয়ে। সংবিধানৰ প্ৰস্তাৱ সংশোধন কৰিবলৈ সংসদৰ দুয়োটা সদনত বিজেপিক দুই তৃতীয়াংশ সংখ্যাগৰিষ্ঠতাৰ প্ৰয়োজন হ’ব বুলি কয় অনন্তকুমাৰ হেগড়েই। তেওঁ কয়, ইয়াৰ বাবে ২০খনতকৈও অধিক ৰাজ্যত বিজেপি ক্ষমতালৈ আহিব লাগিব৷
কৰ্ণাটকৰ পৰা ৬বাৰ লোকসভা নিৰ্বাচনত জয়লাভ কৰিছে অনন্ত কুমাৰ হেগড়ে। দেওবাৰে তেওঁ কয়, “কংগ্ৰেছে বলপূৰ্বকভাৱে সংবিধানত অপ্ৰয়োজনীয় কথা সংযোজন কৰিছে। ইয়াক বিকৃত কৰিছে। বিশেষকৈ হিন্দু সম্প্ৰদায়ক দমন কৰিবলৈ আইন প্ৰৱৰ্তন কৰা হৈছে। বৰ্তমান বিজেপিৰ সংখ্যাগৰিষ্ঠতাৰে সংবিধান সংশোধন বা এই আইনসমূহৰ পৰিৱৰ্তন সম্ভৱ নহয়।”
তেওঁ কয়, “বহুতে বিশ্বাস কৰে যে লোকসভাত কংগ্ৰেছ নাই আৰু লোকসভাত প্ৰধানমন্ত্ৰী মোদীৰ দুই তৃতীয়াংশ সংখ্যাগৰিষ্ঠতা আছে বাবেই এই কাম কৰিব পৰা যাব। কিন্তু সেয়া সম্ভৱ নহয়। সংবিধান সলনি কৰিবলৈ বিজেপিয়ে লোকসভা আৰু ৰাজ্যসভাৰ দুই তৃতীয়াংশ সংখ্যাগৰিষ্ঠতা আৰু ৰাজ্যৰ দুই তৃতীয়াংশ সংখ্যাগৰিষ্ঠতা লাভ কৰাটো প্ৰয়োজন।”
তেওঁ লগতে কয়, “প্ৰধানমন্ত্ৰী মোদীয়ে এই শ্লোগান দিছে, ‘অব কি বাৰ ৪০০ পাৰ। ৪০০ তকৈ অধিক আসন কিয় বিচাৰে? লোকসভাত আমাৰ দুই তৃতীয়াংশ সংখ্যাগৰিষ্ঠতা আছে, কিন্তু, ৰাজ্যসভাত আমাৰ দুই তৃতীয়াংশ সংখ্যাগৰিষ্ঠতা নাই। আনকি ৰাজ্য চৰকাৰসমূহতো আমাৰ হাতত পৰ্যাপ্ত সংখ্যাগৰিষ্ঠতা নাই।”
অনন্ত হেগড়েৰ মতে, আগন্তুক লোকসভা নিৰ্বাচনত এন ডি এয়ে যদি ৪০০ৰো অধিক আসন লাভ কৰে তেন্তে ৰাজ্যসভাত বিজেপিয়েও একেধৰণৰ সংখ্যাগৰিষ্ঠতা লাভ কৰিব পাৰে। এই ৪০০খন আসন লাভ কৰিলে ৰাজ্যসমূহৰ দুই তৃতীয়াংশতো ক্ষমতালৈ অহাত সহায়ক হ’ব৷
তেওঁ শেহতীয়াকৈ কৰ্ণাটকৰ ৰাজ্যসভা নিৰ্বাচনৰ কথা উল্লেখ কৰে। কংগ্ৰেছে তিনিখন আসন লাভ কৰিছিল, বিজেপিয়ে মাত্ৰ এখন আসন লাভ কৰিছিল। হেগড়েই কয় যে ৰাজ্যসভাত কংগ্ৰেছৰ সংখ্যা বৃদ্ধি হ’লে বিজেপি চৰকাৰে যদি কোনো সাংবিধানিক সংশোধনী আনে তেন্তে ৰাজ্যসভাত ৰুদ্ধ হৈ পৰিব।
নাগৰিকত্ব (সংশোধনী) আইন বা CAAৰ উদাহৰণ দি তেওঁ কয়, যদিও বিধেয়কখন লোকসভা আৰু ৰাজ্যসভাই গৃহীত কৰিছে, তথাপিও কেইবাখনো ৰাজ্য চৰকাৰে এই আইনত সন্মতি দিয়া নাই। সেয়ে আইনখন কাৰ্যকৰী কৰিব পৰা নাই।
২০১৭ চনত অনন্ত হেগড়ে দক্ষতা বিকাশ মন্ত্ৰালয়ৰ ৰাজ্যিক মন্ত্ৰী পদৰ পৰাই সাংবিধানিক সংশোধনী সন্দৰ্ভত মন্তব্য কৰিছিল। যাৰ বাবে তেওঁ তীব্ৰ বিতৰ্কৰ সন্মুখীন হৈছিল।
কৰ্ণাটকৰ উপ-মুখ্যমন্ত্ৰী তথা ৰাজ্যিক কংগ্ৰেছৰ সভাপতি ডি কে শিৱকুমাৰে কয় যে বিজেপি সংবিধানৰ বিৰোধী, অনন্ত হেগড়েৰ মন্তব্যৰ পৰা সেয়া স্পষ্ট। তেওঁ কয় যে “তেওঁলোকক সেইটো কৰিবলৈ দিয়ক, সংবিধান সংশোধন কৰক। অৰ্থাৎ কেন্দ্ৰৰ বিজেপি চৰকাৰ আৰু বিজেপিৰ সাংসদ বাবাচাহেব আম্বেদকাৰে প্ৰণয়ন কৰা সংবিধানৰ বিৰোধী। মই তেওঁক (অনন্তকুমাৰ হেগড়ে) ক’ম, আপোনাৰ মন্তব্যত প্ৰধানমন্ত্ৰীৰ পৰা ষ্টাম্প মৰাই লওক।”
