নিৰ্বাচনী বণ্ডক লৈ সৃষ্টি হোৱা বিতৰ্কৰ মাজতে দেশৰ ৰাজনৈতিক দলসমূহক ৪ হাজাৰ কোটি টকাৰ দান আগবঢ়োৱা ১৪টা কোম্পানী ইডি-চিবিআইৰ নজৰত আছিল বুলি জানিব পৰা গৈছে। ষ্টেট বেংক অফ ইণ্ডিয়াৰ তথ্য নিৰ্বাচন আয়োগে প্ৰকাশ কৰাৰ পিছৰে পৰা ইমান দিনে গোপনে ৰখা ৰহস্যাটো চাঞ্চল্যকৰভাৱে ওলাই পৰিছে।
জানিব পৰা গৈছে যে কেন্দ্ৰীয় তদন্ত সংস্থাই ইয়াৰ পূৰ্বেও কেইবাবাৰো দানবীৰ কোম্পানীসমূহৰ ভিতৰত ১৪টা কোম্পানীৰ দুৱাৰত টোকৰ মাৰিছিল। এই তালিকাৰ শীৰ্ষত আছে ‘লটাৰী কিং’ মাৰ্টিন চেণ্টিয়াগোৰ ফিউচাৰ গেমিং এণ্ড হোটেল চাৰ্ভিচেছ। যিয়ে ১৩৬৮ কোটি বণ্ড ক্ৰয় কৰিছিল।
এই পৰিপ্ৰেক্ষিতত দেশৰ বিত্তমন্ত্ৰী নিৰ্মলা সীতাৰমণে দাবী কৰে যে নিৰ্বাচনী বণ্ড ক্ৰয় আৰু সংস্থাটোৰ তদন্তৰ সম্পৰ্ক সম্পূৰ্ণৰূপে জল্পনা-কল্পনাৰ ওপৰত ভিত্তি কৰি গঢ় লৈ উঠিছে। তেওঁ পূৰ্বৰ অৰ্থাৎ কংগ্ৰেছৰ শাসনকালৰ ব্যৱস্থাক লৈ প্ৰশ্ন উত্থাপন কৰে। তেওঁ কয় `আমি পূৰ্বৰ ব্যৱস্থাৰ পৰা সলনি হ’বলৈ চেষ্টা কৰিছো।‘
লগতে পঢ়কঃ ‘মই পদ্মশ্ৰী পোৱা উচিত’, মন্তব্য শ্বীনা বৰাৰ হত্যাৰ অভিযুক্ত ইন্দ্ৰাণী মুখাৰ্জীৰ
প্ৰকাশিত তথ্য অনুসৰি দেশৰ দলসমূহক ৪ হাজাৰ কোটি টকা বৰঙণি আগবঢ়োৱা বহু কোম্পানী বিগত চাৰি বছৰ ধৰি আইনৰ চকুত নজৰবন্দী হৈ পৰিছে। বিৰোধী দল কংগ্ৰেছ এই বিষয়ত সৰৱ হৈ পৰিছে। বিৰোধীসকলে অভিযোগ কৰে যে বহু কোম্পানীয়ে চান্দা দিয়াৰ পিছতে বিশাল নিবিদা লাভ কৰে।
ষ্টেট বেংকে নিৰ্বাচন আয়োগক প্ৰদান কৰা তথ্য অনুসৰি ২০১৯ চনৰ পৰা ২০২৪ চনলৈ লটাৰী মাফিয়াই ১৩৬৮ কোটি টকাৰ নিৰ্বাচনী বণ্ড ক্ৰয় কৰিছিল। ২০১৯ চনৰ পৰা ধন সৰবৰাহৰ প্ৰতিৰোধ আইন (পিএমএলএ)ৰ অধীনত ইডিৰ নজৰত আছে ছান্টিয়াগো মাৰ্টিন।
২০২৩ চনৰ মে’ মাহত কইম্বাটুৰ আৰু চেন্নাইত ইডিৰ বিষয়াসকলে তালাচী চলাইছিল। চিবিআইৰ চাৰ্জ শ্বীটতো তেওঁৰ নাম আছে। ইয়াত অভিযোগ কৰা হৈছিল যে ফিউচাৰ গেমিংয়ে ছিকিম চৰকাৰৰ লটাৰীক কেৰালাৰ খুচুৰা ব্যৱসায়লৈ ৰূপান্তৰিত কৰিছিল। ফলত ছিকিম চৰকাৰৰ লোকচান হ’ল ৯১০ কোটি টকা।
নিৰ্বাচনী বণ্ড ক্ৰেতাসকলৰ ভিতৰত আছে হায়দৰাবাদৰ মেঘা ইঞ্জিনিয়াৰিং এণ্ড ইনফ্ৰাষ্ট্ৰাকচাৰ। যিয়ে ৯৬৬ কোটি টকাৰ বণ্ড ক্ৰয় কৰিছিল। ইয়াৰ মালিক তেলেগু ব্যৱসায়ী কৃষ্ণ ৰেড্ডী। তেওঁ ইডি আৰু চিবিআইৰ নজৰত আছে। কেৱল এয়াই নহয়, মেঘাৰ সহযোগী কোম্পানীসমূহেও বণ্ড ক্ৰয় কৰিছে। সৰ্বমুঠ মূল্য ১২০০ কোটি টকাৰ।
লগতে পঢ়কঃ দিল্লী সুৰা নীতি গোচৰত বি আৰ এছ নেত্ৰী কে কবিতাক গ্ৰেপ্তাৰ ইডিৰ
ইডি আৰু চিবিআইৰ নজৰত থকা আন দানবীৰ কোম্পানী নাম হ’ল, এপ’ল’ টায়াৰ, ভাৰতী এয়াৰটেল, ছিট টায়াৰ, চিপলা, ডিএলএফ কমাৰ্চিয়েল ডেভেলপাৰ্ছ, ডাঃ ৰেড্ডীজ লেবৰেটৰীজ, এডেলৱেইছ, গ্ৰাছিম ইণ্ডাষ্ট্ৰীজ, ইণ্ডিগো, আইটিচি, জিন্দাল গ্ৰুপ, কভেণ্টাৰ, কেপি এণ্টাৰপ্ৰাইজ, ফিলিপছ কাৰ্বন ব্লেক, পিৰামল এণ্টাৰপ্ৰাইজেছ, পিভিআৰ, স্পাইচজেট , চুলা ৱাইনছ, ছান ফাৰ্মা, টৰেণ্ট পাৱাৰ, আল্ট্ৰাটেক চিমেণ্ট, বুৰ্ডৱান টেক্সটাইলছ, বেদান্ত আৰু ৱেলস্পান।
