২০১৫ চনত এক ব্যক্তিগত সংবাদ মাধ্যমৰ মুৰব্বী ইন্দ্ৰাণী মুখাৰ্জীক গ্ৰেপ্তাৰৰ ঘটনাত সমগ্ৰ দেশ স্তম্ভিত হৈ পৰিছিল। তেওঁৰ বিৰুদ্ধে নিজৰ কন্যা শ্বীনা বৰাক হত্যা কৰাৰ অভিযোগ উঠিছিল। অৱশ্যে ২০২২ চনত তেওঁ জামিন লাভ কৰে।
শেহতীয়াকৈ এই ঘটনাৰ ওপৰত নিৰ্মিত এখন তথ্যচিত্ৰ ‘ইন্দ্ৰাণী মুখাৰ্জী ষ্টৰী: দ্য বাৰিড ট্ৰুথ’য়ে অ’টিটিৰ মঞ্চত জোকাৰণি তুলিছে। এনে অৱস্থাত ইন্দ্ৰানীয়ে তেওঁক পদ্মশ্ৰী দিয়া উচিত বুলি কোৱাও শুনা গ’ল। যদিও তেওঁ এই কথা শ্লেষ হিচাপে ব্যৱহাৰ কৰিছিল।
ইন্দ্ৰানীয়ে এক অনুষ্ঠানত অংশ লৈছিল। তাত তেওঁৰ ওপৰত হোৱা ‘মিডিয়া ট্ৰায়েল’ৰ অভিযোগ উত্থাপন কৰে। তেওঁ কয়, “সেই সময়ত ইয়াক (শ্বীনা বৰা হত্যাকাণ্ড) লৈ বহুত `হাইপ’ হৈছিল। মিডিয়া ট্ৰায়েলৰ সন্মুখীন হ’বলগীয়া হৈছিল৷ মোৰ বিষয়ে নিৰ্মিত তথ্যচিত্ৰৰ পৰা বহুতে টকা উপাৰ্জন কৰিছে। কেৱল প্ৰডাকচন হাউচেই নহয়, মিমৰ পৰাও। হয়তো মই সংবাদ মাধ্যমক এটা ‘হট টপিক’ দিছো। তাৰ ফলস্বৰূপে মই দেশৰ অৰ্থনীতিত অৰিহণা যোগাবলৈ সক্ষম হৈছো। আৰু সেইবাবে মই পদ্মশ্ৰী পোৱা উচিত।” কথাখিনি কোৱাৰ লগে লগে তেওঁ হাঁহিও দিলে।
লগতে পঢ়কঃ দেশৰ ৬০ শতাংশ বিবাহিত পুৰুষ-মহিলাই পৰকীয়াত আসক্ত! চাঞ্চল্যকৰ তথ্য সমীক্ষাত
শেহতীয়াকৈ ইন্দ্ৰানীক লৈ নিৰ্মিত তথ্যচিত্ৰখন মুক্তি লাভ কৰিছে। ছবিখন মুক্তিৰ পূৰ্বে আইনী সমস্যাত পৰিছিল। পিছলৈ ইয়াক নেটফ্লিক্সৰ পৰ্দাত মুক্তি দিয়া হয়। তাৰ পিছত এই তথ্যচিত্ৰখন চৰ্চিত হৈ পৰিছে। তাত ইন্দ্ৰানীয়ে আত্মপক্ষৰ সমৰ্থনত বহু কথা কৈছে । তেওঁৰ বিৰুদ্ধে উত্থাপিত অভিযোগ সম্পূৰ্ণ মিছা বুলিও দাবী কৰিছে ইন্দ্ৰাণীয়ে।
