এইবাৰ প্ৰেক্ষাপটত দেশৰ অগ্ৰগণ্য উদ্যোগী মুকেশ আম্বানী৷ ৰাধিকা মাৰ্চেণ্টৰ সৈতে উদ্যোগপতি মুকেশ আম্বানীৰ পুত্ৰ অনন্ত আম্বানীৰ বিবাহ অনুষ্ঠানৰ তিনিদিনীয়া উদ্যাপনৰ বাবে মাৰ্চ মাহৰ আৰম্ভণিতে গুজৰাটৰ জামনগৰত ভাৰত আৰু বিদেশৰ বহু চেলিব্ৰিটি উপস্থিত হৈছিল, যাৰ বাবে বিমান পৰিবহণৰ হাৰ অভূতপূৰ্ব বৃদ্ধি পোৱা দেখা গৈছিল।
লগতে পঢ়ক: কিয় হয় মুখৰ ভিতৰত এনেকুৱা ঘাঁ? কেনেকৈ লাভ কৰিব আৰোগ্য?
এতিয়া দ্য হিন্দুৱে সূত্ৰৰ উদ্ধৃতি দি এক প্ৰতিবেদনত কয় যে পাঁচ দিনত প্ৰায় ৬০০খন বিমান জামনগৰলৈ আহিছিল আৰু যাত্ৰা কৰিছিল৷ এই সকলোবোৰ বিমানৰ ৰক্ষণাবেক্ষণৰ দায়িত্ব ভাৰতীয় বায়ুসেনাই গ্ৰহণ কৰিছিল বুলি জানিব পৰা কৈছে৷
ইয়াৰ পূৰ্বেও একেখন কাকতে যোৱা মাহত প্ৰকাশ কৰিছিল যে ২৬ ফেব্ৰুৱাৰীৰ পৰা ৬ মাৰ্চলৈ জামনগৰ বিমানবন্দৰক আন্তঃৰাষ্ট্ৰীয় বিমানবন্দৰৰ অস্থায়ী মৰ্যাদা দিয়া হৈছিল কাৰণ বহু বিদেশী হাই প্ৰফাইল লোকো আম্বানী পৰিয়ালৰ অতিথি তালিকাত অন্তৰ্ভুক্ত হৈছিল। যিহেতু জামনগৰ বিমানবন্দৰ এটা প্ৰতিৰক্ষা বিমানবন্দৰ আৰু পাকিস্তান সীমান্তৰ ওচৰতো, সেয়েহে বিৰোধী দল কংগ্ৰেছেও ব্যক্তিগত অনুষ্ঠানৰ বাবে এনে অনুমতি দিয়াৰ সন্দৰ্ভত প্ৰশ্ন উত্থাপন কৰিছিল।
লগতে পঢ়ক: দেশৰ শাসকে কেৱল ধনীক শ্ৰেণীৰ বাবেহে চিন্তা কৰিছে : লোকসভা নিৰ্বাচনৰ পূৰ্বে অৰ্মত্য সেনৰ মন্তব্য
এতিয়া বাতৰি কাকতখনে এক সূত্ৰৰ উদ্ধৃতিৰে প্ৰকাশ কৰিছে যে ৰিলায়েন্স গ্ৰুপৰ হৈ প্ৰতিৰক্ষা সচিবলৈ লিখা এখন পত্ৰত ২০২৪ চনৰ ২৩ ফেব্ৰুৱাৰীৰ পৰা ৪ মাৰ্চলৈ আকাশমাৰ্গৰ ২৪×৭ অপাৰেচনৰ বাবে ভাৰতীয় বায়ুসেনাৰ সহায় বিচৰা হৈছিল। এই সন্দৰ্ভত বায়ুসেনাৰ মুৰব্বীৰ সৈতে প্ৰতিৰক্ষা সচিবগৰাকীয়ে কথা পাতিছিল, তাৰ পাছত ২৪ ঘণ্টাই জামনগৰ বিমানবন্দৰ কাৰ্যক্ষম হৈ উঠিছিল।সূত্ৰ অনুসৰি প্ৰথম অৱস্থাত মাত্ৰ ৩০-৪০খন বিমানৰ কথাহে চৰ্চা হৈছিল যদিও বাস্তৱত পাঁচ দিনত ৬০০ৰো অধিক বিমানৰ গতিবিধি হৈছিল।
জামনগৰ হৈছে দ্বৈত ব্যৱহাৰকাৰী বিমানবন্দৰ য’ত ভাৰতীয় বায়ুসেনাই ভাৰতীয় বিমানবন্দৰ কৰ্তৃপক্ষৰ সৈতে মিলি অসামৰিক বিমানৰ চলাচলৰ বাবে বিমান পৰিবহণ ব্যৱস্থাপনা চম্ভালে।
আন এক সূত্ৰই জনোৱা মতে, ভাৰতীয় বায়ুসেনাৰ জোৱানসকলে টেক্সি ট্ৰেক তৈয়াৰ কৰি এই অনুষ্ঠানৰ বাবে অহা বৃহৎ বিমানসমূহৰ বাবে ৰানৱে প্ৰস্তুত কৰিছিল। বায়ুসেনাই দহটা পিট ষ্টপ কৰিছিল, যাতে ১০খন বিমান সমান্তৰাল টেক্সি ট্ৰেকত অৱতৰণ কৰিব পাৰে।সূত্ৰই জনোৱা মতে, যেতিয়া ৰিলায়েন্সে প্ৰদান কৰা কৰ্মচাৰীৰ অভাৱ ঘটিছিল, তেতিয়া ভাৰতীয় বায়ুসেনাই নিজাকৈ জোৱান নিয়োগ কৰিছিল।
