গুজৰাটত শাসকীয় বিজেপিৰ বিপদঘণ্টা বজাইছে ৰাজপুত সম্প্ৰদায়ে। গুজৰাটৰ বিজেপিৰ সাংসদ প্ৰাৰ্থী পুৰুষোত্তম ৰূপালাই দৌছাৰ শ্ৰী ভৱনী ৰাজপুত হোষ্টেলত ছাত্ৰীক অসভ্য ভাষাৰে গালি-গালাজ কৰাৰ বিৰুদ্ধে ৰাজুপত সম্প্ৰদায়ে বিৰুদ্ধে প্ৰতিবাদ সাব্যস্ত কৰে। তেওঁলোকে প্ৰতিবাদ কৰি বিজেপিৰ প্ৰাৰ্থীগৰাকীৰ টিকট বাতিলৰ দাবী জনায়।
ইফালে ৰাজপুত সমাজৰ বুদ্ধিজীৱীসকলৰ দাবী যে ৰাজপুত ইতিহাসক বিকৃত কৰা হৈছে, যিটো ৰাজপুত সমাজে কেতিয়াও সহ্য নকৰে। তেওঁলোকে কয় যে ৰাজপুত সম্প্ৰদায়ে সদায় বিজেপিক শক্তিশালী কৰাৰ বাবে কাম কৰি আহিছে। ভাৰতীয় জনতা পাৰ্টিক ক্ষমতালৈ অনা একমাত্ৰ সমাজখনেই হৈছে ৰাজপুত। তাৰ পিছতো ভাৰতীয় জনতা পাৰ্টিৰ নেতা আৰু শীৰ্ষ নেতৃত্বই ৰাজপুত সমাজক আওকাণ কৰিছে। এই কথা ৰাজপুত সমাজে কেতিয়াও সহ্য নকৰে আৰু আমি বিজেপি বৰ্জন কৰিবলৈ বাধ্য হম। এইদৰে সোচ্চাৰ হৈ পৰিছে প্ৰতিবাদী ৰাজপুত সমাজ।
ৰাজপুত সমাজৰ নেতৃবৃন্দই কয় যে বিজেপিক শক্তিশালী কৰাত ৰাজপুত সম্প্ৰদায়ৰ যুৱক-যুৱতীসকলে কটোৰ পৰিশ্ৰম কৰিলে, তাৰপাছতো ৰাজপুত নাৰী সমাজ আৰু ৰাজুপুক ইতিহাসৰ সৈতে বিজেপিয়ে যিটো আচৰণ কৰিছে সেইটো অসহনীয়। সেয়ে কঠোৰ পদক্ষেপ ল’বলৈ বাধ্য হ’ব ৰাজপুত সমাজ।
ইফালে শ্ৰী ৰাজপুত কৰ্ণী সেনাৰ ৰাজ্যিক সম্পাদক যশৱন্ত সিং বন্দিকুৱে কয় যে গুজৰাটৰ ৰাজকোটত বিজেপিৰ প্ৰাৰ্থী তথা প্ৰাক্তন কেন্দ্ৰীয় মন্ত্ৰী পুৰুষোত্তম ৰূপালাই ক্ষত্ৰীয় মহিলাৰ ওপৰত অশ্লীল মন্তব্য কৰিছে। ইয়াৰ বিৰুদ্ধে সমগ্ৰ ৰাজপুত সমাজত ক্ষোভৰ সৃষ্টি হৈছে। বিজেপিয়ে পুৰুষোত্তম ৰূপলাৰ টিকট বাতিল নকৰালৈকে এই প্ৰতিবাদ বন্ধ নহয়। বিজেপিক সকলোতে বৰ্জন কৰা হ’ব।
ৰাজপুত সমাজৰ এই বিজেপি বিৰোধিতাই এতিয়া বিপদত পেলাইছে শাসকীয় বিজেপিক। প্ৰকাশিত বাতৰিৰ মতে উত্তৰ প্ৰদেশতো ৰাজপুতসকলে বিজেপি বিৰোধী স্থিতি লৈছে। বিশেষকৈ মুখ্যমন্ত্ৰী যোগী আদিত্য নাথৰ আচৰণে ক্ষোভিত কৰি তুলিছে উত্তৰ প্ৰদেশৰ ৰাজপুত সমাজক।
আনহাতে ৰাজপুত সমাজে ‘কমল কা ফুল আমাৰ ভুল’ শ্লোগানেৰে বিজেপি বিৰোধী স্থিতি লোৱাৰ বাবেই এসময়ত ৰাজস্থান, মধ্যপ্ৰদেশ আৰু ছত্তীশগড় তিনিখন ৰাজ্যত বিজেপি নিঃশেষ হৈ গৈছিল বুলিও দাবী কৰিছে ৰাজপুত সমাজে। আকৌ এবাৰ বিজেপিয়ে একে ভুলৰ পুনৰাবৃত্তি কৰিলে ২০২৪ত প্ৰধানমন্ত্ৰী মোদী তথা বিজেপিয়ে ভয়ংকৰ পৰিণামৰ সন্মুখীন হ’ব লাগিব। এইদৰে বিজেপিক হুংকাৰ দিছে ৰাজপুত সমাজে।
