প্ৰতি বছৰে আমেৰিকাৰ টাইম আলোচনীয়ে বিশ্বৰ আটাইতকৈ প্ৰভাৱশালী ব্যক্তিসকলৰ তালিকা প্ৰকাশ কৰে। সম্পত্তি, আন্তঃৰাষ্ট্ৰীয় প্ৰভাৱ আদিৰ ভিত্তিত দেশ-বিদেশৰ বিভিন্ন প্রভাৱশালী ব্যক্তিৰ নাম সন্নিৱিষ্ট কৰা হয় উক্ত তালিকাত।
বুধবাৰে টাইম আলোচনীয়ে ২০২৪ চনত বিশ্বৰ ১০০ জন প্ৰভাৱশালী ব্যক্তিৰ নাম প্ৰকাশ কৰে। সেই তালিকাত আছে আলিয়া ভাট, সাক্ষী মালিককে ধৰি মুঠ ৮ গৰাকী ভাৰতীয়ৰ নাম।
টাইম আলোচনীয়ে প্ৰকাশ কৰা ২০২৪ চনৰ এই তালিকাত আছে বলীউডৰ অভিনেত্ৰী আলিয়া ভাট, ভাৰতৰ প্ৰথমগৰাকী মহিলা অলিম্পিক পদক বিজয়ী সাক্ষী মালিক, ভাৰতীয়-ব্ৰিটিছ অভিনেতা দেৱ পেটেল, মাইক্ৰ’ছফ্টৰ চিইঅ’ সত্য নাডেলা, বিশ্ব বেংকৰ মূৰব্বী অজয় বাংগা আদি কেইবাগৰাকীও প্ৰভাৱশালী ব্যক্তিৰ নাম।
লগতে এই তালিকাত আছে আমেৰিকাৰ শক্তি বিভাগৰ ঋণ কাৰ্যসূচী কাৰ্যালয়ৰ সঞ্চালক জিগাৰ শ্বাহ, ইয়েল বিশ্ববিদ্যালয়ৰ জ্যোতিৰ্বিজ্ঞান আৰু পদাৰ্থ বিজ্ঞানৰ অধ্যাপিকা প্ৰিয়মবাদ নটৰাজন আৰু ভাৰতীয় মূলৰ ৰেষ্টুৰেণ্টৰ মালিক আছমা খান।
ঊল্লেখ্য যে এই তালিকা প্ৰকাশ পোৱাৰ পিছতে পৰিচালক, প্ৰযোজক আৰু লেখক টম হাৰ্পাৰে আলিয়াক ‘দীপ্ত প্ৰতিভা’ বুলি অভিহিত কৰে। তেওঁ কয়, “আলিয়াই ভাৰতীয় চলচ্চিত্ৰ জগতত এক দশকৰো অধিক সময় ধৰি কৰা অসাধাৰণ কামৰ বাবে প্ৰশংসা লাভ কৰি আহিছে। তেওঁ কেৱল বিশ্বৰ অন্যতম আগশাৰীৰ অভিনেতাই নহয়, তেওঁ এগৰাকী সফল ব্যৱসায়ী আৰু এগৰাকী দানবীৰ যিয়ে সকলো কাম সততাৰে পৰিচালনা কৰে।”
দেৱ পেটেলৰ শিল্পকৰ্মৰ বিষয়ে অস্কাৰৰ বাবে মনোনীত অভিনেতা ডেনিয়েল কালুয়াই লিখিছে, “দেৱৰ মানৱতাবাদী চিন্তা তেওঁৰ প্ৰতিখন চিনেমাত জিলিকি উঠে। তেওঁৰ শেহতীয়া চিনেমা ‘মাংকি মেন’ মোৰ একেবাৰে প্ৰিয়।”
অলিম্পিয়ান সাক্ষী মালিকক টাইম আলোচনীয়ে ভাৰতৰ “সকলোতকৈ বিখ্যাত মল্লযুঁজাৰু” বুলি অভিহিত কৰি উল্লেখ কৰে যে সাক্ষীয়ে মহিলা মল্ল যুঁজাৰুক যৌন নিৰ্যাতন চলোৱাৰ অভিযোগত তেতিয়াৰ ভাৰতীয় মল্লযুঁজ ফেডাৰেচনৰ মুৰব্বী ব্রিজ ভূষণ সিঙক শীঘ্ৰে গ্ৰেপ্তাৰ কৰাৰ দাবীত ৰাজপথত দীঘলীয়া প্ৰতিবাদ সাব্যস্ত কৰিছিল।
