লক্ষ্ণৌ ছুপাৰ জায়েন্টছৰ অধিনায়ক লোকেশ ৰাহুলে নেতৃত্বৰ পৰা পদত্যাগ কৰিব পাৰে। আই পি এল লীগৰ অন্তিম দুখন মেচত সঞ্জীৱ গোৱেংকা ফ্ৰেঞ্চাইজিক নেতৃত্ব দিয়াৰ সম্ভাৱনা আছে উপ-অধিনায়ক নিকোলাছ পুৰানে। বুধবাৰে খেলৰ পাছত ফ্ৰেঞ্চাইজিৰ মালিকৰ ব্যৱহাৰক লৈ বৰ ক্ষুব্ধ হৈ পৰিছে ৰাহুল।
বুধবাৰে ছানৰাইজাৰ্ছ হায়দৰাবাদৰ হাতত লক্ষ্ণৌৰ পৰাজয়ৰাপিছত দলৰ স্বত্বাধিকাৰী গোৱেংকাই খেলপথাৰত নামি ৰাজহুৱাভাৱে ৰাহুলক ধমক দিয়ে। সেই ঘটনাৰ ভিডিঅ’ ছ’চিয়েল মিডিয়াত ভাইৰেল হৈ পৰিছে। সমালোচনাৰ সন্মুখীন হৈছে লক্ষ্ণৌৰ ফ্ৰেঞ্চাইজি কৰ্তৃপক্ষ। গোৱেংকাৰ আচৰণক লৈ প্ৰশ্ন উত্থাপন হৈছে। সূত্ৰসমূহে প্ৰকাশ কৰা অনুসৰি ৰাজহুৱাভাৱে অপমানিত হৈ ৰাহুলে নেতৃত্ব ত্যাগ কৰাৰ সিদ্ধান্ত লৈছে। গোৱেংকাৰ দলৰ হৈ খেলিবলৈ এতিয়া আৰু আগ্ৰহ ৰাহুলৰ ইচ্ছা নাই। আনহাতে, লক্ষ্ণৌৰ ফ্ৰেঞ্চাইজিয়েও অহা বছৰ আই পি এলৰ নিলামত ৰাহুলক আগুৱাই যাবলৈ দিব পাৰে। এনে পৰিস্থিতিত ভাৰতীয় দলৰ প্ৰবীণ উইকেটকীপাৰ-বেটছমেনগৰাকীৰ পদত্যাগ কথাই চৰ্চা লাভ কৰিছে৷
আই পি এলত লক্ষ্ণৌৰ পৰৱৰ্তী মেচ হ’ব ১৪ মে’ত দিল্লী কেপিটেলছৰ বিৰুদ্ধে। ইয়াৰ মাজতে ৰাহুলে পদত্যাগ কৰাৰ সিদ্ধান্তৰ বিষয়ে ফ্ৰেঞ্চাইজি কৰ্তৃপক্ষক অৱগত কৰিব পাৰে। আই পি এলৰ এজন বিষয়াই কয়, ‘দিল্লীৰ বিৰুদ্ধে পৰৱৰ্তী মেচ খেলাৰ পাঁচ দিন আগতে কোনো পক্ষই এতিয়ালৈকে চূড়ান্ত সিদ্ধান্ত লোৱা নাই। এনে লাগে যেন ৰাহুলে নেতৃত্বৰ পৰা পদত্যাগ কৰিব। এনে লাগে যেন ফ্ৰেঞ্চাইজি কৰ্তৃপক্ষয়ো তেওঁৰ পদত্যাগ মানি ল’ব।’ বুধবাৰৰ মেচখনৰ পাছতে ৰাহুলৰ সৈতে গোৱেংকাৰ সম্পৰ্ক তিক্ত হৈ পৰিছে বুলি বিষয়াগৰাকীয়ে জানিবলৈ দিয়ে।
এইবাৰৰ আই পি এলত ৰাহুলে এই পৰ্যন্ত ১২খন খেলত ৪৬০ ৰান সংগ্ৰহ কৰিছে। তেওঁৰ ষ্ট্ৰাইক ৰেট ১৩৬.০৯। বুধবাৰে তেওঁ ৩৩টা বলত ২৯ ৰান সংগ্ৰহ কৰে। পাৱাৰ প্লে’ৰ সুবিধা ল’ব নোৱাৰিলে ৰাহুলে। হায়দৰাবাদৰ হাতত পৰাজয়ৰ ফলত লক্ষ্ণৌৰ আই পি এল প্লে অফলৈ যোৱাৰ সম্ভাৱনা আৰু অধিক কঠিন হৈ পৰিছে। যদিও ১৬ পইণ্ট লাভ কৰাৰ সুযোগ আছে, তথাপিও নেট ৰান ৰেটত পিছ পৰি আছে ৰাহুলৰ দল। হায়দৰাবাদে ৯.৪ অভাৰত ১৬৭ ৰান সংগ্ৰহ কৰি মেচখনত জয়লাভ কৰে। দলৰ পৰাজয়ত উত্তেজিত হৈ গোৱেংকাই খেলৰ অন্তত খেলপথাৰলৈ নামি আহি ৰাহুলক ধমক দিয়ে।
