ৰাষ্ট্ৰীয় গণতান্ত্ৰিক মিত্ৰজোঁটৰ প্ৰাৰ্থী উপেন্দ্ৰ কুশৱাহাৰ বিৰুদ্ধে বিহাৰৰ কৰাকাট লোকসভা আসনৰ পৰা নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰাৰ বাবে বিজেপিয়ে বুধবাৰে ভোজপুৰী অভিনেতা তথা ৰাজনীতিবিদ পৱন সিঙক বহিষ্কাৰ কৰে। কাৰাকাটৰ পৰা প্ৰাৰ্থীত্বক লৈ কেইবা সপ্তাহ ধৰি চলি থকা জল্পনা-কল্পনাৰ অন্ত পেলাই ৯ মে’ত সিঙে মনোনয়ন দাখিল কৰে।
পৱন সিঙলৈ লিখা এখন পত্ৰত বিজেপিয়ে তেওঁৰ সিদ্ধান্ত “দল বিৰোধী” বুলি কয়৷চলি থকা লোকসভা নিৰ্বাচনৰ সপ্তম আৰু অন্তিম পৰ্যায়ৰ ১ জুনত নিৰ্বাচনমুখী হ’ব কাৰাকাটে।
প্ৰাক্তন কেন্দ্ৰীয় মন্ত্ৰী তথা ৰাষ্ট্ৰীয় লোক মৰ্চাৰ মুৰব্বী কুশৱাহাৰ উপৰিও দক্ষিণ বিহাৰৰ আসনৰ পৰা মহাজোঁটৰ ৰাজাৰাম সিং আৰু এআইআইএমআইএমৰ প্ৰিয়ংকা চৌধুৰী ৰণত নামিছে।
বিজেপিয়ে অভিনেতা-ৰাজনীতিবিদজনক বহিষ্কাৰ কৰাৰ সিদ্ধান্তৰ প্ৰতিক্ৰিয়া প্ৰকাশ কৰি ৰাষ্ট্ৰীয় জনতা দলৰ নেতা তেজস্বী যাদৱে সাংবাদিকৰ আগত কয় যে এয়া উপেন্দ্ৰ কুশৱাহাক পৰাস্ত কৰাৰ ষড়যন্ত্ৰ। আভ্যন্তৰীণভাৱে বিজেপিয়ে পৱন সিঙক সহায় কৰি আছে৷বিহাৰৰ উপ-মুখ্যমন্ত্ৰী সম্ৰাট চৌধুৰীয়ে কয় যে যদি কোনোবাই দলৰ বিৰুদ্ধে নিৰ্বাচনত প্ৰতিদ্বন্দ্বিতা কৰে, তেন্তে স্বাভাৱিকতে দলে ব্যৱস্থা গ্ৰহণ কৰে।
পৱন সিঙে কুশৱাহাৰ বিৰুদ্ধে প্ৰতিদ্বন্দ্বিতা কৰাৰ সিদ্ধান্তক লৈ আৰাহ লোকসভাৰ আসনৰ পৰা পুনৰ নিৰ্বাচিত হোৱা কেন্দ্ৰীয় মন্ত্ৰী আৰ কে সিংকে ধৰি একাংশ বিজেপি নেতাৰ সমালোচনাৰ সন্মুখীন হয়।
