যোৱা ১ জুনত মেঘালয়ৰ পশ্চিম জয়ন্তীয়া পাহাৰৰ লাস্কেইন চি এণ্ড আৰ ডি ব্লকত অৱস্থিত ছাফাই গাঁৱত বিষাক্ত বন্য কাঠফুলা সেৱন কৰি তিনিটা নাবালক শিশুৱে কৰুণভাৱে প্ৰাণ হেৰুৱাই।
পশ্চিম জয়ন্তীয়া পাহাৰৰ আৰক্ষী অধীক্ষক চেম্ফাং চিৰ্টিৰ মতে, বিষাক্ত কাঠফুলা সেৱনৰ ফলত গাঁওখনৰ তিনিটা পৰিয়াল ক্ষতিগ্ৰস্ত হৈছে। তৎক্ষণাত তেওঁলোকক তাৎক্ষণিক চিকিৎসাৰ বাবে জোৱাইৰ মথ কমিউনিটি হেল্থ (এমচিএইচ) চিকিৎসালয়লৈ লৈ যোৱা হয়।
খবৰ অনুসৰি বিষক্ৰিয়াত মৃত্যু হোৱা নাবালকসকল আটাইকেইজনেই একেটা পৰিয়ালৰ। তেওঁলোকৰ মাতৃ জুমনলাং চুচিয়াং (৪৩) আৰু এজন ১০ মহীয়া পুত্ৰৰ অৱস্থা বৰ্তমান সংকটজনক।
জোৱাইৰ এম চি এইচ হাস্পতালত চিকিৎসাধীন হৈ আছে আন এটা আক্ৰান্ত পৰিয়ালৰ সদস্য ৰিবাইতকী ছাদাপ, শন্মী ছাদাপ, আৰু সাহ ছাদাপ।অভাৰ ছুটংগা, আন্না ছুচিয়াং, আৰু নিৱানশ্ব কানাইকে ধৰি তৃতীয়টো আক্ৰান্ত পৰিয়ালকো এমচিএইচ চিকিৎসালয়ত ভৰ্তি কৰা হৈছে।
স্থানীয় কৰ্তৃপক্ষই এই কাণ্ডৰ তদন্ত চলাই আছে আৰু বন্য কাঠফুলা সংগ্ৰহ কৰাৰ সময়ত বাসিন্দাসকলক অতি সাৱধান হ’বলৈ আহ্বান জনাইছে, কিয়নো কিছুমান বিশেষ জাত অতি বিষাক্ত হ’ব পাৰে আৰু ইয়াৰ ফলত মৃত্যুকে ধৰি স্বাস্থ্যজনিত বিপদ হ’ব পাৰে।
